Fikrət Yusifov: “Cari ilin 11 ayı ərzində qeyri-neft sənayesindən əldə olunan nəticələr 10 faizdən yuxarıdır, nəticənin yüksək olması bu sahəyə yatırılan investisiyalarla bağlıdır”
Hər bir ölkə iqtisadiyyatı üçün xarici investisiyalar mühüm rol oynayır, bu kapital istehsalatın şaxələndirilməsi və genişləndirilməsində stimul kimi çıxış edir.
Ölkəmiz xarici investisiyaların cəlb olunması istiqamətində ardıcıl işlər görür, iqtisadiyyatın şəffaflaşdırılması, sağlam investisiya mühitinin yaradılması, prosedurların sadələşdirilməsi üçün hüquqi addımlar atır. Görülən işlər sayəsində Azərbaycana yatırılan investisiyaların həcmi artır.
Açıqlanan statistik rəqəmlərə əsasən, 2018-ci ilin yanvar-noyabr aylarında xarici müəssisə və təşkilatlar tərəfindən əsas kapitala 4 754,5 mln. manat vəsait yönəldilib. Dövlət Statistika Komitəsinin yaydığı məlumatda qeyd olunur ki, xarici ölkələr və beynəlxalq təşkilatların vəsaitləri hesabına əsas kapitala yönəldilmiş vəsaitin 3 838,9 mln. manatı (80,7%-i) Birləşmiş Krallıq, İsveçrə, Türkiyə, Malayziya, ABŞ, Yaponiya, Rusiya, İran və Çexiya sərmayədarlarına məxsus olub.
Qeyd edək ki, 2018-ci ilin yanvar-noyabr aylarında ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala 12 899,4 mln. manat və ya əvvəlki ilin müvafiq dövrü ilə müqayisədə 8,8% az vəsait yönəldilib. Daxili mənbələrdən əsas kapitala yönəldilmiş vəsaitin dəyəri ümumi sərmayənin 63,1%-ini təşkil edib.
Cari il ərzində Azərbaycan iqtisadiyyatının bir sıra sahələrinə investisiyalar yatırılıb. Yatırılan investisiyalar sayəsində turizm sektoru əhəmiyyətli dərəcədə inkişaf edib, həmçinin, regionlarda xeyli iş görülüb.
Cari il ərzində Azərbaycan iqtisadiyyatına yatırılan xarici sərmayələr barədə danışan iqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, cari ilin 11 ayı ərzində xarici ölkələr tərəfindən əsas kapitala 12,9 milyon manat vəsait yönəlib. Bu, 2017-ci illə müqayisədə 8,8 faiz azdır. Ancaq buna baxmayaraq, iqtisadiyyatın real sektoruna yatırılan sərmayələrin həcmi artıb: “Qeyri-neft sektoruna yatırılan sərmayələrin həcmi mütəmadi olaraq artır. 2018-ci ilin 11 ayı ərzində qeyri-neft sektoruna yatırılan sərmayələrin həcmi 21,2 faiz artıb. O cümlədən, qeyri-neft sənayesinə yatırılan investisiyaların həcmi 22,6 faiz artıb. Bütövlükdə, qeyri-neft sektoruna yatırılan vəsaitlərin məbləği 7,6 milyard manat olub. Bunun da 1,5 milyard manatı tək qeyri-neft sənayesinin payına düşür. Bu göstəricilər onu deməyə əsas verir ki, Azərbaycan iqtisadiyyatının aparıcı sahəsi olan real sektora yüksək diqqət var. Nəzərə almaq lazımdır ki, bu sahə ölkə başçısının xüsusi diqqətindədir. Bu səbəbdən də iqtisadiyyatın real sektoruna yatırılan vəsaitin həcmi ildən-ilə artır”.
Həmsöhbətimiz onu da vurğuladı ki, cari ilin 11 ayı ərzində qeyri-neft sənayesindən əldə olunan nəticələr 10 faizdən yuxarıdır. Nəticənin yüksək olması bu sahəyə yatırılan investisiyalarla bağlıdır.
F.Yusifov qeyd etdi ki, ötən dövr ərzində Azərbaycana yatırılan sərmayələrin əksəriyyəti məhz qeyri-neft sektoruna aid olub. Ölkə iqtisadiyyatına tək yerli investorlar deyil, xaricilər də maraq göstərirlər: “Məlumdur ki, 2019-cu il yanvarın 1-dən etibarən yeni vergi qaydaları əsasında investorlar daha rahat fəaliyyət göstərə biləcəklər. Belə olan halda, həm yerli, həm də xarici investorlar Azərbaycan iqtisadiyyatına daha çox yatırım edəcəklər. Nəticədə 2019-cu ilin sonunda daha üstün göstəricinin şahidi olacağıq”.
Günel CƏLİLOVA
