Vüqar Bayramov: “Bu il həm biznesin yaxşılaşdırılması, həm də vergi qanunvericiliyinin təkmilləşdirilməsi ilə bağlı bir çox addımlar atılıb”
"Forbes" jurnalı biznes üçün ən yaxşı ölkələrin siyahısını açıqlayıb. Siyahıda investorlar üçün cazibəli olan 161 ölkənin adı qeyd edilib. Azərbaycan "Forbes" jurnalı tərəfindən tərtib edilmiş biznesin aparılması üçün ən yaxşı ölkələrin reytinqində 161 ölkə arasında 70-ci yeri tutub.
Məlumata görə, siyahıda 1-ci yerdə Böyük Britaniya, ikinci yerdə İsveç, 3-cü yerdə isə Honqkonq qərarlaşıb. Ən yaxşı ölkələrin 5-liyinə Niderland və Yeni Zelandiya da yer alıb. ABŞ siyahıda 17-ci yerdədir.
Xatırladaq ki, jurnal 30 ildir öz reytinq siyahısını hazırlayır. Britaniya ikinci ildir ki, siyahıya liderlik edir.
Ölkələrin dəyərləndirilməsi zamanı 15 göstərici nəzərə alınır. Krallıq bu göstəricilərin hamısını özündə birləşdirir. "Forbes" ekspertləri qeyd edirlər ki, Böyük Britaniyanın "kədərli" gələcəyinə baxmayaraq, Krallıqda işgüzar iqlim cazibədar olaraq qalır.
MDB ölkələri arasında Gürcüstan 44-cü, Rusiya 55-ci, Qazaxıstan 65-ci, Ermənistan 87-ci, Belarus 88-ci, Özbəkistan 105-ci, Qırğızıstan 108-ci, Tacikistan 124-cü yerdə qərarlaşıb.
"Forbes" reytinqinə görə, iş adamları üçün ən pis şərait Mərkəzi Afrika Respublikasında, Konqoda, Qvineya-Bisauda, Ekvatorial Qvineyada və Çaddadır.
"Forbes" ölkələri 15 müxtəlif amil - mülkiyyət hüquqlarının qorunması, korrupsiya səviyyəsi, vergilər, innovasiyalar, həyatın keyfiyyəti və s. üzrə qiymətləndirib. Qiymətləndirmə zamanı Dünya Bankının, "Aon" və "Marsh & McLennan" şirkətlərinin, Dünya İqtisadi Forumunun, Birləşmiş Millətlər Təşkilatının və digər təşkilatların dərc olunmuş hesabatlarından istifadə edilib.
Görünən odur ki, Azərbaycan siyahıda Rusiya və Qazaxıstandan sonra MDB məkanında ən yaxşı yerdə qərarlaşıb. Digər MDB dövlətləri bu sahədə Azərbaycandan xeyli geridə qalıblar. Bu bir daha onu göstərir ki, Azərbaycanda aparılan davamlı islahatlar ölkənin biznes üçün ən cazibədar ölkələrdən birinə çevrilməsinə şərait yaradır. Qarşıdakı illərdə Azərbaycanın siyahıda daha öncül yerdə qərarlaşacağı şübhəsizdir. Ən azından, proseslərin gedişi onu göstərir.
Maraqlıdır, bəs ekspertlər Azərbaycanın siyahıdakı mövqeyini necə dəyərləndirirlər?
Sözügedən məsələni “Bakı-Xəbər”ə şərh edən iqtisadçı-ekspert Vüqar Bayramovun sözlərinə görə, siyahıda Azərbaycanın tutduğu yeri müsbət qiymətləndirir: “Məsələ ondadır ki, Azərbaycan MDB və region ölkələri arasında, Gürcüstan istisna olmaqla, digər ölkələrdən daha öncül yerlərdən birini tutur. Belarus və digər MDB ölkələri Azərbaycandan geridir. Bu kontekstdən Azərbaycanın tutduğu yeri müsbət qiymətləndirirəm. Nəzərə almaq lazımdır ki, bir müddət əvvəl Dünya Bankı tərəfindən hazırlanan "Doing Business-2018" hesabatında Azərbaycan ilk 25-liyə daxil olmuşdu. Praktiki olaraq, “Forbes”lə Dünya Bankının metodologiyası fərqlidir. Güman olunur ki, Azərbaycanın yeri bundan sonra daha da yaxşılaşsın. Baxmayaraq ki, siyahıda Azərbaycanın tutduğu yer yaxşıdır, amma mövcud yerin daha da yaxşılaşdırmaq imkanları var və bununla bağlı bir sıra işlər görülür. Xüsusən də 2018-ci ildə ölkədə aparılan islahatlar növbəti il Azərbaycanın siyahıda yerinin daha da yaxşılaşacağından xəbər verir. Nəzərə alsaq ki, bu il həm biznesin yaxşılaşdırılması, həm də vergi qanunvericiliyinin təkmilləşdirilməsi ilə bağlı bir çox addımlar atılıb, o zaman gözləntilər böyükdür. Bütün bunlar ondan xəbər verir ki, növbəti hesabatda Azərbaycanın yeri daha yaxşı pillədə qərarlaşacaq. O baxımdan biznes mühitinin qiymətləndirilməsi baxımından bu il Azərbaycanın siyahıda tutduğu yer təqdirəlayiqdir. Ancaq bu il həyata keçirilən islahatları nəzərə alsaq, birmənalı şəkildə demək olar ki, Azərbaycan növbəti illərdə yerini daha da yaxşılaşdıra bilər. Reallıq ondan ibarətdir ki, aparılan bir sıra islahatlar Azərbaycanda biznes imkanlarının genişlənməsinə xidmət edir”.
Vidadi ORDAHALLI
