Cavid İmamoğlu: “Bu gün məcburi köçkünlərin sosial müdafiəsinin təmin edilməsi istiqamətində...”
Dövlət tərəfindən həyata keçirilən sosial siyasət ölkə vətəndaşlarının sosial rifah halının yüksəldilməsinə xidmət edir. Bu gün ölkəmizdə əhalinin bütün təbəqələrinin sosial məsələlərinin həlli istiqamətində hərtərəfli işlər görülür. Azərbaycan sosial cəhətdən sürətlə inkişaf edir. Dövlətin sosial siyasətində məcburi köçkünlərə xüsusi münasibət olduğu sirr deyil.
Bu kateqoriyadan olan insanların mənzil şəraitinin yaxşılaşdırılması üçün dövlət tərəfindən həyata keçirilən tədbirlər günü-gündən genişlənir. Bu gün Azərbaycanın paytaxtında, qəsəbələrində, eləcə də bölgələrində məcburi köçkünlər üçün xüsusi şəhərciklər salınır, hər bir şəraiti olan yaşayış binaları inşa edilir.
Qeyd edək ki, dekabrın 24-də Azərbaycan Prezidenti İlham Əliyev Abşeron rayonunda məcburi köçkün ailələri üçün salınmış yaşayış kompleksinin istifadəyə verilməsi mərasimində iştirak edib. Məcburi köçkünlər qarşısında çıxış edən ölkə başçısı bir daha vurğulayıb ki, yurd-yuvalarından didərgin düşən insanların problemlərinin həlli hər zaman onun diqqət mərkəzindədir. Bu il 5800 köçkün ailəsi üçün fərdi evlər, mənzillər tikilib istifadəyə verildiyini söyləyən Prezident İlham Əliyev “Artıq köçkünlərin bu evlərə, mənzillərə yerləşməsi prosesinə start verilmişdir. Bu, rekord göstəricidir. Biz hər il minlərlə köçkün ailəsini yeni evlərlə, mənzillərlə təmin edirik. Bir daha demək istəyirəm ki, bu il bu, ən yüksək səviyyədə öz həllini tapıb. Bizim vəzifəmiz ondan ibarətdir ki, bütün köçkün ailələri normal şəraitlə təmin olunsunlar. Bu istiqamətdə böyük işlər görülür, həm Bakı şəhərində, Abşeron rayonunda, Sumqayıt şəhərində, həm də digər şəhər və rayonlarımızda. Son illərdə yüzdən çox köçkün şəhərciyi tikilib istifadəyə verilmişdir. Ancaq o da həqiqətdir ki, hələ də çətin vəziyyətdə yaşayan köçkünlərimiz var. Onların problemləri də öz həllini tapacaq” - deyə çıxışında bildirib.
Sosioloq Cavid İmamoğlu “Baki-Xəbər”ə bildirdi ki, bu gün dövlətin sosial siyasətində məcburi köçkünlərə xüsusi münasibətin olması təqdirəlayiq haldır. C.İmamoğlunun bildirdiyinə görə, onlara göstərilən qayğı və diqqət dövlətin sosial siyasətinin həssas qruplara yönəldildiyini təsdiqləyir. Azərbaycanda qaçqın və məcburi köçkünlərin sosial problemlərinin həllində, eləcə də onların mənzil şəraitinin yaxşılaşdırılmasında atılan addımların bu qəbildən olan insanlara stimul verdiyini önə çəkən müsahibimiz hesab edir ki, bu onların dövlət qayğısı ilə tam əhatə olunduğunu deməyə əsas verir. “Dövlətimizin həyata keçirdiyi sosial siyasətin bir istiqaməti də həssas təbəqə sayılan qaçqın və məcburi köçkünlərin problemlərinin həllinə yönəlib. Bu gün məcburi köçkünlərin sosial müdafiəsinin təmin edilməsi istiqamətində hərtərəfli işlər görülür. Azərbaycan reallığında məcburi köçkünlərin yaşam şəraitinin təmin olunması, yəni dövlətin bu təminatı öz üzərinə götürməsi müsbət haldır. Bu onu göstərir ki, məcburi köçkünlərin qayğı və problemləri dövləti ciddi düşündürür və bu halların aradan qaldırılması üçün mühüm işlər görülür. Bu gün məcburi köçkünlərə evlər tikilir, onlar üçün inşa edilən qəsəbələrdə onların övladlarının təhsil alması, asudə vaxtlarını səmərəli keçirməsi və s. bağlı bütün lazımi şərait yaradılır. Bu günlərdə Abşeronda məcburi köçkünlər üçün inşa edilən evlərin onlara təhvil verilməsi də görülən işlərdən biridir. Eyni zamanda da məcburi köçkünlərin məşğulluğunun təmin edilməsi istiqamətində də addımlar atılır. Bütün bunlar hər kəsin gözləri qarşısında baş verir”.
C.İmamoğlunun sözlərinə görə, dövlətin sosial siyasətində məcburi köçkünlərin sosial qayğılarının öndə durması onu deməyə əsas verir ki, məcburi köçkünlərin hər bir çətinliyinin həllində dövlət dəstək göstərir. O, həmçinin, qeyd etdi ki, məcburi köçkünlərlə bağlı bəzi problemlər var və onların da aradan qaldırılması zəruridir. Belə ki, onlarla psixoloji iş lazımi səviyyədə qurulmayıb. Mütəxəssisin fikrincə, psixoloqlar məcburi köçkünlərə psixoloji yardım göstərməlidirlər. Onun sözlərinə görə, bu gün sosial qayğıları arxada qoyan məcburi köçkünlər öz yurdlarına qayıtmaq ümidi ilə yaşayırlar.
İradə SARIYEVA
