Ramil Osmanlı: “Avtomobillərin qiymətlərində artım daha çox ötən il müşahidə olunub”
Son vaxtlar avtomobillərin qiymətində bahalaşma müşahidə olunur. Belə ki, bazarda istər təzə, istərsə də köhnə avtomobillərin qiyməti bahalaşır. Xüsusən də bahalaşma təzə avtomobillərin timsalında özünü daha çox göstərir.
Onu da qeyd edək ki, yanvarın 1-dən ölkəyə idxal olunan avtomobillərin aksiz vergisi artırılıb. Ən aşağı aksiz dərəcəsi mühərrikinin həcmi 2 litrə qədər olan avtomobillərdədir. Bu göstərici 1 kubsantimetr üçün 20 qəpikdən 30 qəpiyə qaldırılıb. Ən yüksək aksiz dərəcəsi isə mühərrikinin həcmi 5 litrdən artıq olanlardadır. Belə avtomobillərdə 1 kubsantimetr üçün vergi 40 manatdan 70 manata qaldırılıb.
Belə ki, minik avtomobillərində mühərrikin həcmi 2000 kubsantimetrədək olduqda mühərrikin həcminin hər kubsantimetrinə görə 0,30 manat (hazırda 0,20 manat), mühərrikin həcmi 3000 kubsantimetrədək olduqda 600 manat (hazırda 400 manat) + mühərrikin həcminin 2001-3000 kubsantimetr hissəsi üçün hər kubsantimetrə görə 5 manat (hazırda 3 manat), mühərrikin həcmi 4 000 kubsantimetrədək olduqda 5600 manat (hazırda 3400 manat) + mühərrikin həcminin 3001- 4000 kubsantimetr hissəsi üçün hər kubsantimetrə görə 13 manat (hazırda 8 manat), mühərrikin həcmi 5000 kubsantimetrədək olduqda 18600 manat (hazırda 11400 manat) + mühərrikin həcminin 4001-5000 kubsantimetr hissəsi üçün hər kubsantimetrə görə 35 manat (hazırda 20 manat), mühərrikin həcmi 5000 kubsantimetrdən çox olduqda 53600 manat (hazırda 31400 manat) + mühərrikin həcminin 5000 kubsantimetrdən çox hissəsi üçün hər kubsantimetrə görə 70 manat (hazırda 40 manat) aksiz dərəcəsi tətbiq olunub.
Rüsumların artırılması bazarda vəziyyəti bir xeyli dəyişib. Demək olar ki, bütün avtomobillərdə bahalaşma müşahidə edilir. 2006-cı ildən bəri idxal olunan avtomobillərin qiymətində daha kəskin bahalaşma olub. İkinci əl avtomobillərin qiymətində hələlik elə də qiymət artımı nəzərə çarpmır. Bəzi satıcılar rüsumların artırılmasından sonra yeni gətirilən avtomobillərin qiymətində fantastik dərəcədə bahalaşma olduğunu bildirirlər.
Maraqlıdır, bəs ekspertlər avtomobillərin qiymətində müşahidə olunan bahalaşmanı nə ilə əlaqələndirirlər?
Məsələyə münasibət bildirən Əmlak Ekspert Mərkəzinin direktoru, əmlak eksperti Ramil Osmanlının fikrincə, idxal olunan avtomobillərin aksiz vergisinin artırılması səbəbindən qiymət artımı əsasən yanvarın sonunda özünü göstərəcək: “Hələ ki bu, nəqliyyat vasitələrinin qiymətinə o qədər də çox təsir etməyib.Yanvar ayının sonlarından proses özünü daha çox göstərməyə başlayacaq. İlin dəyişməsi ilə əlaqədar ölkəyə avtomobillərin idxalı dayanıb. Yəqin ilin sonuna doğru bazara yeni avtomobillərin daxil olması fonunda qiymət artımlarını tam olaraq təyin edə biləcəyik. Aksiz vergisinin tətbiqi ilə mühərrik həcmi böyük olan avtomobillərin qiymətlərində kəskin artım müşahidə ediləcək. Mühərrik həcmi 2 kubmetrə qədər olan avtomobillərdə isə, qiymətindən asılı olaraq, 1000-2000 manat civarında artım müşahidə ediləcək. Onu da qeyd edim ki, ötən il də avtomobil bazarında qiymət artımı müşahidə edilib. Tələb o qədər yüksək olmaya bilər. Lakin idxalın məhdudlaşması ilə təklif də azalıb. Avtomobillərin qiymətlərində artım daha çox ötən il müşahidə olunub. İstismarda olan köhnə nəqliyyat vasitələrinin qiymətlərində 10-15 faiz artım müşahidə edilib. Avtomobil bazarında baş verən dəyişikliklər və təklifin məhdudlaşması qiymət artımına səbəb olmuşdu. Yəqin ki, bu il də eyni tendensiya müşahidə olunacaq”.
Vidadi ORDAHALLI
