Rəsul Cahangirli: “Qurumda əmlakla bağlı bütün xidmətlərin beynəlxalq standartlara uyğun qurulması sözügedən sahədə ciddi dönüş yarada bilər”
Xəbər verildiyi kimi, Əmlak Məsələləri Dövlət Komitəsinin yeni Əmlak Xidmətləri Məkanı fəaliyyətə başlayıb. Əmlak Xidmətləri Məkanının yaradılmasında əsas məqsəd Əmlak Məsələləri Dövlət Komitəsinin bütün fəaliyyət sahələri üzrə göstərdiyi xidmətlərin vahid məkanda həyata keçirilməsidir.
Burada əmlakla bağlı bütün xidmətlər beynəlxalq standartlara uyğun qurulmaqla, şəffaflığın təmin olunması, vətəndaş məmnunluğunun artırılması, vətəndaş-məmur təmaslarının minimuma endirilməsi, xidmətlərin tam elektronlaşdırılması təmin edilib. Şənbə və bazar da daxil olmaqla, həftənin bütün günləri məkanda 100-ə yaxın işçi xidmət göstərəcək. Burada könüllülərin xidmətlərindən də istifadə olunur. Binada, həmçinin, əlillərin sərbəst hərəkəti üçün də bütün şərait yaradılıb. Burada notarius, bank, memarlıq və layihələndirmə işləri, əmlakın sığortalanması və poçt xidməti nəzərdə tutulub.
Binada gün ərzində 1000-ə yaxın vətəndaşa xidmət göstərilməsi planlaşdırılır. Əmlak Xidmətləri Məkanında, ümumilikdə, komitənin fəaliyyət sahələrinə uyğun 46 xidmət təqdim ediləcək. Göstərilən xidmətlərə dövlət əmlakının idarə edilməsi və özəlləşdirilməsi, dövlət və bələdiyyə əmlakı ilə bağlı hərracların təşkili, torpaq və qeyri-yaşayış sahələrinin icarəyə verilməsi, əmlakın qiymətləndirilməsi, daşınmaz əmlakın qeydiyyatı ilə bağlı müraciətlərin qəbulu, hazır sənədlərin təqdim edilməsi və digər işlər daxildir.
Bununla yanaşı, Əmlak Xidmətləri Məkanı bu sahədə digər xidmətləri də göstərəcək. Bütün bunların fonunda, yeni qurumun əhəmiyyətini ekspertlər necə dəyərləndirirlər?
Məsələyə münasibət bildirən ekspert Rəsul Cahangirlinin sözlərinə görə, Əmlak Xidmətləri Məkanının yaradılması mütərəqqi yenilikdir: “O mənada mütərəqqi yenilikdir ki, bütün fəaliyyət sahələri üzrə göstərilən xidmətlər vahid məkanda həyata keçiriləcək. İş mexanizminin elektronlaşdırılması imkan verəcək ki, vətəndaşlar süründürməçiliklə və digər neqativ hallarla üzləşməsinlər. Necə ki, “ASAN xidmət” mərkəzlərinin fəaliyyətindən əhali razılıq edir, ƏXM-dən də razı olacaqları gözlənir. Çünki əhaliyə göstərilən xidmətin keyfiyyəti artır. Ümumilikdə, əmlak xidmətləri ilə bağlı belə yeni mərkəzin yaradılması vacib idi. Ona görə ki, bu sahədə həllini gözləyən xeyli sayda iş var, əsasən də Bakı və digər şəhərlərdə tikilən sənədsiz evlərlə bağlı. Hesab edirım ki, ƏXM-in fəaliyyətə başlaması sənədsiz evlərin sənədləşdirilməsinə də müsbət təsir göstərəcək. Yəni vətəndaşlar bu qurum vasitəsilə bəzi lazımi sənədləri əldə edəcəklər. Bir sözlə, qurumda əmlakla bağlı bütün xidmətlərin beynəlxalq standartlara uyğun qurulması sözügedən sahədə ciddi dönüş yarada bilər. Hər halda, yaxın perspektivdə bununla bağlı bəzi nəticələri görəcəyik”.
Vidadi ORDAHALLI
