Aydın Hüseynov: “Pensiya məbləğinin artırılması hər bir təqaüdçünün sosial rifahının yüksəlməsi deməkdir” Müslüm İbrahimov: “Pensiyaçıların istehlak səbətində olan məhsulların həcmi artacaq”
Xəbər verildiyi kimi, Azərbaycanda əmək pensiyalarının minimum məbləği 116 manatdan 160 manata çatdırılacaq və nəticədə 233 min nəfərin pensiyasında artım olacaq. Bunu əmək və əhalinin sosial müdafiəsi naziri Sahil Babayev fevralın 14-də keçirdiyi brifinqdə deyib.
Nazir qeyd edib ki, Prezident İlham Əliyevin təşəbbüsü ilə əmək pensiyasının minimum məbləğinin əhəmiyyətli şəkildə artırılmasına dair qanunvericilik layihəsi hazırlanaraq Milli Məclisə təqdim olunub: “Minimum pensiya məbləğinin artırılması, ümumilikdə, 233 min pensiyaçını (o cümlədən, 140 min nəfər əlilliyə görə pensiya alan şəxsi) əhatə edəcək. Onlardan 9 min nəfərin pensiyasında 93 faiz (75 manat), 26 min nəfərin pensiyasında 30 faiz (37 manat), 74 min nəfərin pensiyasında 16 faiz (27 manat) və s. artım olacaq. Artımın edilməsi üçün nazirlik yanında Dövlət Sosial Müdafiə Fondundan cari ilin 10 ayı (mart-dekabr) üzrə 41 milyon manat, illik isə 49 milyon manat əlavə vəsait yönəldiləcək”.
Mİllət vəkili Aydın Hüseynov “Bakı-Xəbər”ə açıqlamasında qeyd etdi ki, Prezident İlham Əliyevin siyasətinin başlıca məqsədi Azərbaycan vətəndaşlarının sosial rifahının yüksəlməsi, onlarıın maraqlarının müdafiə olunmasıdır. Sosial maraqların təmin olunması birbaşa əməkhaqqı ilə bağlıdır: “Məlumdur ki, ölkə əhalisinin sosial durumunun yüksəlməsi ilə bağlı ardıcıl şəkildə layihələr həyata keçirilir. Minimum əməkhaqqının məbləği 130 manatdan 180 manata yüksəldi. Pensiyanın sığorta məbləği artırıldı. Minimum pensiya məbləği 130 manatdan 160 manata qədər çatdırılacaq. Pensiya məbləğinin artırılmsı hər bir təqaüdçünün sosial rifahının yüksəlməsi deməkdir”.
İqtisad elmləri doktoru Müslüm İbrahimov qəzetimizə açıqlamasında bildirdi ki, minimum pensiya məbləğinin artırılması əhalinin yaşayış səviyyəsinin artmasına səbəb olacaq: “Minimum pensiya məbləğinin artırılması dövlət tərəfindən əhalinin sosial vəziyyətinin yaxşılaşması üçün atılan növbəti addımlardan biridir. İlk növbədə bildirim ki, pensiya məbləğinin artırılması istehlak aktivliyinin artırılmasına səbəb olacaq. Pensiyaçıların istehlak səbətində olan məhsulların həcmi artacaq”.
Həmsöhbətimizin sözlərinə görə, minimum pensiya məbləğinin 130 manatdan 160 manata çatdırılması əhalinin rifah halının yüksəlməsinə möhkəm zəmin yaradır.
Günel CƏLİLOVA
