Əli Əlirzayev: “Elə sahələr var ki, ora investisiya qoyduqda qısa müddətdən sonra gəlir gətirir”
Prezident İlham Əliyev Davosda Çinin CGTN televiziya kanalına müsahibəsində Azərbaycanın investisiya siyasətinin mahiyyəti barədə məlumat verib.
Ölkə başçısının sözlərinə görə, investisiya siyasəti müddətinə görə iki istiqamət üzrə həyata keçirilir: “Bizim nisbətən qısa müddət ərzində xeyli gəlir gətirən çoxlu layihələrimiz var. Biz investisiyaların cəlb edilməsi mexanizmini yaradırıq, eyni zamanda, özəl sektorumuza çox aşağı faiz dərəcəsi ilə kreditlər ayırırıq ki, onlar da tezliklə gəlir gətirəcək sahələrə investisiya yatıra bilsinlər. Məsələn, kənd təsərrüfatı, kiçik və orta biznes kimi sahələr. Biz bunu qısamüddətli gəlir götürmək üçün edirik. Lakin uzunmüddətli investisiyalara gəldikdə, əsas məqsəd elə bir infrastrukturun yaradılmasıdır ki, o, uzun zaman ərzində fəaliyyət göstərsin və ölkəni dəyişmiş olsun, dünyanın ölkəyə münasibətini dəyişmiş olsun. Çünki bu infrastruktur layihələri olmadan Azərbaycanın coğrafi mövqeyinin bir o qədər də böyük mənası yoxdur. Biz ölkələri və insanları birləşdirməyə nail olmuşuq. Nəqliyyatla bağlı infrastruktur layihələri regionumuzda tamamilə yeni siyasi vəziyyət yaradır. Bir-birindən asılı olan ölkələr, biri tranzit ölkəsindən asılıdır, digəri tranzit ölkəsi olur, əlbəttə ki, onlar arasında daha yaxın münasibətlər yaranır. Onlar faydaları paylaşır, onlar bütün tərəflərin uduzmadığı bir vəziyyət tapa bilir”.
Ümumilikdə, Azərbaycanın sözügedən 2 istiqamət üzrə investisiya siyasəti nə dərəcədə doğrudur?
Sözügedən məsələni dəyərləndirən iqtisadçı-alim Əli Əlirzayevin fikrincə, hər iki istiqamət üzrə investisiya siyasətinin qurulması doğru yanaşmadır: “Çünki elə sahələr var ki, ora investisiya qoyduqda qısa müddətdən sonra gəlir gətirir. Bu əsasən kiçik sahibkarlıq və kənd təsərrüfatı ilə bağlı olan sahələrdir. Elə sahələr də var ki, uzunmüddətli investisiya tələb edir. Xüsusən də böyük sənaye kompleksləri və s. Bəziləri sosial xarakterli olur. Əsasən də infrastruktura qoyulan sərmayələr uzunmüddətli olur. Bəzi dövlətlər belə layihələrdən çəkinir. Hesab edirlər ki, vaxt amilinə görə risqlər böyükdür. Azərbaycanda isə bununla bağlı kompleks işlər görülür və rasional addımlar atılır. Yəni həm qısamüddətli, həm də uzunmüddətli investisiya layihələri həyata keçirilir. Hesab edirəm ki, bunların hər ikisi lazımlıdır və bununla bağlı işlərin görülməsi doğrudur. Ötən illər ərzində ölkədə bir sıra böyük və uzunmüddətli investisiya layihələrinə start verilib. Bir sıra infrastruktur layihələri həyata keçirilib. Ümumən bununla bağlı görülən işləri, həyata keçirilən layihələri məqbul hesab edirəm”.
Vidadi ORDAHALLI
