Rəsul Cahangirli: “Son 15 ildə qəbul olunan bir sıra proqramlar ciddi nəticələrin əldə olunmasına öz müsbət təsirini göstərib”
İqtisadi inkişafa ona görə nail olmaq istəyirik ki, sosial məsələləri daha genişmiqyaslı həll edək, vətəndaşlarımız daha da yaxşı yaşasın. Məlum olduğu kimi, bunu Prezident İlham Əliyev Prezident Sarayında şəhid ailələri ilə görüşündə çıxışı zamanı deyib.
Prezident vurğulayıb ki, sosial məsələlərin həlli prioritetdir: “Ancaq bu məsələlərin həllinə nail olmaq üçün güclü iqtisadiyyat olmalıdır. Ona görə iqtisadi inkişaf bundan sonra da elə olmalıdır ki, sosial layihələri icra etməyə imkan versin.
Çünki biz iqtisadi inkişafa ona görə nail olmaq istəyirik ki, sosial məsələləri daha genişmiqyaslı həll edək və vətəndaşlarımız daha da yaxşı yaşasınlar. Ağır vəziyyətdə yaşayan vətəndaşlara biz imkan daxilində kömək göstəririk. Biz evini, eşiyini, torpağını itirmiş vətəndaşlar üçün şəhərciklər salırıq, evlər tikirik, onlara mənzillər veririk. Bu gün hələ də öz maddi imkanlarını lazımi səviyyədə təmin edə bilməyən vətəndaşlara dövlət tərəfindən ünvanlı sosial yardım göstərilir”.
O da məlumdur ki, Azərbaycanda həyata keçirilən sosial-iqtisadi siyasətin təməlində sosialyönümlülük dayanır. İqtisadi inkişaf tempi və modelinə görə dünyanın diqqət mərkəzində olan Azərbaycan sosial dövlət kimi xarakterizə olunur. Prezident İlham Əliyev dəfələrlə bəyan edib ki, ölkədə həyata keçirilən siyasətin mərkəzində Azərbaycan vətəndaşı dayanır və ona görə də sosial məsələlərin həlli daim diqqət mərkəzindədir. Son 15 il ərzində sosial məsələlərin həllinə çox böyük diqqət göstərilib. Nəticədə maaşlar təxminən 7 dəfə, pensiyalar 10 dəfədən çox artırılıb. Ötən illər ərzində 3100-dən çox məktəb, 640-dan artıq xəstəxana tikilib və ya təmir edilərək vətəndaşların istifadəsinə verilib. Bütün bunlar Azərbaycanın uğurlu iqtisadi inkişaf modeli nəticəsində əldə olunub.
Sözügedən məsələni dəyərləndirən ekspert Rəsul Cahangirlinin fikrincə, iqtisadi sahədə əldə olunan nailiyyətlər sosial problemlərin həllini əhəmiyyətli dərəcədə sürətləndirib: “Son 15 ildə qəbul olunan bir sıra proqramlar ciddi nəticələrin əldə olunmasına öz müsbət təsirini göstərib. Belə ki, həyata keçirilən tədbirlər sayəsində son 15 ildə yoxsulluq təxminən 50 faizdən 5,4 faizə düşüb. Bununla belə, işsizlik ölkədə 5 faiz səviyyəsinə enib. Vətəndaşların sağlamlığının qorunması üçün hər il təxminən 5 milyona yaxın insanın dövlət xətti ilə pulsuz tibbi müayinədən keçirilməsi təşkil edilib. İndiyə qədər ölkədə 2 milyona yaxın daimi yeni iş yerləri yaradılıb. Təkcə ötən il isə yeni yaradılan daimi iş yerlərinin sayı 118 min olub. Bütün bu faktlar bir daha onu deməyə əsas verir ki, Azərbaycanda sosial siyasət daim diqqət mərkəzində saxlanır. Məhz bu səbəbdən hər il dövlət büdcəsində sözügedən sahəyə ayrılan vəsaitin həcmi artırılır. Bütün beynəlxalq təşkilatlar da Azərbaycanın bu sahədəki fəaliyyətini, sosial siyasətini dünya dövlətlərinə nümunə kimi göstərirlər. Azərbaycanın uğurlu iqtisadi inkişaf modelinin kökündə o dayanır ki, iqtisadi sahədə əldə olunan nailiyyətlər sosial sferada əldə olunan müsbət göstəriciləri artırır. Bu da əhalinin rifah halının daha da yaxşılaşmasına xidmət edir”.
Vidadi ORDAHALLI
