Radil Fətullayev: “Çoxmənzilli binaların istismarına icazə verilməsinin sadələşdirilməsi daşınmaz əmlak bazarında qiymət artımına deyil, əksinə, ucuzlaşmaya səbəb olacaq” Ramil Osmanlı: “Qeydiyyat problemi həll olunandan sonra qısa müddət ərzində qiymət artımı baş verəcək və sonra bazar stabilləşəcək” Rəşad Əliyev: “… əmlak bazarına təsir etməyəcək”
Məlum olduğu kimi, Prezident İlham Əliyev bəzi çoxmənzilli binaların istismarına icazə verilməsinin sadələşdirilməsi haqqında sərəncam imzalayıb.
Sərəncam istismarına icazə verilməmiş çoxmənzilli yaşayış binalarının sakinlərinin mənafelərini və Azərbaycan Respublikasının sosialyönümlü dövlət siyasətinin əsasını təşkil edən humanizm prinsiplərini əsas götürərək, həmin binaların istismarına icazə prosedurunu və müddətini optimallaşdırmaq, bu sahədə şəffaflığı və vətəndaş məmnunluğunu təmin etmək məqsədilə imzalanıb. Sərəncamda 2019-cu il yanvarın 1-dək bütün mərtəbələrinin, yan divarlarının və dam örtüyünün inşası daxil olmaqla tikinti-quraşdırma işləri başa çatmış və istismar edilən mənzilləri olan çoxmənzilli yaşayış binalarının (çoxmənzilli yaşayış binası komplekslərinin) istismarına icazə verilməsi qaydaları müəyyənləşdirilir.
Çoxmənzilli binaların istismarına icazə verilməsinin sadələşdirilməsi haqqında sərəncamın verilməsi bu sahədə yaşanan problemlərin aradan qalxmasına səbəb olacaq. Maraqlıdır, məlum sərəncam daşınmaz əmlak bazarında qiymətlərə təsir edəcəkmi?
Əmlak məsələləri üzrə ekspert Radil Fətullayev “Bakı-Xəbər”ə açıqlamasında qeyd etdi ki, orderi olmayan mənzillərdə satış yalnız müqavilə üzərindən həyata keçirilirdi. Bu da alıcı ilə yanaşı, satıcıya da narahatlıq yaradırdı: “Çoxmənzilli binaların istismarına icazə verilməsinin sadələşdirilməsi daşınmaz əmlak bazarında qiymət artımına deyil, əksinə, ucuzlaşmaya səbəb olacaq. Məlumdur ki, prosedur sadələşəndən sonra əhalinin bu sahəyə inamı artar. Bu hal bazarda qiymət dəyişikliyinə səbəb olmayacaq”.
Əmlak Ekspert Mərkəzinin direktoru Ramil Osmanl bildirdi ki, sərəncamla nəzərdə tutulan işlər texnikidir: “Yəni bu gün analoji ərazilər üzrə çıxarışı olan və olmayan mənzillər arasında 5-10 qiymət fərqi olur. Çıxarış alındıqdan və qeydiyyat problemi həll olunandan sonra istisna etmirəm ki, analoji qiymət artımı baş versin. Lakin bu, təhlükəli məsələ deyil. Hesab edirəm ki, qeydiyyat problemi həll olunandan sonra qısa müddət ərzində qiymət artımı baş verəcək və sonra bazar stabilləşəcək. Fövqəladə Hallar Nazirliyi (FHN) tərəfindən o binalardakı qüsurlar aşkar olunacaq, bunun üçün tikinti şirkətlərinin rəhbərlərinə imkan verilir ki, 5 ay müddətində problemləri aradan qaldırıb FHN-ə rəylə bağlı müraciət etsinlər”.
İqtisadçı Rəşad Əliyev bildirdi ki, çoxmənzilli binaların istismarına icazə verilməsinin sadələşdirilməsi haqqında sərəncam imzalanması əmlak bazarına təsir etməyəcək: “Çünki bu mənzillər əvvəllər də alınıb satılırdı. Sadəcə olaraq onların qiyməti sənədli evlərə nisbətdə ucuz olurdu. Fərq yerdən və binadan asılı olaraq 5-20 faizə qədər olurdu. Sənədləşmə problemi həll edildikdən sonra həmin mənzillərin qiyməti sənədli evlər kimi olacaq".
Onun fikrincə, burada daha mühüm olan digər məsələlər var: "Sənədləşdirmə aparılmayan binaların "reputasiyası" əksər hallarda pis olurdu. Çünki bilinmirdi ki, bunun səbəbi nədir. Yəni bu, binanın keyfiyyəti ilə bağlıdır, yoxsa digər subyektiv və obyektiv səbəblərlə? Nəticədə mənzil mülkiyyətçiləri əmlakları üzərində mülkiyyət hüquqlarını əks etdirən sənədlərini ala biləcəklər. Bu isə onların narahatlığını xeyli azaldacaq. Üstəlik, onların əmlakının aktiv kimi qiyməti də artacaq".
Günel CƏLİLOVA
