Rəsul Cahangirli: “Sözügedən sahələrdə layihələrin həyata keçirilməsi ölkədə qeyri-neft sektorunun inkişafına təkan verəcək”
Məlum olduğu kimi, İqtisadi Əməkdaşlıq Təşkilatının Ticarət və İnkişaf Bankı (ECO Trade and Development Bank, ETDB) Azərbaycanda kənd təsərrüfatı, kənd infrastrukturu, nəqliyyat, tranzit və logistik infrastruktur, istehsalat, turizm və digər sahələrin inkişafı üzrə layihələrin həyata keçirilməsi üçün investisiya imkanlarını öyrənməyi planlaşdırır. Bu barədə mətbuata bankdan bildiriblər.
Sözügedən məlumatda qeyd olunub ki, Azərbaycan son illərdə çox şey vəd edən iqtisadi inkişaf nümayiş etdirir və ETDB Azərbaycanın davamlı inkişafa nail olmaq məqsədilə apardığı əsaslı islahatlara dəstək üçün səylər göstərir. ETDB-dən deyiblər ki, bank Azərbaycanın maliyyə sektoru ilə əməkdaşlıq edərək ölkədə kiçik və orta müəssisələrin inkişafına dəstək məqsədilə öz maliyyələşdirmə proqramlarımı genişləndirə bilib.
Bankdan onu da bildiriblər ki, ümumilikdə, Azərbaycanda makroiqtisadi sabitlik və əlverişli biznes mühiti möhkəmlənir, bu da biznes imkanlarının geniş spektrini açır: “Buna görə də ETDB ölkədə dinamik və balanslaşdırılmış artım tempinin təmin edilməsi məqsədilə inkişaf layihələrinin maliyyələşdirilməsinə töhfə verməyə çalışır. O cümlədən, ticari maliyyələşdirməyə kömək və kiçik və orta müəssisələrin inkişafına dəstək bankın ölkədə əsas fəaliyyət istiqamətləri olaraq qalır. Bununla yanaşı, iqtisadiyyatın şaxələndirilməsinə dəstək baxımından Ticarət və İnkişaf Bankı iqtisadiyyatın müxtəlif sektorlarının inkişafı üzrə layihələrin həyata keçirilməsi üçün investisiya imkanlarını öyrənmək niyyətindədir”.
Ümumilikdə, sözügedən bankın Azərbaycanda sadalanan sahələr üzrə investisiya prioritetlərini ekspertlər necə dəyərləndirirlər?
Məsələyə münasibət bildirən ekspert Rəsul Cahangirlinin sözlərinə görə, son illər bir sıra maliyyə təşkilatlarının Azərbaycanda müxtəlif layihələrin həyata keçirilməsi ilə bağlı maraqları artıb: “Çünki Azərbaycanda mövcud olan dayanıqlı siyasi stabillik, makroiqtisadi sabitlik beynəlxalq maliyyə qurumlarının Azərbaycana marağını artırır. Sevindirici hal ondan ibarətdir ki, ETDB Azərbaycanda qeyri-neft sektoruna aid sahələrə sərmayə qoymaq imkanlarını nəzərdən keçirir. Bu sahədə potensial perspektivləri araşdırmaq istəyir. Çünki sadalanan sahələr məhz qeyri-neft sektoruna aiddir. Bütün bunlar da təsadüfi deyil. Son iki ildə ölkədə aparılan kompleks islahatlar, qəbul edilən bir sıra proqramlar beynəlxalq maliyyə institutlarının diqqətini cəlb edir. Məlum olduğu kimi, Azərbaycanda iqtisadiyyatın diversifikasiyası çərçivəsində qeyri-neft sektorunun inkişaf etdirilməsi ilə bağlı bir sıra layihələr həyata keçirilir. Müxtəlif profilli sənaye, kimya kompleksləri, böyük tutuma malik olan aqroparklar yaradılır. Təkcə bu il 10 aqroparkın istifadəyə veriləcəyi gözlənir. Ələt qəsəbəsində böyük ticarət limanı tikilir və s. Bütün bunların ərsəyə gəlməsi üçün dövlət xətti ilə sərmayələr yatırılır və digər işlər görülür. Yaxşı olardı ki, özəl sektor, beynəlxalq maliyyə institutları bu tip layihələrdə fəal iştirak etsinlər. Kənd təsərrüfatına, nəqliyyat, tranzit, istehsalat, turizm və digər bu kimi sahələrə sərmayə qoysunlar. Bunun üçün Azərbaycanda yetərincə çoxşaxəli potensial var. Bu baxımdan, ETDB-nin maraq göstərdiyi sektorlar perspektivlidir. Sözügedən sahələrdə layihələrin həyata keçirilməsi ölkədə qeyri-neft sektorunun inkişafına təkan verəcək”.
Vidadi ORDAHALLI
