Seyid Camal Əzimbəyli: “İlham Əliyev 2003-cü ildə Prezident seçiləndən sonra qaçqın və məcburi köçkünlərin mənzil-məişət şəraitinin yaxşılaşdırılması ilə bağlı ciddi addımlar atıldı”
Azərbaycan dövləti qaçqın və məcburi köçkünlərin sosial-məişət qayğılarının həllini diqqət mərkəzində saxlayır. Məhz Prezident İlham Əliyevin imzaladığı fərman və sərəncamlar, verdiyi tapşırıqlara əsasən, bu kateqoriyadan olan insanların həyat şəraitinin yaxşılaşdırılması üçün ardıcıl və sistemli tədbirlər görülür. İcra olunan layihələr nəticəsində bu qəbildən olan minlərlə insanın sosial vəziyyəti yaxşılaşdırıldı. Həmçinin, mənzil-məişət şəraiti məsələləri öz həllini tapır.
Qeyd edək ki, 2007-ci ildə ölkədəki 12 çadır düşərgəsinin ləğv edilməsi ilə başlanan proses nəticəsində qaçqın və məcburi köçkünlər üçün indiyədək 3,5 milyon kvadratmetr yaşayış sahəsi olan müasir qəsəbələr və çoxmərtəbəli binalardan ibarət yaşayış kompleksləri salınıb. İlin sonuna qədər evlərlə, mənzillərlə təmin edilmiş məcburi köçkünlərin sayı 300 minə çatacaq. Ümumilikdə, bu kateqoriyadan olan insanların sosial problemlərinin həlli üçün indiyədək 7,1 milyard manat vəsait xərclənib.
Prezident İlham Əliyev Abşeron rayonunun ərazisində məcburi köçkün ailələri üçün salınmış yeni yaşayış kompleksinin istifadəyə verilməsi mərasimində çıxışı zamanı deyib ki, bu il 5800 köçkün ailəsi üçün fərdi evlər, mənzillər tikilib və istifadəyə verilib: "Artıq köçkünlərin bu evlərə, mənzillərə yerləşməsi prosesinə start verilmişdir. Bu, rekord göstəricidir. Biz hər il minlərlə köçkün ailəsini yeni evlərlə, mənzillərlə təmin edirik. Bir daha demək istəyirəm ki, bu il bu, ən yüksək səviyyədə öz həllini tapıb. Bizim vəzifəmiz ondan ibarətdir ki, bütün köçkün ailələri normal şəraitlə təmin olunsunlar. Bu istiqamətdə böyük işlər görülür, həm Bakı şəhərində, Abşeron rayonunda, Sumqayıt şəhərində, həm də digər şəhər və rayonlarımızda. Son illərdə yüzdən çox köçkün şəhərciyi tikilib istifadəyə verilmişdir. Ancaq o da həqiqətdir ki, hələ də çətin vəziyyətdə yaşayan köçkünlərimiz var. Onların problemləri də öz həllini tapacaq”.
Bütün bu deyilənlərin fonunda, indiyədək böyük sayda qaçqın və məcburi köçkünün mənzillə təmin olunması Azərbaycanın müasir sosial siyasətinin ifadəsi baxımından necə hadisədir?
Məsələyə münasibət bildirən şərqşünas Seyid Camal Əzimbəylinin sözlərinə görə, sözün bütün mənalarında, bununla bağlı əldə olunan nəticələr böyük hadisədir: “Nəzərə almaq lazımdır ki, İlham Əliyev 2003-cü ildə Prezident seçiləndən sonra qaçqın və məcburi köçkünlərin mənzil-məişət şəraitinin yaxşılaşdırılması ilə bağlı ciddi addımlar atıldı. Məhz İlham Əliyevin Prezident seçilməsindən sonra çadır şəhərcikləri ləğv edildi. Halbuki, o vaxta qədər çadır şəhərciklərində məcburi köçkünlərin bir hissəsi çox ağır şəraitdə yaşayırdı. Prezident İlham Əliyevin yeritdiyi uğurlu və məqsədyönlü siyasət nəticəsində ölkəyə daxil olan valyuta gəlirləri çox səmərəli şəkildə istifadə olunaraq, məcburi köçkünlərin sosial problemləri öz həllini tapmağa başladı. Bütün bu işlərin həyata keçirilməsində Prezident İlham Əliyevin müstəsna xidmətləri var. Nəzərə almaq lazımdır ki, postsovet ölkələrinin bəziləri də qaçqın və məcburi köçkün problemi ilə üzləşib. Həmin dövlətlərin heç birində Azərbaycandakı qədər sözügedən problemin həlli ilə bağlı böyük işlər görülməyib. Baxmayaraq ki, Azərbaycanda qaçqın və məcburi köçkünlərin sayı digərləri ilə müqayisədə daha çoxdur. Bax, budur Azərbaycanda məcburi köçkünlərlə bağlı həyata keçirilən uğurlu sosial siyasətin parlaq nəticəsi. Təsadüfi deyil ki, indiyə qədər görülən işlər sayəsində xeyli sayda qaçqın və məcburi köçkün mənzillə təmin olunub. Yaxın illərdə, bütövlükdə, sözügedən problem öz həllini tapacaq. İnşallah, işğal altında olan ərazilər azad olunandan sonra məhv edilən yaşayış məntəqələri sürətlə bərpa olunaraq yenidən qurulacaq. Bir sözlə, məcburi köçkünlərlə bağlı çox uğurlu sosial siyasət yeridilir”.
Vidadi ORDAHALLI
