Rəsul Cahangirli: “Azərbaycanda bununla bağlı yetərincə xammal var”
Məlum olduğu kimi, Prezident İlham Əliyev və birinci xanım Mehriban Əliyeva Mənzil İnşaatı Dövlət Agentliyinin Yasamal yaşayış kompleksinin açılışında iştirak ediblər. Yaşayış kompleksinin ümumi sahəsi 11,6 hektardır. 2016-cı ilin dekabrında kompleksin ilk doqquzmərtəbəli yaşayış binasının və ərazidə yerləşən ümumtəhsil məktəbi binasının təməli qoyulub.
Ərazidə 29 yaşayış binası inşa olunub. Bu binalardan 12-si 12 mərtəbəli, 17-si 9 mərtəbəlidir. Kompleksdə 1843 mənzil var. Mənzillər tam təmirli, mətbəx mebeli və qaz plitəsi, fərdi kombi sistemi ilə təchiz olunmuş vəziyyətdə vətəndaşlara təklif edilir. Kompleksin baş planı üzrə 5 binada bu ilin sentyabrında “Elektron hökumət” portalı üzərindən “Güzəştli mənzil” sistemi vasitəsilə 324 mənzil satışa çıxarılıb. Bu mənzillərdən 278-nin alqı-satqısı artıq başa çatıb.
Diqqətçəkən məqamlardan biri odur ki, mənzillərin təmiri və kompleksin tikintisində istifadə olunan inşaat materiallarının 95 faizi yerli istehsaldır. İnşaat işləri zamanı burada 1500-ə yaxın işçi çalışıb.
Bu bir daha onu göstərir ki, Azərbaycanda tikinti sənayesi materiallarına tələbatı ödəyəcək potensial var və tezliklə özünü təminat səviyyəsinə tam nail ola bilər. Bu gün Azərbaycan tikinti sənayesi materialları sahəsində artıq ölkənin tələbatını ödəyəcək sənaye potensialı yaradılıb. Bir çox tikinti materialları üzrə ölkəmiz öz tələbatını ödəyir. Özünü təminat səviyyəsinə nail olmaq mümkün olub. Ortada olan fakt bunu bir daha sübut edir. Digər tikinti materialları üzrə bu səviyyə yüksəkdir.
Bütün bunların fonunda, Mənzil İnşaatı Dövlət Agentliyinin həyata keçirdiyi layihədə inşaat materiallarının 95 faizinin yerli istehsala aid olması necə göstəricidir?
Məsələyə münasibət bildirən ekspert Rəsul Cahangirlinin sözlərinə görə, bu çox üstün göstəricidir: “Nəzərə almaq lazımdır ki, tikinti materiallarının istehsalı üçün yerli xammal lazımdır. Azərbaycan belə xammalla zəngindir. Bu gün həmin xammal ölkədə emal olunur. Dəyər zənciri yaradılır. Yüksək əlavə dəyərə malik olan məhsullar istehsal olunur. Azərbaycanda son dövrlər tikinti sektorunda ciddi inkişaf müşahidə edilir. Ölkənin, demək olar ki, bir çox yerində tikinti işləri geniş vüsət alıb, yeni məktəblər, uşaq bağçaları, idman və yaşayış kompleksləri, inzibati binalar inşa olunur. Həmçinin, sosial evlərin tikintisinə başlanması da bu sektora marağı artırıb. Müşahidə olunan inkişaf tendensiyası ölkə iqtisadiyyatının da irəliləməsinə və genişlənməsinə təsirsiz ötüşmür. Bu sektoru daha perspektivli sahəyə çevirir. Ümumilikdə, bunun bir səbəbi dövlətin artan maliyyə imkanıdırsa, digər səbəbi azad biznes mühitinin olması ilə bağlıdır. Belə olan halda, tikinti sektoru nəinki yerli sahibkarlar üçün, o cümlədən xarici investorlar üçün də sərfəlidir. Yerli tikinti materialları hesabına tələbatın ödənilməsinin bir sıra üstünlükləri var. Ən başlıcası, idxaldan asılılığın olmaması ilk növbədə valyutanın ölkədə qalması deməkdir. Həmçinin, yerli istehsalın daha ucuz və optimal qiymətə bazara çıxarılmasına şərait yaradacaq. Tikinti materiallarının qiymətinin aşağı düşməsi daşınmaz əmlak sahəsində mərhələli şəkildə qiymət tənzimlənməsinə təsir göstərə bilər. Yerli istehsalın artması digər tərəfdən məşğulluğun artmasına da səbəb olacaq. Bundan başqa, idxalın aradan qaldırılması dövlət büdcəsinə daxilolmaları artıracaq”.
Vidadi ORDAHALLI
