Vahid Əhmədov: “Fərmanla kreditlərin borc hissəsinə dəyilmir, əsasən borcun artan hissəsinə güzəşt edilir” Fikrət Yusifov: “Prezidentin problemli kreditlərlə bağlı imzaladığı fərmanın maliyyə tutumu kifayət qədər böyükdür”
Məlum olduğu kimi, Prezident İlham Əliyev Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında Fərman imzalayıb. Fərmana əsasən, 2015-ci ildən bəri ABŞ dolları ilə götürülən, məbləği 10 min dollaradək olan kreditlərin devalvasiyada artan hissəsini dövlət ödəyəcək.
Birinci devalvasiyaya (21 fevral) qədər götürülmüş kreditlərin (10 000 dollara qədər) hər dollarına əlavə 25 qəpik, ikinci devalvasiyaya qədər (22 dekabr) götürülmüş 10 000 dollara qədər kreditlərin hər dollarına 60 qəpik ödənəcək. Məhkəmələrdə vətəndaşlara qarşı olan və vaxtı keçmiş kredit borclarına görə açılmış işlər geri çağırılacaq, icra sənədləri üzrə icraata xitam veriləcək.
Prezident tərəfindən məlum fərman on minlərlə vətəndaşımız üçün şad xəbərdir. Azərbaycanın dövlət başçısı köklü sosial islahatlar, vətəndaşların sosial rifah səviyyəsinin artırılaraq maddi durumunun yaxşılaşdırılmasına yönəlmiş səbatlı, genişmiqyaslı proqram çərçivəsində gerçəkdən də inqilabi sərəncam imzalayıb.
Problemli kreditlərlə bağlı imzalanan fərmanı şərh edən Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov “Bakı-Xəbər”ə açıqlamasında qeyd etdi ki, məlum fərmanda 2015-ci ildə baş verən 21 fevral və 22 dekabr devalvasiyaları ilə bağlı ayrıca bəndlər nəzərdə tutulub: “Birinci devalvasiyadan sonra əhalinin banklara olan borcunun artan hissəsi 0.27 qəpik idisə, bugünkü fərmanla onun 0.25 qəpiyi silinib. İkinci devalvasiyadan sonra artan hissə 0.92 qəpik olmuşdusa, onun da 60 qəpiyi silinib. Fərmanla kreditlərin borc hissəsinə dəyilmir, əsasən borcun artan hissəsinə güzəşt edilir”.
Millət vəkilinin sözlərinə görə, eyni zamanda, bank sisteminin sağlamlaşdırılması üçün Mərkəzi Bank və Maliyyə Bazarlarına Nəzarət Palatasına göstərişlər verilib: “Bu qurumlara 682 milyon manat və 282 milyon manat vəsait ayrılır ki, bank sistemində faiz dərəcələri aşağı salınsın. Bank sisteminin kapitallaşması təmin olunsun, banklar normal fəaliyyət göstərə bilsinlər. Burada banklarla birlikdə bir ay müddətində fiziki şəxslərin xarici valyutada əsas məbləği 10 000 (on min) ABŞ dollarınadək, milli valyutada isə 17 000 (on yeddi min) manatadək olan kreditləri üzrə vaxtı keçmiş və bu fərmana əsasən hər bir bank üzrə restrukturizasiya olunmalı kredit borclarının məbləği və borcluların siyahısı müəyyən ediləcək. Bu siyahı müəyyən edildikdən sonra isə fərmanın icrasına başlanacaq”.
İqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, problemli kreditlərlə bağlı Prezident İlham Əliyevin imzaladığı fərman humanist addımdır. Bu fərmanın maliyyə tutumu kifayət qədər böyükdür: “Prezidentin əhalinin sosial müdafiəsinin gücləndirilməsi istiqamətində reallaşdırdığı strategiyanın hissələrindən biri də vaxtı ötmüş kreditlərdir. Bu məsələnin niyə məhz bu dövrdə baş verməsi də müzakirə olunur. Nəzərə almaq lazımdır ki, ötən dövr ərzində qlobal iqtisadi böhranın təsiri Azərbaycan iqtisadiyyatından, maliyyə sistemindən də yan keçməyib. Eyni zamanda, neftin satış qiymətinin 3-4 dəfəyə qədər azalması da bizim maliyyə vəziyyətimizə müəyyən dərəcədə təsir etmişdi. Hazırda Azərbaycanın iqtisadi şəraiti imkan verir ki, bu kimi məsələləri həll edilsin”.
F.Yusifovun sözlərinə görə, problemli kreditlərlə bağlı məsələnin həll olunmasını insanlar gözləyirdi. Krediti ödəməkdə çətinlik çəkən şəxslərin maliyyə vəziyyətinin yaxşılaşması məqsədilə bu fərman verildi. O ailələrin maddi vəziyyətinin dirçəlməsində bu fərmanın xüsusi rolu olacaq.
Günel CƏLİLOVA
