Nüsrət İbrahimli: “…girov kimi qoyulan daşınmaz əmlakın satışa çıxarılması…”
Azərbaycanda “İpoteka haqqında” Qanuna dəyişikliklər təsdiqlənib. Qanuna edilən dəyişikliklər indiyədək bu sahədəki boşluqları və qeyri-müəyyənlikləri aradan qaldırmaqla yanaşı, borclulara qarşı daha sərt tələblər gətirir. Qanuna əsas dəyişikliklərdən biri ipoteka predmetinin, yəni girovun satışa çıxarılması səbəbilə bağlıdır. İndiyədək girov yalnız o zaman satışa çıxarılırdı ki, kreditin əsas hissəsi ödənilməsin. İndi isə bu məsələ sərtləşdirilib. Bundan sonra həm də ödənişin vaxtının 90 gün gecikdirilməsi də girovun satışına əsas olacaq.
Bundan başqa, qanunun 37.1-ci maddəsinə uyğun olaraq, ipotekaya tutmanın yönəldilməsi barədə məhkəməyə şikayət edilmədikdə, ipoteka predmetinə tutmanı notariusun icra qeydi əsasında yönəltmək mümkün olacaq.
“İpoteka haqqında” Qanuna edilən dəyişikliklər və girovlarla bağlı qaydaların sərtləşdirilməsinə münasibət bildirən daşınmaz əmlak məsələləri üzrə ekspert Nüsrət İbrahimli “Bakı-Xəbər”ə açıqlamasında qeyd etdi ki, yeni dəyişiklik bu sahədə qeyd alınan problemlərin qarşısını alacaq: “Bəzi hallarda kredit götürən şəxs vəaiti qaytarmamaq üçün müxtəlif formalarla gizlənir. Kredit götürən şəxs telefon nömrəsini dəyişir. Kredit verən təşkilatın nümayəndəsi göstərilən ünvana gedir. Lakin ev yiyəsi o zaman nümayəndələrə qapını açmır. Bir sözlə, kredit təşkilatları həmin şəxslə əlaqə yaratmaqda çətinlik çəkirlər. Girov kimi qoyulan daşınmaz əmlakın satılması uzun çəkir. Son nəticədə kredit təşkilatı müflis hala düşür. İnsanları xoş olmayan əməllərdən çəkindirmək, götürdüyü krediti geri qaytarmaq üçün qanuna yeni dəyişikliklərin olunması vacib idi. Bu səbəbdən də girovla bağlı sərt yanaşmanın tətbiq olunması vacib idi”.
Ekspert hesab edir ki, ödənişin vaxtı 90 gün gecikdirilərsə, o zaman girov kimi qoyulan daşınmaz əmlakın satışa çıxarılması müəyyən müddət üçün lazımlıdır. Belə olarsa, insanlar məsuliyyətini dərk edər və krediti vaxtında qaytarar.
Həmsöhbətimiz onu da vurğuladı ki, qanuna edilən dəyişikliklərdən biri də girov kimi qoyulan əmlakın bank tərəfindən deyil, şəxsin özü tərəfindən də satıla bilməsidir.
Günel CƏLİLOVA
