Fikrət Yusifov: “Aqrar sektor, turizm və yükdaşımalar sahəsində sürətli inkişaf özünü göstərir və göstərəcək”
2019-cu ildə Azərbaycanda iqtisadi artımın 3,5 faiz təşkil edəcəyi ehtimal olunur. Bu barədə “Fitch Ratings” agentliyinin yeni hesabatında deyilir. Agentlik tərəfindən Azərbaycanın emitentinin uzunmüddətli xarici valyutada defolt reytinqi “BB+” səviyyəsində və sabit olaraq təsdiq olunub.
Qeyd olunur ki, bu il Azərbaycanda iqtisadiyyatın artım templəri “Şahdəniz” qaz-kondensat yatağının işlənməsinin ikinci mərhələsi çərçivəsində qaz tədarükü ilə bağlı olacaq. Bundan başqa, turizm və kənd təsərrüfatı sahələrinin də iqtisadi artıma səbəb olacağı qeyd olunur. Bundan başqa, agentlik ölkənin bank sektorunda vəziyyətin yaxşılaşmasını qeyd edir.
Cari il ərzində ölkənin iqtisadi artımının 3,5 faiz olacağı barədə fikir bildirən iqtisadçı, ekspert-alim Fikrət Yusifov “Bakı-Xəbər”ə açıqlamasında qeyd etdi ki, ölkə iqtisadiyyatında qeydə alınacaq inkişaf 3,5 faizdən daha çox olacaq: “Öncəki illərdən fərqli olaraq, bu il ölkə iqtisadiyyatında hər hansı bir xoşagəlməz hal qeydə alınmayacaq. Ölkə iqtisadiyyatında inkişaf sürəti arzuolunan səviyyəyə çatmaq üzrədir”.
Həmsöhbətimizin sözlərinə görə, iqtisadiyyatın inkişafı istiqamətində aparılan işlər özünü daha çox qeyri-neft sektoru və qeyri-neft sənayesində göstərir. Onun fikrincə, aqrar sektor, turizm və yükdaşımalar sahəsində sürətli inkişaf özünü göstərir və göstərəcək. Təbii ki, bu sahədə aparılan işlər sayəsində ölkə iqtisadiyyatında artım qeydə alınacaq: “Fitch Ratings” agentliyinin yeni hesabatında qeyd olunur ki, 2019-cu ildə Azərbaycanda iqtisadi artım 3,5 faiz səviyyəsində olacaq. Ancaq mən hesab edirəm ki, iqtisadi artım 3,5 faiz deyil, 5-6 faiz səviyyəsində olacaq”.
Günel CƏLİLOVA
