Cari ilin ötən dövrü ərzində Azərbaycanda sosial müstəvidə həyata keçirilən islahatlar cəmiyyətdə yüksək səviyyədə qarşılanmaqla bərabər, əhalinin rifah halına da əsaslı surətdə təsir göstərməkdədir. Xüsusən də Prezident İlham Əliyevin vətəndaşların sosial rifahının yüksəldilməsinə xidmət edən sərəncamları, fərman və qərarları reallaşdırılan böyük sosial islahatlar paketinin mühüm tərkib hissəsi sayılır.
Xatırladaq ki, son günlərdə qeyd olunan istiqamətdə bir-birinin ardınca çox mühüm addımlar atıldı. Belə ki, 12 min 200-dən çox şəhid ailəsinə dövlət tərəfindən 11 min manat ödənişin edilməsi, şəhid ailələrinin müavinətlərinin 242 manatdan 300 manata, Əfqanıstanda həlak olanların ailələrinə verilən müavinətin 220 manatdan 300 manata qaldırılması, minimum əməkhaqqının 38 faiz artırılaraq 130 manatdan 180 manata çatdırılması insanların sosial rifah halının yüksəlməsinə birbaşa təsir edir. Eləcə də minimum pensiyaların məbləğinin təxminən 38 faiz, yəni 116 manatdan 160 manata qədər artırılması, 100 minə yaxın tələbənin təqaüdünün qaldırılması dövlətin həyata keçirdiyi siyasətin mərkəzində insan amilinin olduğunu bir daha nümayiş etdirir.
Bundan başqa daha bir mühüm fakt odur ki, dövlət başçısı sosial tədbirlərin davam etdirilməsi üçün müvafiq addımların atılması istiqamətində tapşırıqlar verib. Məsələn, məlumdur ki, vətəndaşları narahat edən məsələlərdən biri də problemli kreditlərlə bağlıdır. Bu problemlə də əlaqədar Prezident məsələnin vətəndaşların xeyrinə həll edilməsi üçün müvafiq göstərişlər verib. Təbii, atılan bu addımlar, görülən işlər bir daha təsdiq edir ki, Azərbaycanda sosial siyasət sistemli və yüksək şəkildə həyata keçirilir. Yuxarıda qeyd olunduğu kimi isə, prosesin davamlı xarakter alması əsas diqqət mərkəzindədir. Məhz bu fonda yeni islahatların reallaşdırılması da əsas gözləntilər sırasındadır. Məsələnin bu tərəfinə nəzər salan iqtisadçı ekspert Vüqar Bayramov qeyd edir ki, Azərbaycan 2019-cu ilə struktur islahatları ilə yanaşı, sosial sferada aparılan islahatlar və sosial təminatın gücləndirilməsi ilə daxil olub: “Son 2 ayda bu sahələrdə aparılan islahatlar iqtisadi inkişafın daha dayanıqlı olmasını təmin edir, eyni zamanda, vətəndaşların iqtisadi islahatlardan daha çox faydalanmasına imkan yaradır. Bu baxımdan Prezident İlham Əliyevin yanında iqtisadi və sosial məsələlərlə bağlı keçirilən müşavirə ilin ötən dövründə həyata keçirilən fəaliyyətləri və islahatları qiymətləndirməklə yanaşı, növbəti aylar üçün prioritetləri müəyyənləşdirdi“.
Ekspert qeyd edib ki, geridə qoyduğumuz 2 ay sosial təminatın gücləndirilməsi baxımından yadda qaldı. Bir tərəfdən minimum əməkhaqqı, pensiyalar artırıldı, sosial sferada vətəndaşları maraqlandıran kifayət qədər ciddi və əhəmiyyətli işlər görüldü: “Eyni zamanda, istismara alınmayan binaların istismara alınması ilə bağlı dövlət başçısı tərəfindən imzalanan müvafiq fərmana uyğun olaraq bina evlərində yaşayan mənzil sahiblərinin çıxarışla təmin olunması ilə bağlı aparılan tədbirlər xüsusi qeyd olunmalıdır. Müşavirədə müzakirə edilən məsələlərdən biri də problemli kreditlərin həll edilməsi ilə bağlı ölkə başçısı tərəfindən göstərişin verilməsi və bununla bağlı fərqli təkliflərin müzakirəsi, bu məsələnin araşdırılması oldu. Düşünürəm ki, bu istiqamətdə müəyyən addımın atılması vətəndaşlarımızı daha çox narahat edən məsələlərdən birinin yaxın zamanlarda həll edilməsi anlamına gəlir. Praktiki olaraq bu ondan xəbər verir ki, hazırda Azərbaycan vətəndaşını maraqlandıran sosial məsələlər dövlət başçısının diqqət mərkəzindədir. Xüsusən son aylar sosial təminatın gücləndirilməsi ilə bağlı atılan addımlar, ölkə başçısı tərəfindən fərqli problemlərin araşdırılması və həll edilməsi ilə bağlı verilən göstərişlər vətəndaşların sosial təminatının gücləndirilməsi, bütövlükdə iqtisadiyyatın inkişafı və inklüziv inkişaf baxımından çox vacibdir.
Müşavirə, eyni zamanda, həm iqtisadi və sosial islahatların qiymətləndirilməsi, həm də növbəti dövrdə həyata keçiriləcək islahatlarla bağlı prioritet və istiqamətləri müəyyənləşdirdi. Həmin kontekstdən də bu müşavirə Azərbaycanda növbəti aylarda da davamlı islahatların həyata keçiriləcəyi və bu istiqamətdə fəaliyyətin davam etdiriləcəyi ilə bağlı mesajdır. Biz növbəti aylarda iqtisadi və sosial sferada yeni islahatların aparılacağını müşahidə edəcəyik”. Digər ekspertlər də vurğulayır ki, Azərbaycanda həyata keçirilən iqtisadi siyasət qarşıdakı dövr ərzində də sosial məsələləri həlli üçün geniş imkanlar yaradır.
Nahid SALAYEV
