Məlum olduğu kimi, bu gün turizmin inkişafı Azərbaycanda dövlət siyasətinin tərkib hissəsi hesab edilir. Elə bundan irəli gəlir ki, son illər ərzində ölkəmizin mövcud turizm potensialının inkişafı istiqamətində mühüm addımlar atılıb. Turistlərin Azərbaycana çoxsaylı səfərlərinin təşkili, turizmin müxtəlif növlərinin inkişaf etdirilməsi, müasir turizm infrastrukturunun yaradılması sahəsində məqsədyönlü işlər də artıq öz nəticəsini verir. Azərbaycana üz tutan turistlərin sayı sürətlə artır.
Qarşıya qoyulan məqsədə görə, Azərbaycan mövcud olduğu regionda aparıcı turizm məkanına, istiqamətinə çevrilməlidir. Artıq bu məqsədlə ötən aydan başlayaraq Azərbaycanın altı ölkədə rəsmi turizm nümayəndəliyi fəaliyyət göstərir, 2020-ci ilə qədər onların sayı 10-a çatdırılacaq. Altı nümayəndəlik hazırda Çində, Hindistanda, Səudiyyə Ərəbistanında, Ərəb Əmirliklərində, Almaniya və Rusiyada fəaliyyət göstərir. Marketinq üçün ümumən hədəf bazarı olaraq 18 ölkə seçilib. Məhz həmin ölkələrdən Azərbaycana daha çox turist axınının gəlməsi gözlənir. Digər tərəfdən nəzərə alaq ki, cari ildə Bakı-Tiflis-Qars dəmir yolu ilə sərnişin daşınmasına start veriləcək. Elə bu da ölkəyə çoxsaylı turist axınını şərtləndirən əsas faktorlardan biri sayılır. Çünki dəmir yolu üzərindən ölkəyə daha çox sayda turistin gəlişi gözlənir.
Xatırladaq ki, Bakı-Tiflis-Qars sərnişin qatarı məhz bu il işə düşəcək. Qeyd edək ki, bu məqsədlə məhşur “Stadler Rail Group” şirkətindən sərnişin qatarlarının vaqonları 2019-cu ilin fevral-mart aylarında təhvil alınmalıdır. 10 sərnişin vaqonu təhvil verilən kimi Bakı-Tifls-Qars dəmir yolu ilə sərnişin qatarı fəaliyyətə başlayacaq. Bu isə çox böyük əhəmiyyət daşıyır, çünki bu halda Asiya və Avropadan Azərbaycana daha çox sayda turist gəlişi gözlənir. Hesab edilir ki, Bakı-Tiflis-Qars sərnişindaşımaları sahəsinə və turizm sektoruna birmənalı şəkildə təsir göstərəcək. ABŞ-ın nüfuzlu CNN kanalı bu fonda Bakı-Tiflis-Qarsı səyahətlər barədə təsəvvürləri dəyişdirə biləcək yeni dəmir yolu marşrutları sırasına daxil edir: “Bu il dəmir yolu ilə səyahət həvəskarları üçün bütün dünyada açılan, iri şəhərləri birləşdirən və yolu qısaldan sürətli yeni marşrutlarla zəngin olan yaxşı ildir. Səyyahlar təyyarə ilə uçuşa alternativ axtarırlarmı, yoxsa sadəcə qatarda sürətlə getmək istəyirlərmi, fərqi yoxdur, bu marşrutlar səyahətlər üçün yeni imkanlar təklif edir”.
Bundan başqa o da məlumdur ki, ölkəmizdə dəmir yolunda bir neçə beynəlxalq istiqamətə reyslər açıla bilər. Elə bu günlərdə “Azərbaycan Dəmir Yolları” QSC-nin sədri Cavid Qurbanov da bildirib ki, ilkin olaraq Türkiyəyə dəmir yolu reysinin açılması nəzərdə tutulur. Gələcəkdə Batumiyə qədər dəmir yolu fəaliyyət göstərə bilər. QSC sədri qeyd edib ki, Rusiya ilə də danışıqlar aparılaraq Dağıstana dəmir yolunun çəkilişi mümkündür. Dağıstan istiqamətinə dəmir yolu xətti çəkilsə, bu, Dərbənd və ya Mahaçqala istiqamətinə olacaq. Bu da ölkəyə əlavə turist axınına rəvac verən amil sayılır.
Yaxın tezlikdə istifadəyə veriləcək Bakı-Qəbələ dəmir yolu isə ölkəmizdə turizmin inkişafına əlavə təkan sayılır. Xatırladaq ki, Bakıdan Qəbələyə növbəti sürət qatarının işə düşməsi üçün müvafiq işlər aparılır. Qəbələ stansiyası Bakı-Ləki dəmir yolunun üzərindədir. Ləkidən Qəbələyə hazırda dəmir yolunun tikintisi gedir. 2019-cu ilin axırına qədər Bakı-Qəbələ sürət qatarının işə düşməsi planlaşdırılır. Bütün bunlar tuürizmin inkişafına, Azərbaycana üz tutan əcnəbilərin sayının artmasına ciddi təkan verəcək. Dövlət Turizm Agentliyinin sözçüsü Kənan Quluzadə isə bildirir ki, ölkəyə turist gəlməsi valyuta deməkdir, üstəlik, gələn əcnəbi şəxs ölkədə də pul xərcləyir: “Qeyd edim ki, əslində, Azərbaycanı burada turistlərin xərclədiyi pulun həcminə görə Gürcüstanla müqayisə etsək, oraya gələn turistlərin sayı bizdən çox olsa da, xərclənən vəsaitin həcmi çox yaxındır. Azərbaycana gələn turistlər pul xərcləyən turistlərdir, bu isə gəlirdir və valyuta mənbəyidir. Dünya təcrübəsinə görə, ölkəyə gələn bir turistə 30-35 nəfər xidmət göstərir. Azərbaycanın ərazisi və əhalisinin sayını götürsək, turizm ümumxalq biznesidir. Bizim üstün cəhətlərimizdən biri qonaqpərvərliyimizdir. İndi məqsədlərdən biri budur ki, turizm sənayesi Azərbaycan iqtisadiyyatının böyük gəlir mənbəyinə çevrilsin, ümumdaxili məhsulun hardasa 10 faizini təşkil etsin. Turizm birbaşa valyutanın ölkəyə gəlməsidir, bu həm dövlətin, həm özəl sektorun, həm də əhalinin gəlirlərinin artması deməkdir. Hər bir kəs turistə xidmət göstərib pul qazana bilir. Bu sahə çox açıqdır və çalışacağıq ki, tam sağlam bir rəqabət mühiti yaradılsın“.
Tahir TAĞIYEV
