Aydın Hüseynov: “Azərbaycan daxili bazarı təmin etməklə yanaşı, rəqabətqabiliyyətli, ixracyönümlü sənaye məhsullarını dünya bazarına çıxaracaq”
Azərbaycanda sənaye müəssisələri və bu sahədə fəaliyyət göstərən fərdi sahibkarlar tərəfindən 2019-cu ilin yanvar ayında 3,8 milyard manatlıq və ya 2018-ci ilin müvafiq dövrü ilə müqayisədə 3,4 faiz çox sənaye məhsulu istehsal edilib. Təkcə sənayenin qeyri-neft sektorunda məhsul istehsalı 13,8 faiz artıb.
Bununla belə, sənaye məhsulunun 72,5 faizi mədənçıxarma sektorunda, 22,0 faizi emal sektorunda, 4,8 faizi elektrik enerjisi, qaz və buxar istehsalı, bölüşdürülməsi və təchizatı sektorunda, 0,7 faizi isə su təchizatı, tullantıların təmizlənməsi və emalı sektorunda istehsal olunub
Mədənçıxarma sektorunda neft hasilatı 0,8 faiz azalıb, əmtəəlik qaz hasilatı isə 26,4 faiz artıb.
Emal sektorunda avtomobil, qoşqu və yarımqoşquların istehsalı 2,9 dəfə, mebel istehsalı 2,3 dəfə, maşın və avadanlıqların istehsalı 2,1 dəfə, kağız və karton istehsalı 75,2 faiz, rezin və plastik kütlə məmulatlarının istehsalı 63,3 faiz, ağacın emalı və ağacdan məmulatların istehsalı 58,7 faiz, toxuculuq sənayesi məhsullarının istehsalı 56,9 faiz, içkilərin istehsalı 48,9 faiz, kompyuter, elektron və optik məhsulların istehsalı 37,1 faiz, kimya sənayesi məhsullarının istehsalı 35,4 faiz artıb. O cümlədən, ölkənin digər sənaye sahələrində də artım qeydə alınıb.
Bütün bunlar onu göstərir ki, son 3 ildə aparılan sistemli islahatlar, qeyri-neft sektorunun inkişaf etdirilməsi üçün qəbul olunan proqramlar Azərbaycanda sənayenin inkişafına ciddi təkan verir. Hər bir ölkənin iqtisadi inkişaf göstəricisini müəyyən edən başlıca faktor həmin ölkənin sənaye sektorunun nə dərəcədə inkişaf etməsidir. Təsadüfi deyil ki, bir sıra inkişaf etmiş və inkişaf etməkdə olan ölkələr sənaye sektorunun inkişafına xüsusi önəm verirlər. Bu baxımdan, Azərbaycanda bir ay ərzində 3,8 milyard manatlıq sənaye məhsulu istehsal olunmasının əhəmiyyətini ekspertlər necə dəyərləndirirlər?
Məsələyə münasibət bildirən millət vəkili Aydın Hüseynovun sözlərinə görə, sənaye sahəsində qeydə alınan ciddi artım bu sahənin ikişaf etdirilməsinin prioritet əhəmiyyət kəsb etdiyini göstərir: “Biz görürük ki, aparılan islahatlar, görülən işlər sayəsində bu ilin yanvar ayında sənaye istehsalı kifayət qədər artıb. Belə ki, bir ay ərzində 3,8 milyard manatlıq sənaye məhsulunun istehsal olunması kifayət qədər böyük rəqəmdir. Sənayenin qeyri-neft sektorunda 14 faizə yaxın artım olub. Bu onu göstərir ki, Prezident İlham Əliyevin rəhbərliyi ilə həyata keçirilən iqtisadi siyasətin ən başlıca istiqamətlərindən biri də sənayenin inkişaf etdirilməsi və ölkə iqtisadiyyatının neftdən asılılığını azaltmaqdır. Bu istiqamətdə kompleks işlər görülür. Ümumilikdə götürdükdə, sənaye və sənayenin qeyri-neft sektorunda önəmli nailiyyətlər əldə olunub. Ötən ay sənaye istehsalında qeydə alınan artım onu göstərir ki, çox yaxın gələcəkdə Azərbaycan böyük bir sənaye dövlətinə çevriləcək. Azərbaycan sənaye məhsulları ilə daxili bazarı təmin etməklə yanaşı, rəqabətqabiliyyətli, ixracyönümlü sənaye məhsullarını dünya bazarına çıxaracaq. Bunun üçün çox böyük işlər həyata keçirilir. İri şəhərlərdə və regionlarda sənaye parkları, sənaye məhəllələri salınır. Başlıca məqsəd həm də ölkə vətəndaşlarını dayanıqlı daimi iş yerləri ilə təmin etməkdir. Çünki sənaye sektorunda çalışan işçilərin əmək vərdişləri və peşələri yüksək olduğu üçün, orada əməkhaqları da yüksək olur. Bu isə, ümumilikdə, vətəndaşların sosial rifah halının daha da yaxşılaşmasına xidmət edir”.
Vidadi ORDAHALLI
