Ruslan Atakişiyev: “Maliyyə sektorunda keçirilən islahatlar nəticəsində ölkə iqtisadiyyatının inkişafı beynəlxalq təşkilatların tərtib etdiyi hesabatlarda da yer alır”
Beynəlxalq Valyuta Fondu (IMF) 2019-2020-ci illər üçün iqtisadi artım hesabatını açıqlayıb. Qurumun hazırladığı “World Economic Outlook” (WEO) hesabatında qeyd olunur ki, fond qlobal iqtisadi artım proqnozunu illər üzrə müvafiq olaraq 0,2 faiz və 0,1 faiz azaldıb. IMF 2019-cu ildə qlobal iqtisadi artımın 3,5 faiz, 2020-ci ildə isə 3,6 faiz olacağını gözləyir.
Beynəlxalq Valyuta Fondunun Azərbaycana dair 2020-ci illə bağlı açıqladığı proqnoz barədə fikir bildirən iqtisadçı-ekspert Ruslan Atakişiyev “Bakı-Xəbər”ə açıqlamasında qeyd etdi ki, son illər ölkə iqtisadiyyatının inkişafı istiqamətində görülən işlər müsbət nəticəsini büruzə verir. Ölkə iqtisadiyyatında inkişaf tək daxildə deyil, eyni zamanda, beynəlxalq təşkilatların tərtib etdiyi hesabatlarda da qeyd olunur: “Məlumdur ki, ötən il beynəlxalq təşkilatların tərtib etdiyi maliyyə hesabatlarında Azərbaycanın adı ön sırada yer alır. Bu günlərdə Beynəlxalq Valyuta Fondu 2019-2020-ci illərdə Azərbaycanın iqtisadi artımı barədə məlumat yayıb. Hesabatda qeyd olunur ki, 2020-ci ildə ölkənin iqtisadi artımı 3,6 faiz ola bilər. 2016-cı ildə Azərbaycan iqtisadiyyatının inkişafı ilə bağlı Strateji Yol Xəritəsi hazırlandı. Həmin xəritənin hazırlanmasında məqsəd qeyri-neft sektorunun inkişaf etməsidir. Eyni zamanda, Maliyyə Sabitliyi Şurası yaradılıb. Maliyyə sektorunda bir sıra islahatların keçirilməsində məqsəd qarşıdakı illər üçün hədəfə qoyulan tədbirləri keçirmək idi. Sevindirici haldır ki, qeyd olunan sahədə görülən işlər artıq müsbət nəticəsini göstərir”.
Həmsöhbətimiz onu da vurğuladı ki, ümumdaxili məhsulda baş verən artım görülən islahatların nəticəsidir. Bu hal özünü ötən il də göstərdi: “Beynəlxalq təşkilatların Azərbaycanla bağlı açıqladığı artım tempi gözləniləndir. Ancaq onu da nəzərə almaq lazımdır ki, artım dinamikası dəyişə də bilər. Beynəlxalq maliyyə qurumlarının səsləndirdiyi rəqəm həm arta bilər, həm də azala. Nəzərə almaq lazımdır ki, hesabat tərtib olunarkən beynəlxalq ekspertlər ehtyatlı davranırlar. Onlar hər ehtimalı nəzərə aldığı üçün, hansısa ölkənin iqtisadi artımı barədə yüksək rəqəm söyləmirlər. Gözlənir ki, 2020-ci ildə Azərbaycanda iqtisadi artım Beynəlxalq Valyuta Fondunun qeyd etdiyi rəqəmdən daha yüksək olacaq”.
Günel CƏLİLOVA
