Qadir Bayramlı: “Bu sahənin inkişafı üçün yaxşı olardı ki, kənd təsərrüfatına aid texnika ölkədə istehsal olunsun”
Aqrar sahədə keyfiyyətli məhsulun yetişdirilməsini və onun itkisiz yığılmasını təmin etmək üçün istehsalçılar zəruri texnika ilə təmin olunurlar.
Bu günlərdə Aqrar Kredit və İnkişaf Agentliyi (AKİA) kənd təsərrüfatı texnikasının güzəştli şərtlərlə satışı üzrə yeni qaydaların tətbiqinə başlayıb. Kənd Təsərrüfatı Nazirliyinin yaydığı məlumatda qeyd olunur ki, agentliyin vəsaiti hesabına kənd təsərrüfatı texnikasının ilk güzəştli satışı həyata keçirilib. Qeyd edək ki, satış Azərbaycan Respublikası Prezidentinin 19 dekabr 2018-ci il tarixli “Kənd təsərrüfatına dövlət dəstəyinin və aqrar sahədə lizinq fəaliyyətinin təkmilləşdirilməsi haqqında” Fərmanı ilə təsdiqlənmiş yeni qaydalara uyğun aparılıb. Belə ki, gömrük dəyəri 172 min AZN olan texnikanı təchizatçıdan kənd təsərrüfatı müəssisəsi 68 800 manata, yəni dəyərin 40%-i güzəşt olunmaqla əldə edib. Müəssisə satış məbləğinin 20%-i həcmində ilkin ödəniş edib. Alıcı satış məbləğinin qalan hissəsini təchizatçıya Agentliyin vəsaiti hesabına müvəkkil kredit təşkilatından götürdüyü güzəştli kreditlə ödəyib. Texnika alıcısı krediti 5 il müddətinə faizsiz olaraq geri qaytaracaq. Kreditin faizləri isə AKİA tərəfindən aybaay müvəkkil kredit təşkilatına ödənəcək.
Ekspertlərin fikrincə, kənd təsərrüfatı texnikasının güzəştli şərtlərlə fermerlərə satılması aqrar sahəyə müsbət təsir edəcək.
Azərbaycan Dövlət İqtisad Universitetinin (UNEC) dosenti Qadir Bayramlı “Bakı-Xəbər”ə açıqlamasında qeyd etdi ki, aqrar sahənin inkişafı üçün kənd təsərrüfatı lazımi avadanlıqlarla təmin olunmalıdır: “Məlumat üçün bildirim ki, Sovet dönəmində ölkədə kənd təsərrüfatı texnikası istehsalı olmayıb. Hazırda bu sahə ilə bağlı ilkin təşəbbüslər var. Bölgələrdə bununla bağlı müəyyən işlər görülür. Gəncədə “Belarus” tipli traktorlar istehsal olunur.
Ötən illərlə müqayisədə bu sahədə xeyli inkişaf qeydə alınıb. 1990-cı illərdə texnika sarıdan çətinlik yaşanırdı. O zamanlar kombaynlar o qədər az idi ki, öncə Aran zonalarını, daha sonra dağətəyi zonaları biçirdilər. Aqrolizinq tətbiq olunandan sonra bu sahədə vəziyyət müsbətə doğru dəyişib”.
Həmsöhbətimiz hesab edir ki, kənd təsərrüfatı texnikasının güzəştli şərtlərlə fermerlərə satışı bu işlə məşğul olanların iş keyfiyyətinə müsbət təsir edəcək.
Q.Bayramlı qeyd etdi ki, yeni təşəbbüs bölgələrdə canlanmaya səbəb olacaq. Yetər ki, rayonlarda keçiriləcək iş şəffaf şəkildə həyata keçirilsin.
Ekspert hesab edir ki, güzəştli şərtlərlə fermerlərə aqrar texnikanın satışının həyata keçirilməsi yaxşıdır. Bu sahənin inkişafı üçün yaxşı olardı ki, kənd təsərrüfatına aid texnika ölkədə istehsal olunsun.
Günel CƏLİLOVA
