Seyid Camal Əzimbəyli: “Struktur islahatları nə qədər vacibdirsə, vətəndaşların işsiz qalmaması da bir o qədər vacibdir”
“Kənd təsərrüfatında heç bir ixtisar gözlənilmir və digər strukturlara da tapşırılıb ki, islahatlar ixtisarlara gətirib çıxarmasın”. Məlum olduğu kimi, bu sözləri Prezident İlham Əliyev Sabunçu rayonunun Pirşağı qəsəbəsində Kənd Təsərrüfatı Nazirliyinin əsaslı şəkildə yenidən qurulan Tərəvəzçilik Elmi-Tədqiqat İnstitutunun və “Kartof və tərəvəz toxumları istehsalı” kompleksinin açılışında aqrar inkişaf könüllülərinin bir qrupu ilə görüşü zamanı deyib.
Ölkə başçısının sözlərinə görə, hazırda Kənd Təsərrüfatı Nazirliyində və digər dövlət qurumlarında struktur islahatları aparılır. Bu islahatların bir məqsədi var ki, biz işimizi daha da yüksək səviyyədə quraq: “Onu da bildirməliyəm ki, mövcud strukturlarda, ixtisar olunan strukturlarda çalışan vətəndaşlar işlə təmin olunacaqlar. Kənd təsərrüfatında heç bir ixtisar gözlənilmir və digər strukturlara da tapşırılıb ki, islahatlar ixtisarlara gətirib çıxarmasın. Yəni o müəssisələrdə, o xidmətlərdə, agentliklərdə çalışan vətəndaşlar bilsinlər ki, onların məşğulluğu daim diqqət mərkəzindədir”.
Prezident İlham Əliyevin sözügedən məsələdə sərgilədiyi mövqe Azərbaycanın sosial dövlət olduğunu bir daha göstərdi. Məsələ ondadır ki, adətən bu kimi islahatlar digər ölkələrdə çoxsaylı işsizlər ordusunun yaranmasına səbəb olur. Bu da, öz növbəsində, sosial narazılıqlara gətirib çıxarır. Azərbaycanda isə bu proses ağrısız həyata keçirilir. Məlum açıqlama göstərdi ki, bir sıra qurumların ləğvi, birləşdirilməsi iş yerlərində ixtisarlara gətirib çıxarmayacaq.
Ümumilikdə, ekspertlər bunu necə dəyərləndirirlər?
Məsələyə münasibət bildirən şərqşünas Seyid Camal Əzimbəylinin sözlərinə görə, bu, Prezident İlham Əliyevin hər zaman xalqın mənafeyindən çıxış etməsinin göstəricisidir: “Prezidentin sözügedən məsələdə sərgilədiyi mövqe onu göstərir ki, aparılan struktur islahatları iş yerlərinin ixtisarına gətirib çıxarmayacaq. Yəni bəzi qurumların fəaliyyəti dayandırılsa da, orada işləyənlər işsiz qalmayacaqlar. Onlar müvafiq yerlərdə işlə təmin olunacaqlar. Hesab edirəm ki, bu cür rasional yanaşma cəmiyyətdə çox müsbət effekt verəcək. Bunun sayəsində vətəndaşlar işsiz qalmayacaqlar. Struktur islahatları nə qədər vacibdirsə, vətəndaşların işsiz qalmaması da bir o qədər vacibdir. Düşünürəm ki, Azərbaycanda həyata keçirilən kompleks xarakterli struktur islahatları ölkənin inkişafını daha da sürətləndirəcək. Bu islahatlar həm dövlətin yükünü azaldacaq, həm də idarəçiliyin daha dinamik və çevik təşkil olunmasına öz töhfəsini verəcək. Eyni zamanda, ölkədə sabitliyin qorunub saxlanmasında mühüm rol oynayacaq. Bu baxımdan, aparılan islahatlara müsbət prizmadan yanaşıram”.
Vidadi ORDAHALLI
