Qadir Bayramlı: “Elə etmək lazımdır ki, istehsal olunan texniki avadanlıqlar bizə aid olsun”
Məlum olduğu kimi, ötən həftə Hacıqabul Sənaye Məhəlləsində “Azərmaş” ASC-nin Rusiya Federasiyasının “Qaz Qrup” şirkəti ilə birgə həyata keçirdiyi layihə üzrə “Qaz” avtomobillərinin istehsalı zavodunun təməli qoyulub. Bəllidir ki, zavodda kənd təsərrüfatında istifadə olunan maşınlar istehsal ediləcək. Bununla yanaşı, zavodda kənd təsərrüfatı texnikası və kommunal istifadə olunan nəqliyyat vasitələri istehsal oluna bilər.
Bu barədə İqtisadiyyat Nazirliyindən məlumat yayılıb.
Maraqlıdır, kənd təsərrüfatı texnikasının ölkəmizdə istehsal olunması aqrar sahəyə necə təsir edə bilər?
Azərbaycan Dövlət İqtisad Universitetinin (UNEC) dosenti Qadir Bayramlı məsələ ilə bağlı “Bakı-Xəbər”ə açıqlamasında qeyd etdi ki, kənd təsərrüfatı texnikasının istehsalı ölkəmizin ən zəif tərəflərindən biridir: “Sovet dönəmində Azərbaycan aqrar sahə üzrə ön sırada idi. 1990-cı illərdə isə aqrar sahədə yaşanan sıxıntı bu məsələyə öz təsirini göstərdi. O zamanlar kombayn öncə Aran bölgəsində taxılı biçirdi, sonra isə dağətəyi ərazilərə keçirdi. Aqrolizinqin tətbiqindən sonra bu məsələ nisbətən asanlaşdı. Buna baxmayaraq, aqrar sahədə problemlər hələ də mövcuddur”.
Həmsöhbətimizin sözlərinə görə, hazırda ot presi bağlayan maşınlara ehtiyac var. Eyni zamanda, dərman və toxum səpən maşınlarda ciddi sıxıntı yaşanır. Öncə daha çox tələb olunan maşınların istehsal olunması vacibdir. Bununla yanaşı, ölkədə aqrar təsərrüfatda istehsal olunan maşınların texnikası, avadanlıqları da istehsal oluna bilər: “Respublikada ehtiyat hissələr istehsal olunması iqtisadiyyatın inkişafına səbəb ola bilər. Çalışmaq lazımdır ki, istehsalatda yerli mütəxəssislər çalışsın. Elə etmək lazımdır ki, istehsal olunan texniki avadanlıqlar bizə aid olsun. Bu sahədə işlər sistemli şəkildə aparılarsa, kənd təsərrüfatının inkişafına səbəb ola bilər”.
Q.Bayramlı onu da əlavə etdi ki, kənd təsərrüfatı vasitələrinin texniki hissələri istehsal olunarsa, bununla həm yerli bazar təmin olunar, həm də gələcəkdə ixrac da ola bilər. Yerli bazar lazım olan kənd təsərrüfatı avadanlığı ilə təmin olunandan sonra texniki vasitələr ixracatı sahəsində inkişaf yaşana bilər.
Günel CƏLİLOVA
