Könül Nuriyeva: “Azərbaycanda investisiya mühitinin yaxşılaşması istiqamətində görülən işlər sayəsində bu sahədə vəziyyət müsbətə doğru dəyişib”
İnvestisiya qoyuluşu iqtisadiyyatın inkişafında hərəkətverici qüvvə rolunu oynayır. Kapital qoyuluşu olmadan iqtisadiyyatın inkişaf etməsi mümkünsüzdür. Buna görə də inkişaf etmiş ölkələrdə belə, iqtisadiyyata sərmayə qoyuluşu dayanmır. Ölkəmizdə də həyata keçirilən siyasətin əsas məqsədlərindən biri milli iqtisadiyyatımızı davamlı olaraq kapital qoyuluşu ilə təmin etməkdir.
Sevindirici haldır ki, ölkə iqtisadiyyatına sərmayə qoyuluşu artmaqda davam edir. Bu, dövlət, eləcə də yerli və xarici özəl mənbələr hesabına formalaşır. Bununla yanaşı, həyata keçirilən iri infrastruktur layihələrinə beynəlxalq maliyyə qurumları tərəfindən də sərmayə yatırılır.
Açıqlanan statistik rəqəmlərdə ölkə iqtisadiyyatına yatırılan sərmayələrin həcminin artdığı bildirilir.
Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə ölkə əhalisini təbrik edərkən iqtisadiyyata yatırılan sərmayələr barədə məlumat verib. Prezident qeyd edib ki, ötən il ölkə iqtisadiyyatına 10 milyard dollar sərmayə qoyulub.
Azərbaycan iqtisadiyyatına yatırılan sərmayələr barəsində “Bakı-Xəbər”ə məlumat verən iqtisadçı-ekspert Könül Nuriyeva qeyd etdi ki, Azərbaycan iqtisadiyyatına yatırılan sərmayələrin həcmi son illər artıb. Artım daha çox 2018-ci ildə qeydə alınıb: “Əsasən qeyri-neft sektoruna yatırılan investisiyaların həcmi artıb. İnvestorlar qeyri-neft sektorunun müxtəlif sahələrinə sərmayə yatırırlar. Üstünlük daha çox yüngül sənaye sahələrində qeydə alınıb. Xüsusi olaraq bildirim ki, ötən il Azərbaycan iqtisadiyyatına daha çox xarici sərmayədarlar vəsait yatırıb. Xarici ölkələr arasında Yaponiya, İran, Çexiya, Birləşmiş Krallıq və digər ölkələrdir”.
Həmsöhbətimiz onu da vurğuladı ki, Azərbaycanda investisiya mühitinin yaxşılaşması üçün bir sıra işlər görülüb. İnvestisiya təşfiq fondu yaradılıb, elektron proseslərin asanlaşdırılması bu sahəyə marağı artırıb. Proseslərin yüngülləşdirilməsi xarici investorların Azərbaycana sərmayə yatırmasına səbəb olub.
Xanım iqtisadçının sözlərinə görə, qarşıdakı illərdə ölkə iqtisadiyyatına yatırılacaq sərmayənin həcmi daha da artacaq. Yerli investorlarla yanaşı, xarici sərmayədarlar da Azərbaycana daha çox vəsait ayıracaq.
Günel CƏLİLOVA
