Vüqar Bayramov: “Bu il çevik idarəetmə sisteminin formalaşması daha çox xarici investisiyanın cəlb edilməsinə imkan yaradacaq”
Məlum olduğu kimi, İsveçrənin Davos şəhərində 49-cu Dünya İqtisadi Forumu öz işinə başlayıb. Ənənəvi olaraq, hər il keçirilən forum qlobal əhəmiyyətli məsələlərin müzakirə edildiyi önəmli platformaya çevrilib.
Belə bir tədbirə Azərbaycan Prezidentinin də mütəmadi dəvət alması ümumbəşəri problemlərin həllində ölkəmizin tutduğu mövqe, oynadığı rola verilən əhəmiyyəti özündə ehtiva edir. Bu mənada, regionda unikal tərəfdaşlıq platforması yaradan, həyata keçirdiyi irimiqyaslı layihələr, o cümlədən, nəqliyyat və enerji dəhlizləri ilə dünyanın diqqət mərkəzinə düşən, böyük investisiya şirkətlərini özünə cəlb edən Azərbaycan budəfəki forumun işində də aktiv iştirakı ilə seçilir. Diqqətçəkən məqamlardan biri odur ki, budəfəki Davos Forumunda dünya şirkətləri, xüsusən də qeyri-neft sektoru sahəsində fəaliyyət göstərən şirkətlər Azərbaycana böyük maraq göstərirlər. Bunu orada dövlət başçısının keçirdiyi bir sıra görüşlər əyani şəkildə sübut edir. "Dördüncü sənaye inqilabı dövründə qlobal memarlığın formalaşması" mövzusuna həsr olunan forumda iştirak etmək üçün Davosa səfər edən Prezident İlham Əliyevin keçirdiyi çoxsaylı görüşlər ayrı-ayrı dövlətlərin, beyin mərkəzlərinin, nüfuzlu şirkətlərin Azərbaycana olan marağını, əməkdaşlıq əlaqələrini inkişaf etdirmək niyyətini bir daha ortaya qoyub.
Bütün bunların fonunda, böyük şirkətlərin Azərbaycana göstərdiyi marağın artması nə ilə bağlıdır?
Məsələyə münasibət bildirən iqtisadçı-ekspert Vüqar Bayramov bunu bir sıra faktorlarla əlaqələndirdi: “Əvvəla Davos İqtisadi Forumu Azərbaycan üçün çox vacib bir tədbirdir. Bu forum ölkəmizin öz potensialını təqdim etməsi üçün bir tribunadır. 2019-cu il Davos İqtisadi Forumu Azərbaycan üçün əvvəlki illərlə müqayisədə daha əhəmiyyətlidir. Düzdür, əvvəlki illərdə də ölkəmiz iqtisadi imkanlarını təqdim edirdi. Lakin bu il bir az daha vacibdir. Çünki Azərbaycan 2019-cu ilə struktur islahatları ilə başladı. Yanvarın 11-də keçirilən müşavirədə Prezident İlham Əliyev bu islahatların idarəetmə sisteminin çevikliyini artıracağını, eyni zamanda, qeyri-neft sektorunun inkişafı üçün daha çox xarici sərmayənin prioritet olduğunu bildirdi. Bu baxımdan, 2019-cu ildə çevik idarəetmə sisteminin formalaşması daha çox xarici investisiyanın cəlb edilməsinə imkan yaradacaq. Prezident Davosda həm ikitərəfli görüşlər keçirdi, həm də xüsusi sessiyada çıxış etdi, dünyanın aparıcı media orqanlarına müsahibə verdi. Bütün bu çıxış və görüşlərdə Prezident dünyanın aparıcı şirkətlərini Azərbaycana sərmayə yönəltməyə dəvət edir. Əslində, şirkətlər üçün investisiya yatırmaq istədikləri dövlətin başçısı tərəfindən belə bir dəvətin edilməsi də vacibdir. Bu baxımdan, ölkə başçısının Azərbaycan iqtisadiyyatının mövcud potensialı və iqtisadi islahatlarla bağlı geniş auditoriyaya məlumat verməsi daha çox sərmayənin cəlb edilməsinə şərait yaradacaq. Nəzərə alsaq ki, Dünya Bankının “Douing Business” hesabatında Azərbaycan 32 pillə irəliləyərək dünyada ən yaxşı investisiya mühitinə malik olan 25 ölkədən biri kimi seçildi, bu irəliləyiş ölkəyə investisiya cəlbi baxımından yeni imkanlar yaradır. Xüsusən ölkə Prezidentinin investorları cəlb etməsi qeyri-neft sektoruna daha çox sərmayənin qoyulmasına baza yaradır. Ötən il ölkə iqtisadiyyatına 17.2 milyard manat investisiya qoyulub, onun əhəmiyyətli hissəsi qeyri-neft sektorunun payına düşür. Bu il üçün məqsəd daha çox xarici sərmayənin cəlb edilməsinə nail olmaqdır. Davos İqtisadi Forumunda ölkə Prezidentinin çıxışı və investorları cəlb etməsi bu hədəflərin reallaşmasına ciddi təkan verəcək”.
Vidadi ORDAHALLI
