Vüqar Bayramov: “2018-ci ildən başlayaraq xarici borc məbləğinin tənzimlənməsi ilə bağlı həyata keçirilən fəaliyyətlər Azərbaycanın xarici borc öhdəliyinin kəskin şəkildə azalmasına səbəb olub”
Beynəlxalq reytinq agentliyi Azərbaycanın xarici dövlət borcu ilə bağlı hesabat açıqlayıb. “Moody`s Investors Service” beynəlxalq reytinq agentliyinın məlumatına görə, bu il Azərbaycanın xarici borcu (dövlət və özəl sektorun borcları nəzərə alınmaqla) ÜDM-in 46,5%-ni təşkil edəcək ki, bu da regionda ən aşağı göstəricilərdən biridir.
Azərbaycan xarici borcun proqnozlaşdırılan həcminə görə MDB ölkələri arasında ikinci yeri tutur. Birinci yerdə ÜDM-in 28,3%-i səviyyəsində göstərici ilə Rusiya qərarlaşıb. Digər MDB ölkələrində borcun məbləği ÜDM-in 50%-ni ötür.
Xarici borcun proqnozlaşdırılan həcminə görə Azərbaycanın MDB ölkələri arasında ikinci yeri tutmasına münasibət bildirən iqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, 2018-ci ildə Azərbaycan xarici borcun ümumdaxili məhsuldakı payını 22 faizdən 19 faizə qədər endirə bilib. Azərbaycan regionda Rusiya ilə yanaşı, xarici borcu az olan ölkələrdən biridir.
Ekspertin sözlərinə görə, xarici borc asılılığının tənzimlənməsi vacibdir. Xüsusən də neftin dünya bazarında qiymətinin yüksək olduğunu nəzərə alsaq, xarici borc limitinin tənzimlənməsinə ehtiyac var: “Məlumdur ki, Azərbaycanda xarici borcun tənzimlənməsi ilə bağlı sistemli strategiya həyata keçirilir. Çünki ölkə başçısı tərəfindən xarici borc öhdəliklərinin tənzimlənməsi ilə bağlı ayrıca proqram qəbul olunub. Növbəti illər üçün xarici borcun tənzimlənməsi prioritet məsələdir. Bu sahəyə sistemli yanaşma nəticəsində xarici borcda azalma qeydə alınıb. 2018-ci ildən başlayaraq xarici borc məbləğinin tənzimlənməsi ilə bağlı həyata keçirilən fəaliyyətlər Azərbaycanın xarici borc öhdəliyinin kəskin şəkildə azalmasına səbəb olub. Manatın xarici valyutaya nisbətən məzənnəsinin dəyişməsindən öncə xarici borc 1 rəqəmli idi. Ancaq devalvasiyadan qısa müddət sonra ölkənin xarici borc öhdəliyi azalmağa doğru başladı”.
V.Bayramov hesab edir ki, Dövlət Proqramı çərçivəsində növbəti illərdə Azərbaycanın xarici borclardan asılılığı kəskin şəkildə azalacaq.
Günel CƏLİLOVA
