Vüqar Bayramov: “İstehlak mallarının alınması əhalinin gəlirində əsas mövqeni qoruyub saxlayır” Rəşad Həsənov: “Əsas artım geyim məhsullarında qeydə alınıb, bu istiqamətdə xərclənən vəsait 2017-ci illə müqayisədə artıb”
Ötən il Bakı əhalisinin daha çox nəyə pul xərcləməsi məlum olub. Aparılan araşdırmalar zamanı məlum olub ki, Bakı əhalisi daha çox qeyri-ərzaq məhsullarına pul xərcləyib.
O da bəlli olub ki, 2018-ci ilin yanvar-noyabr aylarında Bakıda ticarət dövriyyəsinin həcmi 2017-ci ilin yanvar-noyabr ayları ilə müqayisədə 3,4 faiz artaraq 17 milyard 568,6 milyon manat olub.
Ticarət şəbəkəsində qeyri-ərzaq məhsullarının həcmi isə 3,4 faiz artaraq 9 milyard 619,5 milyon manata bərabər olub. Eyni zamanda, istehlak məhsullarının 24,7 faizi hüquqi şəxs statuslu müəssisələrdə, 61,9 faizi fərdi sahibkarlara məxsus ticarət obyektlərində, 13,4 faizi isə paytaxtın məhsul bazarlarında satılıb.
Ekspertlər ötən il paytaxt ərazisində ticarət dövriyyəsinin həcminin artmasının gözlənilən olduğunu düşünürlər.
İqtisadçı-ekspert Rəşad Həsənov “Bakı-Xəbər”ə açıqlamasında qeyd etdi ki, ötən il əhalinin qeyri-ərzaq məhsullarına xərclədiyi vəsaitin həcmi artıb. Bu artım daha çox toxuculuq, geyim və digər sahələrdə müşahidə olunub: “Həmçinin, mebellərin alışında, əczaçılıq sahəsində də artım qeydə alınıb. Qeyri-ərzaq məhsulları siyahısında əsas yeri yanacaq tutur. 1,9 milyard manata yaxın vəsait yanacağa sərf olunub”.
Həmsöhbətimiz onu da əlavə etdi ki, daşınmaz əmlak və tikinti materiallarına xərclənən vəsait artıb: “Əsas artım geyim məhsullarında qeydə alınıb. Bu istiqamətdə xərclənən vəsait 2017-ci illə müqayisədə artıb”.
İqtisadçı-ekspert Vüqar Bayramov bizimlə söhbətində bildirdi ki, açıqlanan statistik rəqəmlərə əsasən, əhalinin gəlirlərinin əsas hissəsi istehlak mallarının alınması üçün istifadə olunur: “İstehlak mallarının alınması əhalinin gəlirində əsas mövqeni qoruyub saxlayır. Bu onunla bağlıdır ki, əhali ərzaq məhsullarına daha çox vəsait xərcləyir, eyni zamanda, istehlak mallarının qiymətində artım qeydə alınıb. İstehlak mallarının satış qiymətinin artması əhalinin gəlirinə təsir göstərir.
Günel CƏLİLOVA
