Fikrət Yusifov: “15 il ərzində üç proqramın gətirdiyi uğurlar artıq bütün dünyanın gözləri qarşısındadır”
“İlk dəfə Azərbaycan Dünya Bankının "Doing Business" hesabatında 2006-cı ildə qeyd olundu və o vaxt Azərbaycan 98-ci yerdə qərarlaşdı. Aparılan köklü islahatlar, investisiya iqliminin yaxşılaşdırılması nəticəsində son hesabatda Azərbaycan dünya miqyasında 25-ci yerdədir. Yəni bu, deməyə əsas verir ki, bundan sonra da həm daxili, həm xarici investorlar Azərbaycana böyük həcmdə sərmayə qoyacaqlar. Beləliklə, bu sərmayə imkan verəcək ki, bundan sonra da iş yerləri, yeni müəssisələr yaradılsın və ölkəmiz inamla inkişaf etsin”.
Bunu Prezident İlham Əliyev "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının yekunlarına həsr olunan konfransda giriş nitqində deyib.
Ölkə başçısının sözlərinə görə, aparılan uğurlu siyasət Azərbaycana böyük həcmdə sərmayənin yatırılmasına gətirib çıxarıb. Prezident bildirib ki, son 15 il ərzində Azərbaycan iqtisadiyyatı dünya miqyasında rekord templərlə inkişaf etmiş, ümumdaxili məhsul 3,3 dəfə artıb: “Bir daha demək istəyirəm, bu, dünya miqyasında rekord göstəricidir. Sənaye istehsalı 2,6 dəfə artmışdır. İxracımız 4,7 dəfə, valyuta ehtiyatlarımız 24 dəfə artıb və bu gün 45 milyard dollar təşkil edir”.
Prezident onu da vurğulayıb ki, aparılan uğurlu siyasət ölkəmizə böyük həcmdə vəsaitin, sərmayənin yatırılmasına gətirib çıxarıb. Ötən 15 il ərzində Azərbaycana təxminən 250 milyard dollar sərmayə qoyulub ki, bu sərmayənin yarısı xarici investisiyadır.
O da məlumdur ki, Azərbaycan nəinki "Doing Business", o cümlədən digər hesabatlarda da mövqeyini əhəmiyyətli dərəcədə yaxşılaşdırıb.
Maraqlıdır, Azərbaycan "Doing Business" hesabatında mövqeyini 98-ci yerdən 25-ci yerə qədər yaxşılaşdırmasına nəyin hesabına nail olub?
Məsələyə münasibət bildirən iqtisad elmləri doktoru Fikrət Yusifov bunu bir sıra amillərlə, əsasən də ölkədə aparılan islahatlarla əlaqələndirdi: “Əldə edilən bu uğurlar barəsində dünyanın ən mötəbər maliyyə institutları və reytinq agentlikləri danışır. Dünya Bankı kimi mötəbər bir maliyyə institutunun “Doing Business” hesabatında 2006-cı ildə 98-ci sırada yer almış Azərbaycan, bu sırada 73 pillə irəliləyərək bu gün 25-ci yerdə qərarlaşıb. On iki il ərzində belə bir mötəbər qurumun reytinq cədvəlində bu qədər irəliləmək ölkədə aparılan köklü islahatların və investisiya mühitinin əsaslı şəkildə yaxşılaşdırılmasının məntiqi nəticəsi kimi dəyərləndirilməlidir. Regionların sosial-iqtisadi inkişafını əhatə edən bu beşillik dövlət proqramlarının müəllifi də məhz cənab Prezident İlham Əliyevdir. Onun 2003-cü ildə prezident seçkiləri öncəsi səsləndirdiyi fikirlər içərisində əsas olanlardan biri də xalqın ona etimad göstərəcəyi təqdirdə bölgələrin sosial-iqtisadi inkişafının təmin edilməsi məqsədilə atacağı addımlar barəsindəki bəyanatları idi. Prezident xalqın iradəsi ilə seçkilərdə qalib gəldikdən sonra öz sözünü tutdu. 15 il ərzində üç proqramın gətirdiyi uğurlar artıq bütün dünyanın gözləri qarşısındadır. Ötən 15 il ərzində iqtisadiyyatımız 3,3 dəfə, sənaye istehsalı 2,6 dəfə, ixracımız 4,7 dəfə, valyuta ehtiyatlarımız 24 dəfə arta bilib. Bunlar olduqca ciddi nailiyyətdir. Bir ölkənin iqtisadiyyatının 15 ildə 3,3 dəfə artması isə dünyada bənzəri olmayan bir nəticədir.
Azərbaycan bu islahatları aparmasaydı və bu islahatlarla özünü bütün dünyaya islahatçı bir ölkə kimi tanıtmasaydı, onun iqtisadiyyatına heç bir xarici investor yatırım etməzdi. Son 15 ildə, bütövlükdə, Azərbaycana təxminən 250 milyard dollar sərmayə yatırılıb. Bu sərmayənin tən yarısı xarici sərmayədir. Bu illər ərzində Azərbaycana edilmiş yatırımların həcmi yerləşdiyimiz Cənubi Qafqaz regionunda bizə qonşu olan iki ölkənin – Gürcüstan və Ermənistanın 15 illik dövlət büdcəsindən 2,4 dəfə çoxdur”.
Vidadi ORDAHALLI
