Musa Quliyev: “Orta aylıq əməkhaqqı artdıqca, minimum əməkhaqqı da artacaq” Fikrət Yusifov: “… əhalinin maddi durumunu xarakterizə edəcək digər göstəricilərlə qonşu ölkələri keçəcəyik”
“Azərbaycanda bir neçə gün əvvəl artırılan minimum əməkhaqqı yenidən artırılacaq”. Bu barədə Prezident İlham Əliyev fevralın 25-də iqtisadi və sosial məsələlərlə bağlı müşavirədə bildirib.
Qeyd edək ki, Azərbaycanda minimum əməkhaqqı fevralın 8-də Prezidentin sərəncamı ilə artırılaraq 130 manatdan 180 manata qaldırılıb. Dövlət başçısı müşavirədə çıxışı zamanı qeyd edib ki, bu məbləğ qaneedici deyil: “Bu il biz minimum əməkhaqqını əhəmiyyətli dərəcədə artırdıq - 38 faiz. Bu böyük artımdır, 130 manatdan 180 manata qalxıb. Bu, 600 min insanı əhatə edir. Ancaq o da həqiqətdir ki, bu rəqəm bizi heç də razı sala bilməz. Ona görə müvafiq göstərişlər verildi ki, minimum əməkhaqqının gələcək artımı ilə bağlı təkliflər hazırlansın. İndi bunun maliyyə yükünü, əlbəttə ki, biz qiymətləndirməliyik. Əlbəttə ki, gələcəkdə minimum əməkhaqları və pensiyalar ardıcıl olaraq artırılacaq”.
Yenidən minimum əməkhaqqının artırılacağı ilə bağlı dövlət başçısının səsləndirdiyi fikirlər cəmiyyətdə müsbət rezonans doğurur.
Minimum əməkhaqqının artırılmasının əhəmiyyəti barəsində danışan millət vəkili Musa Quliyev bildirdi ki, son zamanlar minimum əməkhaqqının artırılması, pensiya həddinin qaldırılması, məcburi köçkünlər üçün yeni yaşayış mənzillərinin verilməsi, şəhid ailələrinin problemlərinin həll edilməsi və s. addımlar sosialyönümlü siyasətin uğurlu nəticələridir: "Əhalini narahat edən hər bir məsələ dövlət başçısının diqqət mərkəzindədir. Prezident müşavirədə bildirdi ki, minimum əməkhaqqının və pensiyaların ardıcıl qaldırılması ölkəmizin siyasətində çox mühüm istiqamətlərdən biridir. Məlumdur ki, Azərbaycan Avropa Sosial Xartiyasına qoşulub. Bu xartiyaya görə, ölkədə yaşayış minimumu orta aylıq əməkhaqqının 60 faizini təşkil etməlidir. Azərbaycanda bu rəqəm hələlik bir az aşağıdır. Yəqin ki, yaxın illərdə bu həddə gəlib çatacağıq. Orta aylıq əməkhaqqı artdıqca, minimum əməkhaqqı da artacaq. Burada məqsəd orta təbəqəni formalaşdırmaq, sosial qrup olaraq daha da genişləndirmək və yoxsulların sayını azaltmaqdır.
Prezident çalışır ki, çox zəngin insanlarla digər qrup əhali arasında nisbət böyük olmasın. İnşallah, yaxın illərdə buna tam nail olacağıq. Cənab Prezidentin müşavirədə toxunduğu məqamlar məhz buna xidmət edir. Ölkəmizin iqtisadi gücü artdıqca, orta aylıq əməkhaqqı yüksəlir. Bu da minimum əməkhaqqını çoxaldır. Nəticədə pensiyalar da artır”.
İqtisadçı-ekspert Fikrət Yusifov bildirdi ki, Prezident müşavirədə çıxışı zamanı dedi ki, ölkənin maliyyə durumu araşdırılandan sonra minimum əməkhaqqının artırılması ilə bağlı qərar veriləcək: “Məlumdur ki, verilən hər bir qərarın maliyyə təminatı olmalıdır. Yaxın zamanlarda maliyyə təminatı ilə bağlı araşdırma yekunlaşacaq və buna uyğun olaraq qərar veriləcək.
Dövlət başçısının minimum əməkhaqqının artırılması məsələsinə yenidən toxunması onu deməyə əsas verir ki, yaxın zamanlarda tək əməkhaqqının artımı deyil, eyni zamanda, əhalinin maddi durumunu xarakterizə edəcək digər göstəricilərdə də qonşu ölkələri keçəcəyik. Prezidentin sosial strategiyasının əsas hədəfi ondan ibarətdir ki, insanların rifah halı yüksək səviyyədə təmin olunsun. Son 2 ay ərzində əhalinin sosial durumunun yüksəlməsi ilə bağlı çoxlu sayda qərar qəbul olunub. Bu qərarlar həm sosial müdafiənin gücləndirilməsi, həm də əhalinin rastlaşdığı sosial problemlərin həllini əhatə edir. Uzun müddətdir əhalini narahat edən məsələlərdən biri də problemli kreditlərdir. Prezident çıxışı zamanı bu məsələyə də toxundu və qeyd etdi ki, problemli kreditlərlə bağlı qərar qəbul olunacaq”.
Günel CƏLİLOVA
