Məhərrəm Zülfüqarlı: “Bütün bunlar ölkənin siyasi, iqtisadi təhlükəsizliyinin daha da möhkəmlənməsinə öz müsbət təsirini göstərir”
Yanvarın 29-da “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfrans keçirilib. Prezident İlham Əliyev konfransda iştirak edib. Dövlət başçısı konfransda giriş nitqi söyləyib. Onun fikrincə, sözügedən proqram uğurla yerinə yetirilib.
Məlumat üçün qeyd edək ki, “Regionların 2014-2018-ci illərdə sosial-iqtisadi inkişafı Dövlət Proqramı” çərçivəsində 24,2 mlrd. manat investisiya qoyuluşu həyata keçirilib. Ölkədə sahibkarlığın dəstəklənməsi, startap, mikro və kiçik sahibkarlığın inkişafı üçün xeyli iş görülüb. Kənd təsərrüfatı məhsulları istehsalçıları vergidən azad olunub. Tez xarab olan aqrar məhsulların daha tez ixrac edilməsi üçün “Yaşıl dəhliz” mexanizmi həyata keçirilib. Bu illər ərzində Azərbaycandan 24 ölkəyə ixrac missiyası təşkil edilib. Bu missiyalar çərçivəsində 104,2 milyon manatlıq məhsul ixrac edilib və s.
Bir sözlə, “Regionların 2014-2018-ci illərdə sosial iqtisadi inkişafı Dövlət Proqramı”nın uğurla icra olunması Azərbaycanın dünyada və regionda risqli proseslərdən qorunmasında necə rol oynadı?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının fikrincə, proqram çərçivəsində bir sıra kompleks tədbirlərin görülməsi Azərbaycanı dünyadakı risqlərdən qorudu: “Nəzərə almaq lazımdır ki, son illər dünyanın istər siyasi, istərsə də iqtisadi müstəvisində bir sıra təbəddülatlar yaşanır. Bu təbəddülatlar, öz növbəsində, müəyyən risqlərin yaranmasına şərait yaradır. Azərbaycan uğurlu balanslaşdırılmış siyasət yeritməklə bu kimi risqlərdən özünü qoruyur. Xüsusən də dövlət sifarişi ilə həyata keçirilən bir sıra layihələr həm iqtisadi inkişafa təkan verir, həm də ölkədə makroiqtisadi sabitliyin təmin olunmasına öz töhfəsini verir. Ən başlıcası isə, bu, məşğulluğun təmin edilməsinə müsbət təsir göstərir. Bu baxımdan, regionların inkişafına dair proqramların əhəmiyyəti böyükdür. Sözügedən proqramların həyata keçirilməsi nəticəsində regionlar inkişaf edib. Bölgələrdə istehsal və xidmət sahələri açılıb. Bütün bunların nəticəsində çoxsaylı iş yeri açılıb, əhalinin bölgələrdən iş dalınca paytaxta və digər yerlərə axını azalıb. Bu baxımdan, “Regionların 2014-2018-ci illərdə sosial-iqtisadi inkişafı Dövlət Proqramı” çərçivəsində ölkədə böyük işlər görülüb. Bütün bunlar Azərbaycanın siyasi, iqtisadi təhlükəsizliyinin daha da möhkəmlənməsinə öz müsbət təsirini göstərir”.
Vidadi ORDAHALLI
