Vüqar Bayramov: “Birmənalı şəkildə güzəştli kateqoriyaya aid olan şəxslər sosial ipotekadan faydalana bilərlər”
Azərbaycanda gənc ailələr üçün sosial mənzillər inşa olunaraq onların ixtiyarına verilib. Həmin mənzillər gənc ailələrə güzəştli kreditlərlə verilir. Mənzil sahibi olmaq istəyənlər güzəştli şərtlərdən bəhrələnirlər.
Lakin sosial ipotekadan özəl sektorda çalışan şəxslər yararlana bilmirlər. Dövlət sektorunda çalışanlar bu imkandan istifadə edirlər. Özəl sektorda çalışanların əməkhaqqı daha yüksək olur. Lakin onlar ipotekadan yararlana bilmirlər
Qeyd edək ki, ipoteka kreditinin, o cümlədən, güzəştli ipoteka kreditinin verilməsi qaydası Azərbaycan Respublikasının Prezidenti İlham Əliyevin 2016-cı il 22 iyun tarixli, 940 nömrəli Fərmanı ilə təsdiq edilib.
İqtisadçı-ekspert Vüqar Bayramov qeyd etdi ki, sosial ipotekadan həm dövlət, həm də özəl sektorda çalışanlar istifadə edə bilərlər: “Özəl sektorda çalışanlara ipoteka krediti verilməməsinin müəyyən səbəbləri var. Əməkhaqqının həcmi ilə yanaşı, iş yerinin daimi olması da önəmlidir. Mövcud qanunvericiliyə əsasən, sosial ipotekadan Azərbaycan vətəndaşları yararlana bilərlər. Nəzərə almaq lazımdır ki, sosial ipoteka verilən zaman güzəştli kateqoriyaya aid olunan şəxslərə şamil olunur. Kredit əldə etmək üçün müraciət edənin gərək yaşı 35-dən yuxarı olmasın. Birmənalı şəkildə güzəştli kateqoriyaya aid olan şəxslər sosial ipotekadan faydalana bilərlər”
Həmsöhbətimiz onu da vurğuladı ki, hazırda İpoteka Fondu vasitəsilə iki növ ipoteka krediti təklif olunur. Onlardan biri sosial, digəri isə adi ipoteka kreditidir. Adi ipoteka kreditlərinin maksimum faiz dərəcəsi 8-dir. Sosial ipotekada isə maksimum faiz dərəcəsi 4-dür. Kreditlər 25-30 il müddətinə verilir: “Biz sosial ipoteka üzrə kredit faizlərinin 4 faizdən 2 faizə endirilməsinin tərəfdarıyıq.
Günel CƏLİLOVA
