“Daxili istehsal nəticəsində Azərbaycanın azot gübrəsi idxalından asılılığı tamamilə aradan qaldırılacaq, gübrə idxalı ilə bağlı xaricə maliyyə axınına son qoyulacaq”
Məlum olduğu kimi, dövlət başçısı İlham Əliyevin iştirakı ilə Sumqayıtda "SOCAR karbamid" zavodu açılaraq istifadəyə verilib.
Zavodun istehsala başlaması azot gübrəsi idxalına ehtiyacı aradan qaldıracaq, bununla da ölkənin xarici valyuta xərcləri azalacaq. Qeyd edək ki, indiyədək azot gübrələri Azərbaycana idxal edildiyi halda, yeni zavod həm daxili bazarın tələbatını tam ödəyəcək, həm də istehsal etdiyi məhsulun təxminən 70 faizini ixrac edəcək. Nəticədə daha əvvəl idxal üçün sərf edilən illik 90 milyon dollara qədər valyuta vəsaitləri ölkədə qalacaq, eyni zamanda, zavod respublikamız üçün əlavə gəlir mənbəyinə çevriləcək.
Zavodun açılış mərasimində çıxış edən Prezident İlham Əliyev bildirib ki, ölkəmizdə ən müasir standartlara cavab verən böyük sənaye müəssisəsi yaradılıb: “Bu zavod Azərbaycanda qeyri-neft sənayesi sahəsində həyata keçirilən ən böyük layihədir. Zavodda ildə 650 min ton karbamid istehsal olunacaq. Onun böyük əksəriyyəti ixrac ediləcək. Eyni zamanda, daxili tələbat da ödəniləcək. Çünki biz bu günə qədər gübrələri xaricdən alırıq və bu məqsədlər üçün böyük həcmdə valyuta xərclənir. Azərbaycan dövlətinin fermerlərə verilən gübrələrin 70 faizinin vəsaitini təmin etdiyini nəzərə alsaq, təsəvvür etmək çətin deyil ki, bu, büdcəmiz üçün kifayət qədər maliyyə yüküdür. Amma indi biz özümüz fermerlərimizi ən keyfiyyətli gübrə ilə təmin edəcəyik”.
Sumqayıtda "SOCAR karbamid" zavodunun açılması ilə artıq Azərbaycan gübrə idxalından azad olundu. Həm daxili tələbatı təmin olunacaq, həm də xaricə satılacaq.
İqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, Sumqayıtda "SOCAR karbamid" zavodunun istifadəyə verilməsi istehsal və sənaye müəssisələrinin yaradılmasının bariz nümunəsidir. "SOCAR karbamid" zavodu son illər ərzində Azərbaycanda qurulan ən böyük müəssisələrdən biridir.
Ekspertin sözlərinə görə, yeni istifadəyə verilən zavod sayəsində kənd təsərrüfatı üçün ölkədən valyuta çıxarılışı azalacaq. Eyni zamanda, "SOCAR karbamid" zavodunun istehsal etdiyi məhsullar daxili tələbatı təmin etməklə yanaşı, xaricə də ixrac olunacaq: “Daxili istehsal nəticəsində Azərbaycanın azot gübrəsi idxalından asılılığı tamamilə aradan qaldırılacaq, gübrə idxalı ilə bağlı xaricə maliyyə axınına son qoyulacaq. Bununla da Azərbaycanın qeyri-neft sektorunun ixrac potensialının gücləndirilməsi istiqamətində növbəti uğurlu addım atılacaq. Nəticədə ölkəmizə daxil olacaq valyutanın həcmi artacaq. Bu, iqtisadiyyatın inkişafı istiqamətində atılan böyük addımlardan biridir”.
İqtisadçının sözlərinə görə, məhsulun ixracı nəticəsində ölkəyə illik təxminən 150-160 milyon ABŞ dolları gəlirin daxil olması gözlənir. Həmçinin, layihə Sumqayıt şəhərində əhalinin məşğulluq səviyyəsinə müsbət təsir göstərməklə sosial baxımdan mühüm əhəmiyyət daşıyır.
Günel CƏLİLOVA
