Musa Quliyev: “Azərbaycanın sosial-iqtisadi mənzərəsi yaxşılığa doğru dəyişib, ölkəmiz inkişaf edib, qüdrətlənib”
Yanvarın 29-da Prezident İlham Əliyevin iştirakı ilə Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfrans keçirilib.
Məlum olduğu kimi, sözügedən Dövlət Proqramı regionların sosial-iqtisadi həyatının inkişafında mühüm rol oynayıb. Proqramın qəbul edildiyi illər ərzində bölgələrdə bir sıra yeni xəstəxanalar, tibb mərkəzləri, məktəblər inşa edilib, bəziləri isə əsaslı şəkildə təmir olunub.
Bölgələrdə yeni məktəb və xəstəxana binalarının, eləcə də digər sosial obyektlərin inşa edilməsi “Regionların 2014-2018-ci illərdə sosial-iqtisadi inkişafı Dövlət Proqramı”nın icrasında nə dərəcədə rol oynayıb?
Millət vəkili Musa Quliyev “Bakı-Xəbər”ə bildirdi ki, bu Dövlət Proqramı son 4 ildə, müsbət mənada, regionların sosial-iqtisadi həyatını dəyib. “Regionların 2014-2018-ci illərdə sosial-iqtisadi inkişafı Dövlət Proqramı”nın yekunlarına dair keçirilən konfransda cənab Prezident 3 Dövlət Proqramının icrasına yekun vurdu və növbəti qəbul ediləcək 4-cü “2019-2023-cü illərdə regionların sosial-iqtisadi inkişafı Dövlət Proqramı”na dair öz fikir və tövsiyələrini bildirdi. Prezident vurğuladı ki, 2004-cü ildən bu yana qəbul edilən Dövlət Proqramının icrası nəticəsində Azərbaycanın sosial-iqtisadi mənzərəsi yaxşılığa doğru dəyişib, ölkəmiz inkişaf edib, qüdrətlənib. Bu illər ərzində ölkə iqtisadiyyatına 250 milyard dollardan çox investisiya qoyulub, ümumdaxili məhsulumuz 3,3 dəfə artıb, sənaye potensialımız 2,6 dəfə artıb və ixrac potensialımız 4 dəfədən çox yüksəlib. Eyni zamanda, cənab Prezident qeyd etdi ki, görülən işlər nəticəsində Azərbaycanın valyuta ehtiyatları 24 dəfə yüksəlib. Azərbaycanın bu nailiyyəti beynəlxalq ictimaiyyət tərəfindən də yüksək qiymətləndirilir”.
M.Quliyev vurğuladı ki, sözügedən Dövlət Proqramının qəbul edildiyi vaxtdan indiyə qədər ölkəmizin sosial həyatında da bir sıra uğurlara nail olunub. “Bu dövr ərzində ölkəmizin sosial həyatında da böyük uğurlar əldə olunub. Bu Dövlət Proqramı sosial sahədə də qarşıya qoyulan hədəflərin təmin edilməsində əhəmiyyətli rol oynayıb.
2 milyondan çox yeni iş yeri açılıb, 640 xəstəxana, bütövlükdə götürsək, tibb müəssisəsi təmir edilib, yaxud yeniləri tikilib. Bu müəssisələr müasir texnologiyalarla təchiz edilərək vətəndaşlarımızın ixtiyarına verilib. Həmçinin, bu illər ərzində 3200-dən artıq məktəb tikilib, yaxud əsaslı təmir olunub. 15 min kilometr yol çəkilib və demək olar ki, Azərbaycanın nəinki rayonlarında, hətta kəndlərində belə yol infrastrukturu müasir standartlar səviyyəsindədir. Bu da vətəndaşlarımızın rahatlığını tamamilə təmin edir. Eyni zamanda, bu illər ərzində əhalinin aztəminatlı təbəqəsinə diqqət artırlıb və pensiya, müavinət, ortaq aylıq əməkhaqqı dəfələrlə artırılıb, qaçqın və məcburi köçkünlərin məskunlaşması təmin edilib” - deyə M.Quliyev qeyd etdi.
Yeni qəbul edilən Dövlət Proqramının qarşıya qoyduğu hədəflərdən danışan M.Quliyev qeyd etdi ki, bu proqramda da regionların sosial-iqtisadi inkişafı əsas hədəf kimi götürülüb. “Cənab Prezident, həmçinin, qeyd etdi ki, qarşıdakı 5 il ərzindəki 4-cü Dövlət Proqramının icrası nəticəsində Azərbaycan daha güclü, daha qüdrətli bir dövlətə çevriləcək. “Regionların 2014-2018-ci illərdə sosial-iqtisadi inkişafı Dövlət Proqramı”nın icrası qarşıya qoyulan hədəfləri təmin edib. Ümumiyyətlə, indiyə qədər qəbul edilən hər 3 Dövlət Proqramı ən yüksək səviyyədə yerinə yetirilib. 4-cü Dövlət Proqramının da icrasına artıq start verilir” - deyə M.Quliyev bildirdi.
İradə SARIYEVA
