Rəsul Cahangirli: “Ən azından ona görə ki, ölkə sürətli və dinamik inkişaf edir”
“Bu il ən azı 5000 məcburi köçkün ailəsi üçün evlər tikiləcək". Məlum olduğu kimi, bunu Prezident İlham Əliyev “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfransda yekun nitqində deyib.
Ölkə başçısı vurğulayıb ki, məcburi köçkünlərin problemləri daim diqqət mərkəzindədir: “Keçən il 5800 köçkün üçün evlər tikilib, o cümlədən 1000 ailə üçün özəl sektor evlər tikib. Mən bu təşəbbüsü alqışlayıram. Bu il bu proses davam etdiriləcək. İlkin hesablamalara görə, ən azı 5000 ailə üçün evlər tikiləcək, o cümlədən yenə də özəl sektorun çox ciddi payı ilə".
Onu da qeyd edək ki, ölkədə məcburi köçkünlərlə yanaşı, şəhid ailələrinin və müharibə əlillərinin sosial müdafiəsinin gücləndirilməsi istiqamətində mühüm addımlar atılır. Onların mənzil şəraitini yaxşılaşdırmaq üçün sistemli işlər görülür. Ümumilikdə, ötən dövrdə bu kateqoriyalardan olan vətəndaşlara 6650 mənzil verilib. O cümlədən, 2018-ci ildə şəhid ailələrinə və müharibə əlillərinə nəzərdə tutulduğundan 3 dəfə çox olmaqla 626 mənzil verilib. 2019-cu ildə isə həmin vətəndaşlara azı 800 mənzilin verilməsi nəzərdə tutulur. Bir sözlə, bu il məcburi köçkünlərə 5000, şəhid ailələrinə və müharibə əlillərinə 800 mənzil verilməsi nəzərdə tutulur. Maraqlıdır, bütün bunlara Azərbaycanın potensialı yetərincə çatacaqmı? Məsələyə münasibət bildirən ekspert Rəsul Cahangirlinin fikrincə, Azərbaycanın buna imkanları və potensialı çatacaq: “Ona görə ki, Azərbaycanın imkan və potensialı çoxşaxəlidir. İqtisadi inkişaf artdıqca, Azərbaycanın bu yöndə imkanları genişlənir. Məsələ ondadır ki, dövlətin hərtərəfli diqqət və qayğısı sayəsində məcburi köçkünlərin problemlərinin həlli istiqamətində məqsədyönlü iş aparılır. Belə ki, bu kateqoriyadan olan vətəndaşların mənzil-məişət şəraitinin yaxşılaşdırılması ilə bağlı bir sıra işlər görülüb. İndiyə qədər bu kateqoriyadan olan 300 min nəfərədək vətəndaş mənzillə təmin edilib. Bununla yanaşı, indiyədək məcburi köçkünlər üçün 102 yeni qəsəbə salınıb. Prezident İlham Əliyevin rəhbərliyi ilə ölkəmizdə məcburi köçkünlərin sosial problemlərinin həlli məqsədilə genişmiqyaslı tədbirlər həyata keçirilir. Zəruri infrastrukturu olan yaşayış kompleksləri, qəsəbələr tikilib istifadəyə verilir. Hər il minlərlə köçkün ailəsi yeni evlərlə, mənzillərlə təmin edilir. Həmçinin, şəhid ailələrinə və müharibə əlillərinə mənzillər verilir. Bu il sözügedən kateqoriyadan olan vətəndaşlara daha çox mənzilin veriləcəyi gözlənir. Hesab edirəm ki, Azərbaycanın imkanları nəzərdə tutulan mənzilləri inşa etməyə tam yetəcək. Ən azından ona görə ki, ölkə sürətli və dinamik inkişaf edir”.
Vidadi ORDAHALLI
