Fikrət Yusifov: “… vergi yükünün azalması onların fəaliyyətinin genişləndirilməsinə səbəb olur”
Ölkədə sahibkarlığın inkişafı istiqamətində dövlət tərəfindən mühüm işlər görülür. Sahibkarlığın inkişafı yönündə görülən işlər sayəsində bu sektorda ötən illərə nisbətən nəzərəçarpan tərəqqi var. Bu səbəbdən də qeyd olunan sahənin inkişafı ilə bağlı əlavə addımlar atılacaq.
Ötən həftə Prezident İlham Əliyev Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında sahibkarlığın inkişafına da toxunub. Dövlət başçısı qeyd edib ki, əvvəlki illərdə sahibkarlara 2,2 milyard manat məbləğində, keçən il isə 160 milyon manat güzəştli kreditlər verilib: “Sevindirici haldır ki, verilən kreditlər əvvəlcə verilmiş və sonra qaytarılan kreditlər hesabına verilir. Yəni büdcə bu məsələyə pul xərcləmir. Artıq bu vəsait akkumulyasiya olunub. Biz sahibkarlara hər il bu cür dəstək göstəririk və göstərəcəyik”.
Prezident İ.Əliyev bildirib ki, sahibkarlara daha böyük kömək göstərmək üçün indi bir çox ölkəyə ixrac missiyaları təşkil olunur: “Biz kömək edirik, bu işlərə büdcədən vəsait ayırırıq. Biz sərgilərdə, xüsusilə ərzaq məhsullarının təbliği ilə bağlı sərgilərdə dövlət hesabına iştirak edirik. Sahibkarları oraya cəlb edirik ki, onlar öz məhsullarını xaricə daha rahat sata bilsinlər. Ticarət evləri yaradılır. Artıq Belarusda, Çində, Ukraynada, Latviyada, Polşada Azərbaycan ticarət evləri açılıb. Bu da bizim təşəbbüsümüzdür. Onu da bildirməliyəm ki, bizim ticarət evlərimizə çox böyük maraq var. Bu ticarət evlərinin açılması nəticəsində həmin ölkələrə bizim ixracımız da artır. Yaxın gələcəkdə Birləşmiş Ərəb Əmirliklərində və Rusiyada Azərbaycan ticarət evlərinin açılması nəzərdə tutulur”.
Sahibkarlığın inkişafı ilə bağlı əlavə addımlar atılmasının vacibliyi barədə danışan iqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, Azərbaycanda sahibkarlığın inkişafına dövlət dəstəyi böyükdür: “Sahibkarlığın inkişafı istiqamətində dövlət tərəfindən mühüm işlər görülür. İlk olaraq bildirim ki, vergi islahatlarının aparılması sahibkarlığın inkişafına geniş meydan açıb. Sahibkarlığın vergi yükünün azaldılması onun fəaliyyət meydanının genişləndirilməsi deməkdir.
Bəllidir ki, kənd təsərrüfatında çalışan işçilər üçün ötən il 370 milyon manat məbləğində subsidiya və güzəştlər verilib. Bu rəqəm olduqca böyükdür. Həmçinin, Sahibkarlığın İnkişafına Kömək Milli Fondunun xətti ilə 1000-ə yaxın sahibkara 160 milyon manat güzəştli kredit verilib. İpoteka Zəmanət Kredit Fondu 277 milyon manat məbləğində ipoteka kreditlərini yenidən maliyyələşdirib. 17 milyon manat məbləğində kreditlərlə bağlı zəmanət dəstəyi göstərib. Bütün bunlar onu göstərir ki, dövlət tərəfindən sahibkarlara göstərilən kömək nəticəsində bu sahədə inkişaf qeydə alınıb.
Məlumat üçün bildirim ki, ötən il sahibkarlara qeyri-neft məhsullarının ixracı üçün 15 milyon manat ixrac təşviqi ödənilib. Onların ixrac etdiyi məhsulun gömrük dəyərinin 15 milyon manat hissəsi sahibkarların özlərinə geri qaytarılıb”.
İqtisadçının sözlərinə görə, ixracın təşviqi ilə bağlı dövlət tərəfindən xüsusi iş görülür. Sahibkarın istehsal etdiyi məhsulun ixrac olunması üçün lazımi işləri görür. Dövlət tərəfindən ixrac missiyaları təşkil olunur. İxrac missiyasının məqsədi ondan ibarətdir ki, istehsalçıların məhsulları xarici bazarda özünə yer tapa bilsin. Dövlət tərəfindən hər bir ixrac missiyası üçün 30 min manat pul xərclənərək bu iş həyata keçirilir. Bununla da ixracatçılara və istehsalçılara yaxından dəstək göstərilir”.
Günel CƏLİLOVA
