«2018-ci ildə Azərbaycanda ÜDM 1,4%, o cümlədən qeyri-neft sektoru 1,8% artıb». Bunu Prezident İlham Əliyev Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib.
Ölkə başçısı qeyd edib ki, ötən il sənaye istehsalı 1,5%, kənd təsərrüfatı istehsalı 4,6% artıb, valyuta ehtiyatları 45 mlrd. dollar təşkil edib. Prezident onu da bildirib ki, kənd təsərrüfatı sahəsində 4,6 faiz artım yaxşı göstəricidir. Ancaq bu sahədə də çox ciddi islahatlar aparılır. Dövlət başçısı qeyd edib ki, Kənd Təsərrüfatı Nazirliyinin yeni rəhbərliyi bir çox önəmli təşəbbüslər irəli sürüb: “Mən onları bəyənmişəm, dəstəkləmişəm. İndi onların icrası başlanılır. Mən əminəm ki, bu islahatlar nəticəsində kənd təsərrüfatı istehsalı böyük dərəcədə artacaq, o cümlədən ixrac artacaq, daxili tələbat daha çox yerli məhsullar hesabına təmin ediləcəkdir. Özümüzü təminetmə əmsalı artacaq, qeyd etdiyim kimi, ixrac imkanlarımız genişləndiriləcək, biz yeni bazarlara çıxış əldə edəcəyik”.
Ümumilikdə, ölkə iqtisadiyyatının müxtəlif sahələrində qeydə alınan artım tempi yaxşıdır. Ancaq kənd təsərrüfatı ilə qeyri-neft sektorunda qeydə alınan belə fərqli artım tempi nə ilə bağlıdır? Sözügedən artım templərini bir-birinə necə yaxınlaşdırmaq olar?
Məsələyə münasibət bildirən ekspert Rəsul Cahangirli bunu bir sıra amillərlə əlaqələndirdi: “Bunun başlıca səbəbi onunla bağlıdır ki, Azərbaycan iqtisadiyyatında neft sektoru aparıcı mövqeyə malikdir. Bununla yanaşı, Azərbaycanda ənənəvi kənd təsərrüfatı sahələri olub. Son illər həmin sahələrdə yenidən inkişaf özünü göstərir. Qeyri-neft sektorunun inkişafı isə hələ yeni başlayıb. Belə ki, 2014-cü ilin ortalarında neftin dünya bazar qiymətinin kəskin ucuzlaşmasından sonra Azərbaycanda qeyri-neft sektorunun inkişafına dair Yol Xəritəsi qəbul olundu. Ondan sonra bu istiqamətdə ciddi islahatlara start verildi. İndiki dövrdə qeyri-neft sektorunda 1,8 faiz artımın qeydə alınması kiçik rəqəm deyil. Nəzərə almaq lazımdır ki, kənd təsərrüfatı da qeyri-neft sektoru hesab edilir. Bu baxımdan islahatlar davam etdikcə, sözügedən sahələrdə qeydə alınan artım arasında fərq azalacaq. Qeyri-neft sektorunda daha böyük artım qeydə alınacaq. O üzdən, narahatçılığa heç bir əsas yoxdur”.
Vidadi ORDAHALLI
