Rəşad Həsənov: “Bəzən cinayət xarakterli fəaliyyətlər nəticəsində əldə olunmuş məişət avadanlıqları daxil olmaqla, istənilən növ metal məmulatının izinin itirilməsi...”
Bakıda və rayonlarda qapı-qapı gəzib metal yığanlarla bağlı qayda dəyişəcək. Artıq bu işlə məşğul olmaq istəyənlər qeydiyyatdan keçməli olacaqlar. Bununla bağlı Milli Məclis “İstehsalat və məişət tullantıları haqqında” Qanunda dəyişiklik etməyə hazırlaşır.
Dəyişikliklər Azərbaycanda əlvan və qara metal tullantılarının qəbulu ilə bağlı tələblərin sərtləşdirilməsini nəzərdə tutur. Layihədə bildirilib ki, bu dəyişikliklər əlvan və qara metal tullantılarının qəbulu fəaliyyətinin tənzimlənməsi, nəzarətin və şəffaflığın artırılması məqsədi daşıyır. Belə ki, qanunun 12-ci maddəsinə edilən əlavədə qeyd olunur ki, əlvan və qara metal tullantılarının qəbulu fəaliyyətini, qara və əlvan metalların əridilməsini yalnız qeydiyyatdan keçmiş sahibkarlıq subyektləri həyata keçirə bilərlər.
Əlvan və qara metal tullantılarının qəbulu, uçotu, radiasiya və partlayış təhlükəsizliyi baxımından müayinədən keçirilməsi qaydaları və onların əldə edilmə mənbəyinə dair tələblər müvafiq icra hakimiyyəti orqanının müəyyən etdiyi orqan tərəfindən təsdiq edilir: “Əldə edilmə mənbəyi məlum olmayan, qanunsuz yolla əldə edilməsi müəyyən edilən, fiziki şəxslərdən şəxsiyyəti təsdiq edən sənədlər tələb olunmadan, habelə radiasiya və partlayış təhlükəsizliyi baxımından müayinədən keçirilmədən əlvan və qara metal tullantılarının qəbul edilməsi, həmçinin, qara və əlvan metalların əridilməsi və bunun nəticəsində ərintilərin alınması obyektləri təhlükə potensiallı obyektlər olaraq, dövlət reyestrində qeydiyyatdan keçirilməyən sahibkarlıq subyektləri tərəfindən bu növ tullantıların qəbulu fəaliyyətinin həyata keçirilməsi məsuliyyətə səbəb olur”.
“İstehsalat və məişət tullantıları haqqında” Qanuna ediləcək dəyişikliyə əsasən, metal tullantılarının qəbulu ilə yalnız xüsusi icazəsi olan sahibkarlar məşğul ola biləcəklər.
Məsələ ilə bağlı fikir bildirən Rəşad Həsənov “Bakı-Xəbər”ə açıqlamasında qeyd etdi ki, bu sahədə nəzarət tədbirlərinin gücləndirilməsinə ehtiyac var. Çünki qeyd olunan sahədə davamlı olaraq problemlər müşahidə olunur və yetərincə nöqsanlar mövcuddur: “Bəzən cinayət xarakterli fəaliyyətlər nəticəsində əldə olunmuş məişət avadanlıqları daxil olmaqla, istənilən növ metal məmulatının izinin itirilməsi, məsuliyyətdən yayınma məqsədilə onları metal qəbulu məntəqələrinə verirlər. Hətta təhlükəsizliklə bağlı məsələ mütəmadi olaraq gündəmə gətirilir”.
Ekspert hesab edir ki, əlvan və qara metal tullantılarının qəbulu ilə bağlı nəzarət tədbirlərinin artırılması mümkün qədər yumşaq formada həyata keçirilməlidir. Qeyd olunan sahədə məşğul olan sahibkarların və fiziki şəxslərin fəaliyyətinin məhdudlaşdırılmasına hədəflənməməlidir. Qanunvericiliyin tələbinə uyğun olaraq, onların fəaliyyəti təmin olunmalıdır: “Xüsusi icazələrin verilməsi yolu ilə prosesin inhisarçılığa getməsinə şəarit yaradılmamalıdır. Belə olduğu təqdirdə, həm rəqabət aradan qalxacaq, həm də subyektlərin ayrı-ayrı formalaşması ailələrin gəlirinə və məşğulluğun səviyyəsinə təsir edəcək. Qanunvericiliyə dəyişiklik yaxşıdır. Ancaq vətəndaşların sosial durumuna təsir edəcək nüansları nəzərə almaq lazımdır”.
Günel CƏLİLOVA
