Vüqar Bayramov: “Bunun nəticəsidir ki, beynəlxalq hesabatlarda ölkənin yeri əvvəlki illərlə müqayisədə daha da yaxşılaşıb”
“Azərbaycanın uğurlu enerji inkişafı bizə özümüzü dünyaya etibarlı ölkə, etibarlı tərəfdaş, xarici investisiyaları 100 faiz qoruyan ölkə kimi təqdim etməyə imkan verib. Bizim enerji şirkətləri ilə bütün müqavilələrimiz parlament tərəfindən ratifikasiya olunur və qüvvəyə minir.
Bu səbəbdən də investorlar 100 faiz əmin olurlar ki, bu müqavilələrdə bir söz belə dəyişdirilməyəcək. Bu, etimad yaradır. Bu, həmçinin, bizə digər sektorlara milyardlarla investisiya cəlb etməyə imkan verib”. Bu fikirləri Prezident İlham Əliyev “Cənub Qaz Dəhlizi” Məşvərət Şurası çərçivəsində nazirlərin beşinci toplantısında bildirib.
Azərbaycana yatırılmış investisiyaların ümumi həcminin 250 milyard dollara yaxın olduğunu vurğulayan Prezident bunun yarısının xarici investisiyalar olduğunu qeyd edib. Ölkə başçısının fikrincə, bu bizə iqtisadiyyatımızı şaxələndirməyə, islahatları uğurla həyata keçirməyə, yaxşı biznes mühiti yaratmağa imkan verib: “Dünya Bankının sonuncu “Doing Business” hesabatına əsasən, Azərbaycan 25-ci yerdədir. Beləliklə, biz möhtəşəm uğur qazanmışıq və biznes mühiti nöqteyi-nəzərindən 10 ən islahatçı ölkədən biriyik”.
Dünya təcrübəsinə baxsaq görərik ki, xarici sərmayədarlar əsasən biznes üçün münbit şərait olan və investisiyanın qorunduğu ölkələrə daha çox maraq göstərirlər. Son illər Azərbaycanda aparılan islahatlar, qanunvericiliyin daha da yenilənməsi bu sahədə ölkədəki işgüzar mühiti daha da əlverişli edib.
Maraqlıdır, Azərbaycanın bu baxımdan yüksək göstəriciyə malik olması, xarici sərmayənin 100 faiz qorunması ölkəyə nə kimi iqtisadi perspektivlər vəd edir?
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Vüqar Bayramovun sözlərinə görə, Azərbaycanda xarici sərmayənin 100 faiz qorunması ölkəyə böyük perspektivlər vəd edir: “Bu amil xarici sərmayədarları Azərbaycana daha çox investisiya qoymağa təşviq edir. İqtisadi inkişafın dayanıqlı olması üçün bu, vacib əhəmiyyət kəsb edir. Məsələ ondadır ki, Azərbaycan üçün xarici sərmayənin cəlbi çox vacibdir. Çünki, nəticə etibarilə, xarici investisiya Azərbaycanda yeni iş yerlərinin yaradılmasına müsbət təsir edir. Digər tərəfdən, xarici sərmayə ölkəyə innovasiya texnologiyalarının cəlbinə kömək edir. O baxımdan düşünürəm ki, xarici sərmayənin qorunması və bu istiqamətdə həyata keçirilən işlər ölkənin iqtisadi inkişafına uyğundur. Nəzərə almaq lazımdır ki, Azərbaycan üçün xarici sərmayənin qorunması prioritet əhəmiyyət kəsb edir. Müşahidələr göstərir ki, Azərbaycan bu istiqamətdə böyük nailiyyətlər əldə edib. Bunun nəticəsidir ki, beynəlxalq hesabatlarda Azərbaycanın yeri əvvəlki illərlə müqayisədə daha da yaxşılaşıb. Bütün bunlar ölkə iqtisadiyyatına xarici investisiyaların yatırılması baxımından yeni imkanlar yaradır. Ona görə də xarici sərmayənin qorunması növbəti dövrlərdə də Azərbaycan üçün prioritet olacaq. Bu, əlbəttə ki, ölkə iqtisadiyyatının, xüsusən də qeyri-neft sektorunun daha da inkişaf etməsinə təkan verəcək. Eyni zamanda, sözügedən amil məşğulluğun təmin edilməsi və yeni iş yerlərinin yaradılması baxımından mühüm əhəmiyyət kəsb edir. Hesab edirəm ki, Prezident İlham Əliyevin rəhbərliyi ilə bu istiqamətdə görülən işlər iqtisadi inkişafı daha da stimullaşdıracaq”.
Vidadi ORDAHALLI
