Rəsul Cahangirli: “Bu, yaxın və uzaq perspektivdə Azərbaycana bir sıra dividendlər vəd edir”
"Bolqarıstan energetika sahəsində SOCAR ilə strateji tərəfdaşlıq əlaqələrini inkişaf etdirir". Bu barədə mətbuata Bolqarıstan Energetika Nazirliyindən ölkənin Azərbaycanla hazırkı energetika əlaqələrinin vəziyyətini şərh edərkən bildiriblər:
"Bizim üçün "Şahdəniz" qaz yatağının ikinci fazasından Bolqarıstana 1 milyard kubmetr təbii qazın tədarükünün təmin edilməsi son dərəcə vacibdir. 2020-ci ildən sonra Azərbaycanın "Şahdəniz-2" yatağından təchiz edəcəyi təbii qaz, faktiki olaraq, Bolqarıstanın təbii qaz istehlakının 25-30%-ni əhatə edəcək. Bu, kifayət qədər böyük paydır və bizim enerji təhlükəsizliyimizi ciddi şəkildə artıracaq, Bolqarıstan qaz bazarında rəqabətə yardım edəcək”.
Bundan əlavə, qeyd olunub ki, Bolqarıstan hökuməti qonşu ölkələrlə birləşdirici xətlərin tikintisi yolu ilə qaz tədarükünün şaxələndirilməsini təmin etmək üçün fəal şəkildə çalışır.
O da qeyd olunub ki, SOCAR-ın Bolqarıstanda bələdiyyələrin qazlaşdırılmasına maraq göstərməsinə müsbət baxılır: “Məlum olduğu kimi, şirkət analoji layihəni Gürcüstanda da həyata keçirib və onun Bolqarıstanın daxili qaz bazarına daxil olması istehlakçıların xeyrinə olacaq. Bir variant Azərbaycan qazının istilik vauçerlərinə alternativ kimi enerji daşıyıcılarına daxil edilməsidir. Bu perspektiv atılacaq mümkün konkret addımların dəqiqləşdirilməsi üçün detallı şəkildə təhlil olunur”.
Bundan başqa, Energetika Nazirliyindən "Bulqartransqaz" və SOCAR arasında ötən il imzalanmış, məqsədi təbii qaz tədarükü üçün əlavə marşrut, eləcə də Bolqarıstan üzərindən Cənub-Şərqi Avropanın digər bazarlarına tranzit imkanlarının araşdırılması Anlaşma Memorandumunda qeyd edilib.
Görünən odur ki, SOCAR-ın Bolqarıstanın qazlaşdırılmasında iştirak perspektivi yüksəkdir.
Sözügedən məsələni dəyərləndirən ekspert Rəsul Cahangirlinin fikrincə, SOCAR-ın Bolqarıstanın qazlaşdırılmasında iştirakını şərtləndirən bir sıra amillər var: “Əvvəla SOCAR beynəlxalq səviyyədə tanınan və özünü təsdiq edən şirkətdir. SOCAR-ın bir sıra ölkələrin qaz təchizatında, qazpaylayıcı işdə gördüyü işlər, əldə etdiyi uğurlar digər ölkələrin diqqətindən yayınmır. Onlardan biri də Bolqarıstandır və ölkə rəsmiləri bütün bunları maraqla izləyirlər. O üzdən, Bolqarıstan maraqlıdır ki, SOCAR nəinki bələdiyyələrin, o cümlədən, ümumilikdə, ölkənin qazlaşdırılmasında fəal iştirak etsin. SOCAR-ın uğurlu Gürcüstan təcrübəsini nəzərə alsaq, hesab edirəm ki, Bolqarıstanda bununla bağlı böyük işlər görülə bilər. Bu, yaxın və uzaq perspektivdə Azərbaycana bir sıra dividendlər vəd edir. Əvvəla bütün bunların sayəsində Azərbaycanın iqtisadi qazancı artacaq. Digər tərəfdən, bu həm də Azərbaycanın geosiyasi mövqeyinin güclənməsinə və daha da genişlənməsinə xidmət edəcək. Ona görə də hesab edirəm ki, Bolqarıstanla bu sahədə əməkdaşlıq imkanları genişdir və bu, hər iki ölkənin maraqlarına uyğundur”.
Vidadi ORDAHALLI
