Pərviz Heydərov: “Xarici ölkələrin “ASAN xidmət” modelindən istifadəyə can atmaları, bu metodu tətbiq etmələri sevindiricidir”
Xəbər verildiyi kimi, Azərbaycanın “ASAN xidmət” modelinin 8 ölkədə oxşarı yaradılacaq. Bunu Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev “ASAN Radio”nun "QəbuldASAN" proqramında deyib.
O, həmin ölkələrin adını açıqlamasa da, bununla bağlı danışıqların aparıldığını bildirib: “Biz həmin ölkələrlə əməkdaşlığa başlamışıq. Azərbaycanın “ASAN xidmət” modelinin həmin ölkələrdə fəaliyyət göstərməsinə nail olacağıq. Artıq Azərbaycanın “ASAN xidmət” modeli əsasında Əfqanıstanda dövlət xidmətlərinin göstərilməsi mexanizmi təsis edilib”.
“ASAN xidmət” modelinə artıq xarici ölkələr də maraq göstərir və belə bir təcrübənin öz ərazilərində də tətbiq olunmasını istəyirlər.
İqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, Azərbaycanda “ASAN xidmət”in yaradılmasının əsas üstünlüyü bir neçə dövlət qurumunu bir orqanda cəmləşdirməsidir: “Bu xidmət yalnız ölkəmizdə tətbiq olunub. Bir çox ölkə “ASAN xidmət”lə maraqlanıb və onun üstün cəhətlərindən xəbərdardır. Bu səbəbdən də həmin ölkələr bu xidmətin öz ərazilərində də tətbiq olunmasını istəyirlər”.
Həmsöhbətimizin sözlərinə görə, “ASAN xidmət” yarandığı gündən etibarən hər kəsin sevdiyi quruma çevrilib. Bu səbəbdən də adıçəkilən xidmət mərkəzinin sayı daha da artırılacaq.
Ekspert bildirdi ki, hər bir ölkənin müvafiq idarəetmə forması var. “ASAN xidmət” modeli isə bütün dövlətlərin istəyinə uyğundur: “Bu xidmət vətəndaşların istəyini qısa müddətdə həyata keçirir. Bu da bir sıra ölkələrdə böyük marağa səbəb olub. Onların “ASAN xidmət” modelindən istifadəyə can atmaları, bu metodu tətbiq etmələri sevindiricidir. Çünki biz öz məhsulumuz olan “ASAN xidmət”i xarici ölkələrə ixrac edirik”.
Günel CƏLİLOVA
