Pərviz Heydərov: “2019-cu ildə ölkədə inflyasiya səviyyəsi daha da aşağı düşəcək”
Son zamanlar ölkədə inflyasiya səviyyəsinin azalma meylinin olduğu açıqlanıb. Mərkəzi Bankın açıqladığı statistik rəqəmlərə əsasən, 2018-ci ilin 11 ayında orta illik inflyasiya 2.3% təşkil edib ki, bu da hədəf intervalından əhəmiyyətli aşağıdır.
Məlumatda qeyd edilir ki, mövsümi amillərin təsirilə noyabrda ərzaq inflyasiyası bir qədər artıb. Lakin qeyri-ərzaq məhsulları və pullu xidmətlərin aşağı templi qiymət dəyişimi, habelə monetar amillər bu artımı neytrallaşdırıb. Nəticədə aylıq inflyasiya 0.6% səviyyəsində qərarlaşıb.
Bildirilir ki, istehlak qiymətlərinin cari dinamikası və manatın dayanıqlı məzənnəsi inflyasiya gözləntilərini stabilləşdirən əsas amillər olaraq qalır. Eyni zamanda, cari ildə pul siyasətinin yumşaldılması istiqamətində ardıcıl qərarlar bazar subyektlərinin inflyasiya gözləntilərinə azaldıcı təsir göstərib. Biznes sektorunun inflyasiya gözləntiləri ötən iki ayda ticarət və xidmət sektorunda azalıb, qeyri-neft emal sənayesi və tikintidə artıb. Ev təsərrüfatlarının inflyasiya gözləntiləri müxtəlif gəlir qrupları üzrə fərqlidir: “Son proqnozlara görə, 2018-ci ilin sonuna inflyasiyanın 2.3% ətrafında qərarlaşacağı gözlənir”.
2019-cu ildə də inflyasiya səviyyəsinin aşağı olacağı qeyd olunur.
Məsələ ilə bağlı fikir bildirən iqtisadçı Pərviz Heydərov “Bakı-Xəbər”ə açıqlamasında qeyd etdi ki, ötən il ölkədə inflyasiya ikirəqəmli səviyyədə qeydə alındı. 2017-ci ildə inflyasiyanın belə olması səbəblərinə birincisi, neftin dünya bazar qiymətlərinin 2 ildən çox tədricən enməsi prosesindən sonra nəhayət, ümumi iqtisadi durumda mövsümi amillərin qiymətlərin artmasına güclü təsir göstərməsi, ikincisi isə, idxal məhsullarının mühüm rol oynaması daxil idi. Yəni idxal inflyasiyasının. Üçüncüsü isə, ən çox ərzaq məhsulları bahalaşdı ki, bu da ötən il ərzində bütün dünyada baş verdi.
2018-ci ildə inflyasiyanın birrəqəmli səviyyədə olacağı öncədən bəlli idi. Hökumət də bu ilin sonu üçün 6 faiz civarında inflyasiya nəzərdə tuturdu. Məlumdur ki, bu il manatın məzənnəsinin stabil olacağı, ölkədə makroiqtisadi vəziyyətin dəyişməz qalacağı öncədən bəlli idi”.
Həmsöhbətimizin sözlərinə görə, 2019-cu ildə ölkədə inflyasiya səviyyəsi daha da aşağı düşəcək.
Günel CƏLİLOVA
