Azər Badamov: “… hədəflərin icrası Azərbaycanı dünyanın ən inkişaf etmiş ölkələri sırasına daxil edəcək”
Məlum olduğu kimi, Prezident İlham Əliyev “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın təsdiq edilməsi haqqında Fərman imzalayıb. Fərmana əsasən, Azərbaycan Respublikası regionlarının inkişafı ölkədə uğurla həyata keçirilən davamlı sosial-iqtisadi inkişaf strategiyasının mühüm tərkib hissəsidir.
Regionların inkişafı sahəsində qəbul edilmiş və uğurla həyata keçirilmiş dövlət proqramlarında, habelə regionların sosial-iqtisadi inkişafına dair əlavə tədbirlərlə bağlı sərəncamlarda nəzərdə tutulmuş vəzifələrin icrası ölkədə qeyri-neft sektorunun davamlı inkişafına, regionlarda kommunal xidmətlərin və sosial infrastruktur təminatının keyfiyyətinin yüksəldilməsinə, sahibkarlıq mühitinin daha da yaxşılaşdırılmasına, investisiya qoyuluşunun artmasına, yeni müəssisələrin, iş yerlərinin açılmasına və nəticədə əhalinin məşğulluğunun artırılmasına və yoxsulluq səviyyəsinin azaldılmasına təkan verib.
Regionların sosial-iqtisadi inkişafı ilə bağlı imzalanan növbəti Dövlət Proqramının əhəmiyyəti haqqında danışan millət vəkili Azər Badamov qeyd etdi ki, indiyə qədər icra olunan hər üç proqram Azərbaycanın sosial-iqtisadi, ictimai-siyasi inkişafına böyük dəyişikliklər və inkişaf gətirib. Millət vəkili Azərbaycanın son 15 il ərzində çox uğurla inkişaf etdiyini qeyd edib: “Bütövlükdə, indiyə qədər regionların sosial-iqtisadi inkişafı ilə bağlı icra olunan hər üç proqram Azərbaycanın sosial-iqtisadi, ictimai-siyasi inkişafına böyük dəyişikliklər gətirib. 2004-cü illə müqayisədə bu gün artıq yeni bir Azərbaycan formalaşıb. Bu illər ərzində ölkəmizdə 15 min kilometrə yaxın avtomobil yolu tikilib. 400 meqavat gücündə olan “Şimal 2” stansiyasının açılışı gözlənir ki, bu da ölkəmizi daha da irəliyə aparacaq. Regionların qazlaşdırılması 50 faizdən 95 faizə qalxıb, içməli su, kanalizasiya xidmətləri və enerji təminatı ilə bağlı məsələlər həllini tapıb. Bundan başqa, ölkənin hər bir nöqtəsi müasir elektron-rabitə xidməti sisteminə keçib. Ən əsası isə, son 15 ildə Azərbaycanın sənaye potensialı 2,6, valyuta ehtiyatları isə 24 dəfə artıb. Bütün bunlar ondan xəbər verir ki, Azərbaycanda regionların ümumi vəziyyəti artıq inkişaf etmiş ölkələrin səviyyəsinə çatır”.
Millət vəkili onu da vurğuladı ki, regionların sosial-iqtisadi inkişafı ilə bağlı dördüncü proqramın həyata keçirilməsinə artıq start verilib: “Belə ki, sosial infrastrukturun yaradılması prosesi davam etdiriləcək. Bu il ən azı 5000 məcburi köçkün ailəsi üçün evlər tikiləcək və 7 min ailə özünüməşğulluq proqramı ilə əhatə olunacaq. Regionların inkişafı ilə bağlı dördüncü proqramın başa çatdırılması və müəyyən olunan hədəflərin icrası Azərbaycanı dünyanın ən inkişaf etmiş ölkələri sırasına daxil edəcək”.
Günel CƏLİLOVA
