Hadi Rəcəbli: “Təkcə bu il 20 min köçkün, yəni 5800 ailəyə, ötən il isə 12 min məcburi köçkün ailəyə yeni evlər verilib”
Azərbaycanın sürətli sosial-iqtisadi inkişafının əsas xarakterik xüsusiyyətlərindən biri yaşanan tərəqqinin hər bir vətəndaşın həyatında öz əksini tapması, insanların rifah halının günü-gündən yaxşılaşmasıdr. Əhalinin maddi gəlirlərinin davamlı şəkildə çoxalması, əməkhaqqı və pensiyaların, eləcə də büdcədən maliyyələşən insanlara ödənilən vəsaitlərin Prezident İlham Əliyevin müvafiq sərəncamlarına əsasən vaxtaşırı artırılması və bu qəbildən olan digər tədbirlər ölkədə sosial sferada vəziyyətin daha da yaxşılaşmasını xarakterizə edən mühüm parametrlərdəndir.
Əldə edilən bu uğurlar Ermənistanın həyata keçirdiyi işğalçılıq siyasəti üzündən öz doğma yurd-yuvalarını tərk edərək qaçqın və məcburi köçkün həyatı yaşamağa məcbur olan insanların yaşayış durumuna və sosial vəziyyətinə də təsirsiz ötüşmür. MDB, eləcə də Avropa məkanında qaçqın və məcburi köçkünlərin sayına görə Azərbaycan ilk yerlərdə gələn dövlətlərdən biri olmasına baxmayaraq, bu kateqoriyadan olan insanların həyat səviyyəsinin yaxşılaşdırılması baxımından ən fəal siyasət yürüdən və yüksək nəticələr əldə edən ölkələrdən hesab olunur. Qaçqın və məcburi köçkünlərin yaşayış səviyyəsinin daha da yaxşılaşdırılması dövlətin həyata keçirdiyi siyasətin əsas prioritetlərindən birini təşkil edir və göstərilən istiqamətdə uğurlu nəticələrin əldə olunması beynəlxalq miqyasda da açıq etiraf edilir.
Qaçqın və məcburi köçkünlərin sosial problemlərinin həlli daim dövlətin diqqət mərkəzindədir. Onların sosial həyatının yaxşılaşdırılması istiqamətində ölkə rəhbərliyi tərəfindən sərəncamlar, fərmanlar imzalanır, müəyyən proqramlar həyata keçirilir.
Məcburi köçkünlərin problemlərinin həlli sahəsində genişmiqyaslı işlər görülüb, ölkədəki bütün çadır düşərgələri, fin tipli qəsəbələr ləğv edilib, yeni salınmış 100-dən artıq qəsəbə və şəhərcikdə 265 min nəfər məskunlaşdırılıb.
Son 15 ildə 290 minədək məcburi köçkün yeni evlərlə, mənzillərlə təmin edilib. Azərbaycanda qaçqın və məcburi köçkünlərə olan münasibət, diqqət və qayğıya başqa heç bir ölkədə rast gəlinmir.
Millət vəkili Hadi Rəcəbli qeyd etdi ki, qaçqın və məcburi köçkün ailələrinin sosial rifahının yaxşılaşdırılması üçün mütəmadi olaraq sərəncamlar imzalanır, şəhərciklər salınır: “Prezidentin bu barədə imzaladığı sərəncamlar mühüm əhəmiyyət kəsb edir. Yataqxanalarda və digər yerlərdə yaşayan məcburi köçkünlərin həyat şəraitini yaxşılaşdırmaq üçün hazır evlərin verilməsinin əhəmiyyəti çox böyükdür. Çünki buna çox ehtiyac var idi. Danılmaz faktdır ki, qaçqınların və məcburi köçkünlərin bəziləri çox ağır şəraitdə yaşayırdılar. Onların sosial həyatının yaxşılaşması istiqamətində Prezident məcburi köçkünləri mənzillə təmin etdi”. Millət vəkilinin sözlərinə görə, bu günə qədər 290 minədək məcburi köçkün yeni mənzillərlə təmin edilib: “Məlumat üçün bildirim ki, bu il 20 min köçkün, yəni 5800 ailəyə, ötən il isə 12 min məcburi köçkün ailəyə yeni evlər verilib. 30-dan çox şəhər və rayonda 100-dən çox qəsəbə və çoxmərtəbəli binalardan ibarət yaşayış kompleksi salınıb. Təkcə Qobu Park yaşayış komleksinin 1-ci mərhələsindəki 11 binada 1026 ailə yerləşdirilib. Görülən işlərin məqsədi doğma yurdundan didərgin düşən insanların həyat şəraitinin yaxşılaşdırılmasıdır”.
Günel CƏLİLOVA
