Nüsrət İbrahimli: “Əmlakın icbari sığortasının əhali arasında geniş yayılmaması səbəblərindən biri də sığorta bazarında…”
Azərbaycanda əmlakın yanğından və digər risqlərdən sığortasına maraq kəskin artır. Maliyyə Bazarlarına Nəzarət Palatasının yaydığı məlumatda qeyd olunur ki, 2018-ci ilin yanvar-dekabr ayları ərzində əmlakın yanğından və digər risqlərdən sığortası üzrə sığorta şirkətlərinin yığımları 59 mln. 373,4 min manat təşkil edib. Bu, yanvar-noyabr ayları ilə müqayisədə 5 mln. 702,6 min manat və ya 10,63% çoxdur.
Qeyd edək ki, 2017-ci il ilə müqayisə etsək, ölkədə əmlakın yanğından və digər risqlərdən sığortası üzrə daxilolmalar 21,560 mln. manat və ya 57,02% artıb.
Ötən ilin yanvar-dekabr aylarında əmlakın yanğından və digər risqlərdən sığortası üzrə 3 mln. 074,3 min manatlıq ödəniş həyata keçirilib. Bu, yanvar-noyabr aylarındakı göstəricidən 400,4 min manat və ya 14,97%, 2017-ci il ilə müqayisədə 859,9 min manat və ya 38,83% çoxdur.
Bildirək ki, əvvəllər əmlakın sığortlanması sahəsində vəziyyət ürəkaçan deyildi. Bu sahədə maarifləndirmə işi sahəsində vəziyyət müsbətə doğru dəyişib.
Daşınmaz əmlak məsələləri üzrə ekspert Nüsrət İbrahimli “Bakı-Xəbər”ə açıqlamasında bildirdi ki, əmlakın sığortası sahəsində inkişafın qeydə alınması bu sahədə aparılan maarifləndirmə işi ilə bağlıdır: “Son illər bu sahədə aparılan maarifləndirmə sayəsində insanlar əmlakını sığorta etdirmək istəyinə düşüb”.
Həmsöhbətimizin sözlərinə görə, əvvəllər əmlak sığortası ilə bağlı məsələyə bir qədər soyuq münasibət vardı. Həmçinin, əmlakın icbari sığortasının əhali arasında geniş yayılmaması səbəblərindən biri də sığorta bazarında daha az paya malik olması idi. Cəmiyyətdə əmlak sığortasına birmənalı yanaşılmırdı.
Ekspert onu da vurğuladı ki, hər hansı bir risqdən əmlakın sığortalanması faizinin artması üçün maarifləndirmə işinə daha çox üstünlük vermək lazımdır. İnsanlar əmlak sığortası haqqında geniş informasiyaya sahib olmalıdırlar.
Günel CƏLİLOVA
