Prezident İlham Əliyevin tapşırığına əsasən, ölkəmizdə istehsal olunan məhsulların ixracının təşviqi və genişləndirilməsi, "Made in Azerbaijan" brendinin xarici ölkələrdə tanıdılması, satışının təşkili və əlaqələndirilməsi məqsədilə xarici ölkələrdə ticarət evlərinin yaradılması prosesi davam etdirilir.
Yanvarın 15-də Birləşmiş Ərəb Əmirliklərinin (BƏƏ) Dubay şəhərində yerləşən məşhur "The Mall" Ticarət Mərkəzində Azərbaycan Ticarət Evi açılıb. Ticarət Evi "Made in Azerbaijan" brendinin BƏƏ bazarında daha çox tanıdılmasına, Azərbaycan məhsullarının ixracının təşviqi və genişləndirilməsinə dəstək göstərəcək. Həmçinin, yerli məhsullarımızın bu ölkədə satışını təşkil edəcək, sahibkarlar arasında bu sahədə əlaqələndirməni həyata keçirəcək.
Ticarət Evində Azərbaycan şirkətlərinin müxtəlif növ məhsullarının sərgisi təşkil olunub. Daimi fəaliyyət göstərəcək sərgidə 33 Azərbaycan şirkətinin istehsal etdiyi 600-dən çox məhsul, o cümlədən meyvə və tərəvəzlər, quru meyvələr, fındıq, çay, mürəbbə, meyvə şirələri, mineral sular, limonadlar, konserv məhsulları, bitki yağları, süd və süd məhsulları, qənnadı məmulatları, kosmetik məhsullar və sair nümayiş etdirilir. Ticarət Evində Azərbaycanın zəngin mətbəxini təqdim edən restoran da fəaliyyət göstərir. BƏƏ-də açılan Azərbaycan Ticarət Evı ölkəmizin xaricdə yaradılmış sayca 7-ci ticarət evidir.
Nəzərə alsaq ki, BƏƏ regionda böyük iqtisadi çəkiyə malikdir, sözügedən Ticarət Evi iki ölkə arasında iqtisadi-ticari əlaqələrin daha da genişlənməsinə təkan verəcək. İndiyədək BƏƏ Azərbaycana 2,1 milyard dollar, Azərbaycan isə BƏƏ-yə 330 milyon dollar investisiya yatırıb. Çox güman ki, bundan sonra tərəflər arasında daha böyük iqtisadi göstəricilər qeydə alınacaq.
Onu da qeyd edək ki, xaricdə ticarət evlərinin yaradılması həm təbliğat, həm də ixrac imkanlarımızın genişləndirilməsi baxımından olduqca əhəmiyyətlidir. Artıq bir sıra ölkələrdə Azərbaycan Ticarət Evi yaradılıb. Bu il 10 ölkədə belə evlərin yaradılacağı gözlənir.
Ölkəmizin Ticarət Evi ilk olaraq Rusiyada yaradılıb. Daha sonra bu iş MDB məkanındakı bir sıra ölkələrdə də həyata keçirilib. Asiya qitəsi və Körfəz ölkələrində ticarət evlərinin sayının artırılacağı gözlənir. Azərbaycan istehsal etdiyi məhsulların ixracında irəliləyişə nail olmaq məqsədilə, həmçinin, Avropa İttifaqı ölkələrində də ticarət evləri açmağı planlaşdırır.
Ümumiyyətlə, ticarət evləri ölkəmizin ticarət potensialının artırılması, qarşılıqlı əməkdaşlığın gücləndirilməsi, həm də ölkəyə xarici investisiyanın cəlbi baxımından uğurlu bir addımdır. Artıq ölkəmizin xarici tərəfdaşları da etiraf edirlər ki, Azərbaycanın böyük ixrac potensialı var. Məhsullarımızın xarici ölkələrə ixrac olunması üçün əvvəlcə təbliğ olunmalı, bazarlarda daha rahat şəkildə satılması üçün digər tədbirlər həyata keçirilməlidir. Bu baxımdan ticarət evləri böyük əhəmiyyət kəsb edir. Ticarət evlərinin yaradılması, həmçinin, imkan verəcək ki, qeyri-neft sektorunda fəaliyyət göstərən sahibkarlar xarici ölkələrin bazarlarına çıxış imkanlarını artırsınlar. Nəzərə alsaq ki, Körfəz ölkələri böyük maliyyə imkanlarına malikdir, Dubayda açılan Azərbaycan Ticarət Evi bu baxımdan yeni imkanlar açacaq. Bu, bazarlarla bağlı məlumatların əldə olunması, yerli ixracatçılarla Azərbaycan ixracatçılarının informasiya mübadiləsinə imkan verəcək. Ticarət evlərinin yaradılması Azərbaycanın qeyri-neft məhsullarının yeni bazarlara ixrac edilməsi məqsədi daşıyır. Bu baxımdan BƏƏ və digər Körfəz ölkələri Azərbaycanda istehsal olunan məhsullar üçün böyük bazardır. Ticarət evləri vasitəsilə sahibkarlarımız həmin ölkələrdə həm fərqli sektorlardakı vəziyyəti, eləcə də bazarlarda marketinq araşdırmaları aparılmasını təmin edəcəklər. Bundan əlavə, ticarət evləri birgə layihələrin həyata keçirilməsi və sərmayə qoyuluşlarının reallaşdırılmasına xidmət edəcək.
Vidadi ORDAHALLI
