Fikrət Yusifov: “Manatın məzənnəsi ilə bağlı hər hansı hay-küyün heç bir əsası yoxdur” “İqtisadiyyatdakı durum, ölkənin maliyyə, valyuta rezervləri yaxşı vəziyyətdədir”
Son vaxtlar bəzi sosial şəbəkələrdə devalvasiyanın olacağı ilə bağlı fikirlər bildirilir. Belə iddialar səslənir ki, guya neftin qiymətinin oynaması, ABŞ-ın Federal Ehtiyat Sisteminin faiz dərəcələri ilə bağlı məlum qərarı Azərbaycanda devalvasiyaya təsir göstərəcək.
Bu arada Azərbaycan Mərkəzi Bankının sədri Elman Rüstəmov keçirdiyi mətbuat konfransında bəyan edib ki, Azərbayanda devalvasiya haqqında danışılanlar qeyri-ciddidir: “Bütün proqnozlar makroiqtisadi stabillik üzərində qurulub. Ötən il Azərbaycanın tədiyyə balansı profisitli olub. Azərbaycan Dövlət Neft Fondunun aktivləri 3 mlrd. dollar artıb. Cari ildə makroiqtisadi sabitliyi təmin etmək üçün istənilən qədər resurs var. 2019-ci il makroiqtisadi vəziyyət baxımından 2018-ci ilə oxşayır. İlk ildir ki, fiskal qaydalar fəaliyyət göstərir. Bu il Azərbaycan valyuta bazarına 6,8 mlrd. dollarlıq transfer daxil olacaq. Neftin qiymətinin təsiri əhəmiyyətli dərəcədə məhdudlaşdırılıb. Əsas siyasət aşağı inflyasiya, dayanıqlı məzənnə ideologiyası üzərində qurulub’’.
Belə olan halda, istər-istəməz, devalvasiyanın olacağı ilə bağlı səslənən fikirlərin əsasının olmadığı qənaəti yaranır. Onu da nəzərə almaq lazımdır ki, Azərbaycanda makroiqtisadi vəziyyət sabitdir. Bir sıra sahələrdə dinamik inkişaf müşahidə olunur və bu davamlı xarakterlidir.
Maraqlıdır, bəs ekspertlər devalvasiya ilə bağlı səslənən fikirləri necə dəyərləndirirlər?
Məsələyə münasibət bildirən iqtisad elmləri doktoru Fikrət Yusifovun sözlərinə görə, devalvasiya ilə bağlı səslənən fikirlərin heç bir əsası yoxdur. O bunu bir sıra arqumentlərlə əsaslandırdı: “İndiki vəziyyətdə manatın məzənnəsinə ciddi təsirlərin olacağı gözlənilmir. Çünki Azərbaycanda bu gün manatın ucuzlaşması üçün heç bir əsas, elə bir baza yoxdur. Eyni zamanda, devalvasiyanı yarada biləcək heç bir əsas yoxdur. Bununla bağlı konkret əmsallar var. Bu əmsallar da manata təzyiqlərin olmadığını deməyə əsas verir. Azərbaycanda makroiqtisadi vəziyyət sabitdir, neftin qiyməti sabitdir və 60 dollardan yuxarıdır. Eyni zamanda, idxal-ixrac əməliyyatları arasında yaranmış mövcud balans (müsbət saldo), makroiqtisadi göstəricilər onu deməyə əsas verir ki, manatın devalvasiyası gözlənilən deyil. Bunun üçün ciddi narahatlıq yoxdur. Yəni bütün göstəricilər manatın xeyrinədir. Belə olan halda, təbii ki, manatın məzənnəsində hər hansı bir dəyişikliyin baş verəcəyi gözlənilmir. Ümumiyyətlə, bu məsələdə dəyişiklik gözlənilmir. Müxtəlif üsullardan istifadə edərək manatın stabilliyini saxlamaq mümkündür. İqtisadiyyatdakı durum, ölkənin maliyyə, valyuta rezervləri yaxşı vəziyyətdədir. Bunların hamısı manatın sabitliyini təmin edəcək faktorlar sırasındadır. Digər yandan isə manata güclü təzyiqlər də yoxdur. Ona görə də devalvasiya ilə bağlı narahatlığın olduğunu düşünmürəm. Bütün bunların fonunda, manatın məzənnəsi ilə bağlı hər hansı hay-küyün heç bir əsası yoxdur”.
Vidadi ORDAHALLI
