Rüfət Quliyev: “Özünüməşğulluq proqramının əhatə dairəsi ilbəil daha da artırılacaq, bu proqrama qoşulanların sayı çox olacaq”
Məlum olduğu kimi, yanvarın 28-də Prezident İlham Əliyev şəhid ailələrilə görüşdə bu statusu daşıyan ailələrin sosial müdafiəsinin gücləndirilməsi məsələsilə yanaşı, həm də ölkə əhalisinin özünüməşğulluqla təmin edilməsindən danışıb.
Bu il 7 min ailənin özünüməşğulluq proqramı ilə əhatə olunacağını deyən Prezident İlham Əliyev qeyd edib ki, Azərbaycan dünya miqyasında ünvanlı sosial yardım proqramının çox geniş miqyas aldığı nadir ölkələrdəndir. “Biz indi hələ ki, işlə özünü təmin edə bilməyən vətəndaşlar üçün yeni imkanlar axtarırıq, tapırıq, özünüməşğulluq proqramı artıq geniş vüsət alacaqdır. Təkcə bu il 7 min ailə özünüməşğulluq proqramı ilə əhatə olunacaq. Nəyə görə? Çünki imkanı olmayan ailələr dövlət tərəfindən xüsusi vasitələrlə təmin olunsunlar ki, onlar özləri üçün kiçik biznes qura bilsinlər” - deyə ölkə başçısı vurğulayıb.
Millət vəkili Rüfət Quliyev “Bakı-Xəbər”ə bildirdi ki, bu il 7 min ailənin özünüməşğulluq proqramı ilə əhatə olunması olduqca əhəmiyyətli məsələdir. Azərbaycan dövlətinin sosial siyasətində əhalinin məşğulluqla təmin edilməsinin əsas hədəflərdən biri olduğunu deyən R.Quliyev özünüməşğulluq proqramının da bu məqsədə xidmət etdiyini vurğuladı. “7 min ailənin məşğulluq proqramı ilə əhatə olunması o deməkdir ki, hər bir ailə, hər ailədə də təxmini 4 nəfər olmaqla 28 min adam işlə təmin olunacaq. Özünüməşğulluq dövlətin çox maraqlı və faydalı bir proqramıdır. Proqramın əsas qayəsi odur ki, insanlar ölkədə mikrobizneslə məşğul olmağın mümkünlüyünü və vacibliyini bilsinlər. Bu, əhaliyə dövlət dəstəyidir. Maraqlı cəhətlərdən biri budur ki, burada aktivlər pul formasında verilməyəcək, başqa şəkildə veriləcək. Yəni özünüməşğulluq proqramına qoşulmaq istəyən insanlara iri və xırda buynuzlu heyvanlar, kiçik sexlər və s. veriləcək. İnsanlar bunlarla məşğul olub öz ailələrini dolandıra biləcəklər. Bildiyim qədər, özünüməşğulluq proqramının əhatə dairəsi ilbəil daha da artırılacaq, bu proqrama qoşulanların sayı çox olacaq. Mənim özümün də SBS kanalında “Sahibkar saatı” adlı proqramım var və vaxtaşırı olaraq özünüməşğulluq proqramı ilə bağlı mövzular müzakirə edirik. Əmək və Əhalinin Sosial Müdafiəsi Nazirliyi hər zaman bu məsələdə bizə dəstək olur və qurum əməkdaşları proqrama qatılırlar. Bir iqtisadçı kimi qeyd etmək istəyirəm ki, özünüməşğulluq proqramının faydası və uğuru əhalidə öz gücünə inam formalaşdırmasıdır. Bu gün insanları özünüməşğulluq proqramına hazırlayırlar. Bunun üçün xüsusi treninqlər təşkil edilir, insanlar istədiyi layihələrə baxır və seçim edirlər. Təbii ki, hələlik bu proqramı hamıya tətbiq etmək mümkün deyil. Bu bir pilot layihədir” - deyə bildirən R.Quliyev bu layihənin digər tərəfini də qeyd etdi. O vurğuladı ki, özünüməşğulluq proqramı insanlara təkan, stimul verir.
R.Quliyevin bildirdiyinə görə, bu, əhalinin mikro sahibkarlığa maraq göstərməsinə və bu sahə ilə həvəslə məşğul olmasına şərait yaradacaq. Onun dediyinə görə, özünüməşğulluq proqramında uğurla iştirak edən ailə müəyyən bir vaxtdan sonra sahibkara çevrilə bilər. O dedi ki, bu layhə əsasən regionlar üçün nəzərdə tutulur. “Bunu bölgələrdə insanların kiçik sahibkarlığa qayıdışı hesab etmək olar. Ümumiyyətlə, Azərbaycan xalqının özünəməxsus bir işgüzarlığı var. Bu hələ Sovet dövründə də özünü göstərirdi. Bizdə həmişə insanlar təsərrüfata maraq göstərib, həyətyanı sahələrində meyvə-tərəvəz yetişdirib, iri və xırda buynuzlu heyvanlar, toyuq-cücə saxlayıblar. Sözümün canı odur ki, xalqımız zəhmətsevər və işgüzardır. Bu proqram da insanların əməyini stimullaşdırır. Bu həm də başqa insanlarda da bu sahəyə marağı artıracaq. Bir nəfər görəndə ki qonşusu bu sahə ilə məşğul olub uğur qazanıb, o da bu işə meyl göstərəcək. Bildiyim qədər, ildən-ilə özünüməşğulluq proqramına vəsait də artırılacaq, bu sahəyə maraq göstərən insanların sayı da artacaq. Ancaq bu, təkanverici bir layihədir. Təbii ki, bütün əhalini özünüməşğulluq proqramı ilə təmin etmək mümkün deyil. Lakin bu tədricən artdıqca öz müsbət effektini verir. Məlumatıma görə, hələ indiyə qədər bu layihədə iştirak edən ailələrin heç birinin bu işdən imtina etməsi, onlara verilənləri qaytarması, yaxud da nədənsə narazılıq etməsi hallarına rast gəlinməyib. Bu layihə kənd təsərrüfatı ilə məşğul olanlar üçün maraqlıdır. Bu, insanların torpağa marağının artmasına gətirib çıxarır və onlar da sahibkarlıqla məşğul olurlar” - deyə millət vəkili bildirdi.
İradə SARIYEVA
