“Azərbaycanda islahatlar aparılmaqla yanaşı, xarici şirkətlərin qoyduqları sərmayələrə dövlət zəmanəti də var”
Məlum olduğu kimi, Davosda 49-cu Dünya İqtisadi Forumu keçirilib. Qeyd edək ki, sözügedən forum hər il keçirilir və burada ölkələrin siyasi liderləri iştirak edirlər. İlk dövrlərdə Avropa İdarəetmə Forumu olaraq tanınan forum avropalı iş adamlarının ABŞ-da biznes həyatına uyğunlaşmalarını asanlaşdırmaq və Amerika üsullu kapitalizmin qaydalarını avropalılara öyrətmək məqsədini daşıyan seminarlar silsiləsi idi. 1970-ci illərin ikinci yarısından etibarən bu tədbirdə məşhur iqtisadçı, biznesmen və siyasətçilərin bir araya gəlməsi onu əhəmiyyətli dünya məsələlərinin müzakirə edildiyi platformaya çevirdi.
Hazırda dövlət-özəl tərəfdaşlığına çalışan Dünya İqtisadi Forumu müstəqil və tərəfsiz beynəlxalq ictimai təşkilatdır. İllik toplantılarda bütün sektorları təmsil edən iştirakçılar həllərə yönəlmiş müzakirələr aparırlar. Beynəlxalq medianın iştirakı, televiziya və veb-yayımları sayəsində Davos İqtisadi Forumu geniş ictimaiyyətin diqqət mərkəzində olur.
Üç gün keçirilən 49-cu forumda Prezident İlham Əliyev də iştirak etdi və tədbir çərçivəsində çoxsaylı uğurlu görüşlər keçirdi. Diqqətçəkən məqamlardan biri o oldu ki, Prezidentin Davosda görüşdüyü şirkət rəhbərləri Azərbaycanda aparılan islahatları, iqtisadi maliyyə sabitliyini xüsusi qeyd etdilər.
Məsələn, Prezident İlham Əliyev Davosda “CISCO” şirkətinin icraçı vitse-prezidenti və satış rəhbəri xanım Gerri Elliottla görüşüb. Görüşdə Gerri Elliott bildirib ki, hər bir dövlətin inkişafı üçün lazım olan üç əsas istiqaməti Azərbaycanda müşahidə edir.
Bununla yanaşı, “Procter and Gamble” şirkətinin rəhbəri Loik Tassel bildirib ki, şirkəti Azərbaycanda yaranmış biznes mühitindən istifadə edərək regionda fəaliyyətini genişləndirmək istəyir. Onun fikrincə, Azərbaycandakı mövcud biznes mühiti bu şirkətin regional mərkəz kimi Bakını seçməsinə səbəb olub.
Bir sözlə, Prezident İlham Əliyevin Davosda görüşdüyü şirkət rəhbərləri Azərbaycanda aparılan islahatları, iqtisadi-maliyyə sabitliyini xüsusi qeyd etdilər. Bu vəziyyətin uzun müddət dəyişməz qalacağına o şirkətlərdə inam nəyin əsasında yaranıb, niyə bu qədər arxayındırlar?
Məsələyə münasibət bildirən iqtisadçı-alim Əli Əlirzayevin sözlərinə görə, dünyadakı aparıcı şirkətlər Azərbaycanda aparılan kompleks islahatların fərqindədirlər: “Onlar əmindirlər ki, ölkə rəhbərliyi islahatları davamlı şəkildə aparmaqda qərarlıdır. Davosda toplaşan şirkətlər dünyanın iqtisadi mənzərəsinə yön verirlər. Azərbaycanda islahatlar aparılmaqla yanaşı, xarici şirkətlərin qoyduqları sərmayələrə dövlət zəmanəti də var. Ona görə də xarici şirkətlərlə Azərbaycan dövləti arasında sağlam münasibətlər var. Nəzərə almaq lazımdır ki, Prezident İlham Əliyev iqtisadiyyatı çox yaxşı bilir. Xarici şirkətlər bu amilin də fərqindədirlər. Ölkə başçısının sanballı çıxışları xarici şirkətlərin Azərbaycana inamını daha da artırır. Ölkədə sistemli və geniş islahatlar keçirilir. İslahatların müsbət tərəflərini tutarlı faktlarla ölkə başçısı dünya şirkətlərinə bəyan etdi. Məsələn, “Bir kəmər, bir yol” layihəsi barəsində ətraflı məlumat verdi. Bu o deməkdir ki, vahid bir yol olacaq. Sözügedən vahid sistemdə bütün ölkələrin ixrac payına görə aldığı haqlar düzgün olacaq və s. Bütün bunlar həm elmi, həm də praktiki cəhətdən əsaslandırılıb. Prezidentin çıxışı bir qarant, bir təminatdır. Ona görə də şirkətlər bütün bunlarla maraqlanırlar və hesab edirlər ki, ayrı-ayrı şirkətlərlə yox, dövlətlə danışıqları aparmaq lazımdır. Bütün bu görülən işlərin kökündə Prezident İlham Əliyevin rəhbərliyi ilə aparılan islahatlar dayanır. Aydın məsələdir ki, islahatların aparılması zamanı ortaya müəyyən problemlər çıxa bilər. Bu da təbiidir. Reallıq ondan ibarətdir ki, Azərbaycanda aparılan islahatlar dünyada maraqla izlənir. Şirkətlər bu yöndə ölkəmizdə gedən prosesləri izləyir və dəyərləndirirlər. Bu səbəbdən ölkəmizlə geniş əlaqələr qurmaqda maraqlıdırlar”.
Vidadi ORDAHALLI
