Ruslan Quliyev: “Turizm xidmətinin ixracını genişləndirmək lazımdır ki, daha geniş arealda yayılsın” Rəşad Həsənov: “… müəyyən simptomlar hiss olunur”
Turizm həm iqtisadiyyatın güclü amili, həm təsirli sosial institut, həm də cəmiyyətdə ictimai rifah və mədəniyyətin göstəricisi kimi insanın həyat səviyyəsinin yüksəlməsinə, mənəvi zənginləşməsinə kömək edir. Məlumdur ki, Azərbaycan dövləti milli turizm sahəsinin inkişaf etdirilməsini iqtisadiyyatın qeyri-neft sektoru üzrə prioritet istiqaməti elan edib. Son illər turizmin təşviqi ilə bağlı görülən işlər, qəbul edilən dövlət proqramları, normativ-hüquqi bazanın təkmilləşdirilməsi bunu bir daha sübut edir. Dövlət və regional səviyyələrdə həyata keçirilən sosial siyasətdə turizm strateji əhəmiyyətli məsələ kimi çıxış edir.
Turizmin inkişafı istiqamətində görülən işlər sayəsində son illər ölkə turizmi inkişaf dövrünü yaşayır. Prezident İlham Əliyev REAL telekanalına müsahibə verən zaman bu məsələyə də toxunub. O qeyd edib ki, turizm hər bir ölkə üçün çox önəmli bir sahədir: “Elə ölkələr var ki, onların ümumdaxili məhsulunda əsas hissə turizmlə bağlıdır. Biz də çalışırıq ki, Azərbaycanın turizm imkanlarını genişləndirək və bu istiqamətdə müxtəlif addımlar atırıq. Azərbaycan dünyanın bəlkə də ən təhlükəsiz ölkələrindən biridir. Xalqımızın qonaqpərvərliyi, gözəl iqlim, gözəl şərait, bütün bunlar turizmin inkişafı üçün əsas şərtlər idi ki, biz bunları yaratdıq. İkinci məsələ ondan ibarət idi ki, biz turistləri necə cəlb edək, Azərbaycanı dünyaya necə təqdim edək? Burada xüsusi rol oynayan Azərbaycanda keçirilmiş beynəlxalq tədbirlər idi”.
Dövlət başçısı onu da qeyd edib ki, biz xidmət sektorunda bundan çox böyük xeyir götürürük. Azərbaycanı dünyada tanıtmaq üçün bunun çox böyük əhəmiyyəti var. Turizm ixracın bir növüdür: “Mən bir müqayisə gətirim sizin üçün. Keçən il kənd təsərrüfatı məhsullarının ixracından Azərbaycan turizmdən gələn vəsaitdən daha az vəsait əldə etdi. Yəni turizm ixrac növüdür. Keçən il Azərbaycana turizmdən iki milyard dollar vəsait daxil oldu. Bu vəsait vətəndaşlara, xidmət sektoruna, vergilərə və ümumi inkişafa xidmət göstərir. Ona görə biz qabaqcıl ölkələrin təcrübəsini öyrənirik və çalışırıq ki, Azərbaycanda turizm sənayesi daha da sürətlə inkişaf etsin”.
Ekspertlər də qeyd edirlər ki, qeyri-neft sektorunun əsas sahələrindən biri də turizmdir. Bu səbəbdən də turizm ixrac sektorlarından biri sayılır.
Sağlamlıq və Termal Turizmə Dəstək Assosiasiyasının sədri, turizm sahəsi üzrə ekspert Ruslan Quliyev “Bakı-Xəbər”ə açıqlamasında qeyd etdi ki, turizm xidmətinin ixracını genişləndirmək lazımdır ki, daha geniş arealda yayılsın: “Turizm şirkətləri tur paketləri xarici bazara təklif edirsə və bu fəaliyyətlərdən ölkəyə valyuta daxil olursa, bu sahəni inkişaf etdirmək lazımdır. Bununla bağlı təşviq mexanizmi işlənib hazırlanmalıdır. Bölgələrdə, Abşeron ərazisində turizm təsisatlarının fəaliyyəti stimullaşdırılmalıdır”.
Həmsöhbətimiz onu da əlavə etdi ki, qeyri-neft sektorunun inkişaf etdirilməsi qarşıya qoyulmuş əsas məqsədlərdən biridir. Bəllidir ki, turizm sektoru qeyri-nft sektorunun əsas sahələrindən biridir. Turizmin inkişafı istiqamətində müəyyən işlər görülüb. Sevindirici haldır ki, müsbət nəticə artıq hər kəsə bəllidir: “Turizm xidmətlərini ixrac edə bilərik. Bu sahədə müəyyən işlər görülməlidir”.
İqtisadçı-ekspert Rəşad Həsənov bizimlə söhbətində bildirdi ki, son illər turizm sektorunda müəyyən nailiyyətlər əldə olunub. Manatın məzənnəsinin xarici valyutaya nisbətən dəyişməsi, xüsusən də viza sisteminin sadələşdirilıməsi ilə bağlı qaydaların tətbiq olunması Körfəz ölkələrindən gələn əcnəbi vətəndaşların sayının artmasına səbəb olub: “Turizm sektorunda qeydə alınan inkişaf müəyyən dəyişikliklərə səbəb olub”.
Ekspertin sözlərinə görə, turizm sektorunda peşəkar və strateji inkişaf planı olan şirkətlər var. Həmin şirkətər uzunmüddətli inkişaf strategiyasını ortaya qoyub: “Bu da müəyyən qədər keyfiyyət rəqabətliyinin artırılması istiqamətində təşəbbüsləri genişləndirir və ixrac üçün potensial imkanlar formalaşdırır. Artıq turizm xidməti sahələrinin ixracında müəyyən simptomlar hiss olunur”.
Günel CƏLİLOVA
