Elçin Quliyev: “Elektrik enerjisinə olan tələbatın yerli istehsal hesabına ödənilməsinə nail olunmaqla ölkəmiz enerji ixracatçısına çevrilib” İlham Şaban: “Azərbaycan elektrik enerjisi ixracı potensialını bir neçə dəfə artırmaq qabiliyyətinə malikdir”
Enerji təhlükəsizliyi hər bir ölkənin milli təhlükəsizliyinin mühüm tərkib hissələrindən biri kimi dəyərləndirilir. Azərbaycanda enerji təhlükəsizliyinin tam təmin edilməsi üçün daim müxtəlif tədbirlər görülüb, böyük layihələr həyata keçirilib.
Əhalinin və iqtisadiyyatın elektrik enerjisinə olan tələbatı tam şəkildə ödənildiyi üçün, yaranmış əlavə istehsal potensialı region ölkələrinə sərf edilir. Belə ki, elektrik enerjisi qonşu ölkələrə ixrac edilir ki, bu da respublikanın iqtisadiyyatı üçün mühüm əhəmiyyətə malikdir.
Prezident İlham Əliyev Davosda Çinin CGTN (China Global Television Network) kanalına müsahibə verərkən qeyd edib ki, biz əsasən elektrik enerjisinin istehsalına sərmayə yatırdıq və elektrik enerjisi idxal edən ölkədən elektrik enerjisi ixrac edən ölkəyə çevrildik və bundan çoxlu qazanc götürmüşük.
Azərbaycanın elektrik enerjisi idxal edən ölkədən ixrac edən ölkəyə çevrilməsi barədə fikir bildirən millət vəkili Elçin Quliyev “Bakı-Xəbər”ə açıqlamasında qeyd etdi ki, son illər Azərbaycan enerji təhlükəsizliyini təmin edib və ölkəmiz bu gün həm regionun, həm də Avropanın enerji təhlükəsizliyində fəal iştirakçıya çevrilib: “Uğurla aparılan sənayeləşmə siyasəti çərçivəsində yeni sənaye müəssisələri, texnoparklar, fabriklər, zavodlar açılır, iri infrastruktur layihələri icra olunur ki, bu da, öz növbəsində, enerjiyə olan tələbatı artırır. Artan tələbatın ödənilməsi məqsədilə təkcə son beş il ərzində Azərbaycanda onlarla elektrik stansiyası tikilib.
Statistik məlumatlara əsasən, ötən ildə respublikada ümumi elektrik enerjisi istehsalı 25256,1 mln. kilovat/saat, elektrik enerjisinin istehlakı isə 23939,5 mln. kilovat/saat təşkil edib. Bir sıra generasiya güclərinin istismara verilməsi nəticəsində elektrik enerjisi istehsalı istehlakdan çox olub ki, bu da ölkəmizin bu sahədə ixrac potensialını daha da artırıb. Belə ki, Azərbaycanda elektrik enerjisinin ixracı təqribən 1.5 mlrd. kilovat/saat olmaqla, 2017-ci illə müqayisədə 200 mln. kilovat/saatadək artıb. Eyni zamanda, alternativ və bərpa olunan enerji mənbələrinin istifadəsinin genişləndirilməsi üçün zəruri işlərə başlanıb. Eksperimental Poliqonu istifadəyə verilib və hibrid tipli müasir günəş və külək elektrik stansiyası quraşdırılıb. Beləliklə, elektrik enerjisinə olan tələbatın yerli istehsal hesabına ödənilməsinə nail olunub və ölkəmiz enerji ixracatçısına çevrilib. Bütövlükdə, elektrik enerjisinə olan tələbatın yerli istehsal hesabına ödənilməsinə nail olunmaqla ölkəmiz enerji ixracatçısına çevrilib”.
İqtisadçı-ekspert İlham Şaban “Bakı-Xəbər”ə açıqlamasında qeyd etdi ki, 2018-ci ilin nəticələrinə əsasən, Azərbaycan 1 milyard kilovat/saatdan artıq elektrik enerjisini ixrac edib. Ötən ilə qədər Azərbaycan bu həcmdə elektrik enerjisi ixrac etməmişdi: “İxracın artması Azərbaycanda elektrik enerjisi istehsalının artması ilə bağlı deyil. Açıqlanan statistik rəqəmlərdə qeyd olunur ki, elektrik enerjisinin 23, 5 milyard kilovat/saat ətrafında hasilat göstəricisi var. Əvvəlki illərlə müqayisədə Azərbaycanda 22,5-23 milyard kilovat/saat elektrik enerjisi istehsal olunub. Sadəcə, ötən il ölkədə hava şəraiti mülayim keçdi. Ölkənin daxilində elektrik enerjisinə tələbat yüksək olmadığından, Azərbaycan qonşu ölkələrə adıçəkilən enerjini ixrac etdi. Əsasən Türkiyə, Rusiya, Gürcüstan və İrana elektrik enerjisi ixrac olunub”.
Həmsöhbətimiz onu da vurğuladı ki, Azərbaycan elektrik enerjisi sektorunda artıq ixracat missiyasını həyata keçirir: “Daxildə elektrik enerjisindən qənaətlə istifadə etmək, eyni zamanda, alternativ enerjidən istifadənin genişləndirilməsi hesabına Azərbaycan elektrik enerjisi ixracı potensialını bir neçə dəfə artırmaq qabiliyyətinə malikdir”.
Günel CƏLİLOVA
