Rüfət Quliyev: “Qeyri-neft sektorunun sürətlə genişlənməsi, sənayeləşmə prosesinin davam etməsi, iqtisadi zonaların yaradılması ölkənin inkişafını daha da sürətləndirir”
Bu gün ölkədə aparılan sənayeləşmə siyasəti paytaxt Bakı ilə yanaşı, regionların dinamik inkişafında mühüm rol oynayır. Maşınqayırma, alüminium, sement zavodları, konserv, süd və ət emalı, çörək istehsalı müəssisələri, quşçuluq fabrikləri, istixanalar və məhsulların saxlanması üçün soyuducu anbar infrastrukturunun inşası müsbət nəticələr verir. Azərbaycanda texnopark modelinin yaradılması və bu modelin əsas iqtisadi subyektlərindən hesab olunan sənaye texnoparklarının inkişaf etdirilməsi üçün dövlətimiz tərəfindən çox əhəmiyyətli işlər görülür və bu, ölkə iqtisadiyyatının inkişafına öz müsbət təsirini göstərməkdədir.
Sənaye sektorunda qeydə alınan inkişaf haqqında bir neçə gün öncə Prezident İlham Əliyevin sədrliyi ilə keçirilən Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında da danışılıb. Dövlət başçısı bildirib ki, sənayeləşmə siyasəti öz gözəl nəticələrini verir: “Ümumdaxili məhsul, yəni iqtisadi artım keçən il Azərbaycanda 1,4 faiz olub. Hesab edirəm ki, bu, yaxşı göstəricidir. Əlbəttə ki, bizim arzularımızı tam əks etdirmir. Ancaq, eyni zamanda, dünyada gedən proseslərə baxdıqda hesab edirəm ki, yaxşı göstəricidir. Ondan daha yaxşı göstərici qeyri-neft sektorunun inkişafıdır. Burada da inkişaf 1,8 faizdir. Sənaye istehsalı 1,5 faiz artıb, qeyri-neft sektorunda isə sənaye istehsalı 9,1 faiz artıb. Bu, onu göstərir ki, sənayeləşmə siyasətimiz öz gözəl nəticələrini verir”.
Azərbaycanda sənayeləşmə siyasətinin inkişafı haqqında Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyevin fikirlərini öyrəndik. O, “Bakı-Xəbər”ə açıqlamasında qeyd etdi ki, milli iqtisadiyyatda müşahidə edilən müsbət tendensiyalardan biri də ölkədə qeyri-neft sənayesinin daha üstün inkişafı ilə bağlıdır: “Məlumdur ki, ötən ilin əvvəlindən respublikada ümumi sənaye istehsalı artıb. Bununla yanaşı, qeyri-neft sənayesində artım qeydə alınıb. Hazırda ölkənin qeyri-neft sənayesində buraxılan ət və süd məhsulları, duz, meyvə və tərəvəz konservləri, mineral sular, sement və klinkerlər, gips, əhəng, alçipan, kərpic, betondan tikinti blokları, armatur, alüminium və ondan alınan məmulatlarla ölkənin özünütəminetmə səviyyəsi digər sənaye məhsulları ilə müqayisədə daha yüksəkdir. Azərbaycanda sənayeləşmə siyasəti bundan sonra da davam etdiriləcək. Bu istiqamətdə ölkəmizin iqtisadiyyatı uğurla irəli getməkdədir.
Millət vəkilinin sözlərinə görə, qeyri-neft sektorunun sürətlə genişlənməsi, sənayeləşmə prosesinin davam etməsi, iqtisadi zonaların yaradılması ölkənin inkişafını daha da sürətləndirir.
Həmsöhbətimiz onu da vurğuladı ki, bu gün regionlarda çoxlu sayda sənaye mərkəzi fəaliyyət göstərir. Bütün bu işlər ildən-ilə daha da böyüyür. Təbii ki, bütün bunlar yeni iş yerləridir və insanlarımız orada çalışaraq yüksək məvacib alırlar.
Günel CƏLİLOVA
